ആഫ്രിക്കൻ ആനപ്രേമം

 ആനകളെ തങ്ങളിലൊരാളായി കണ്ട് പരിചരിക്കുന്ന ഒരുകൂട്ടം ആളുകൾ. ആ സ്നേഹത്തിന് പ്രതിഫലമായി അവരെ തുമ്പിക്കൈയോട് ചേർത്തുനിർത്തുന്ന ആനക്കൂട്ടം. കെനിയയിലെ സാമ്പുരുഗോത്രക്കാരുടെ ആനപ്രേമം അതിർത്തികൾ കടന്ന് സഞ്ചരിക്കുകയാണ്

- G SHAHEED

വിറകെടുക്കാൻ വരുന്നവർക്കുവേണ്ടി മരക്കൊമ്പുകൾ ഒടിച്ചുകൊടുക്കുന്ന ആനകൾ. വെള്ളം തേടി നടക്കുന്നവർക്ക് മണ്ണിനടിയിലെ ജലസാന്നിധ്യം മനസ്സിലാക്കിക്കൊടുക്കുന്ന ആനകൾ. ഒറ്റപ്പെട്ടുപോകുന്ന ആനക്കുട്ടികൾക്ക് വയറു നിറയെ പാൽ കൊടുക്കുന്ന ഗോത്രനിവാസികൾ. കെനിയയിലെ സാമ്പുരു ഗോത്രക്കാരും ആനകളും തമ്മിലുള്ള ആത്മബന്ധം കാഴ്ചക്കാരെ വിസ്മയിപ്പിക്കും. ആഫ്രിക്കൻ ഭൂഖണ്ഡത്തിലൂടെയുള്ള യാത്രയിൽ കണ്ട കാഴ്ചകൾ പങ്കുവയ്ക്കുമ്പോൾ ഫ്രഞ്ചുകാരിയായ ക്രിസ്റ്റിൻ അമുർ ലിവാർ ആവേശത്തിലായിരുന്നു. സ്ത്രീശാക്തീകര ണം ലക്ഷ്യമിട്ട് സിങ്കപ്പൂർ കേന്ദ്രമായി പ്രവർത്തിക്കുന്ന ഹെർപ്ലാനറ്റ് എർത്ത് എന്ന സംഘടനയെ നയിക്കുന്ന യുവതിയാണ് ക്രിസ്റ്റിൻ, സാഹസികതയുടെ സ്ത്രീ രൂപം എന്നുപറയാം. അഞ്ചുവർഷംകൊണ്ട് ക്രിസ്റ്റിൻ നയിച്ച യുവതികളുടെ സംഘം സാഹസികതയുടെ പുതിയ ചരിത്രപഥങ്ങൾ സൃഷ്ടിച്ചു. ആർട്ടിക്കയിലെയും അന്റാർട്ടിക്കയിലെയും ഭയാനകമായ ശീതക്കൊടുങ്കാറ്റും ജോർദാൻ മരുഭൂമിയിലെ ചൂടുകാറ്റും അഗ്നിപർവതത്തിൽ നിന്ന് വമിക്കുന്ന ഗന്ധകപ്പുകയും അതിജീവിച്ച് അവർ കാതങ്ങൾ താണ്ടി. സാഹസികയാത്രകളായിരു ന്നു ഏറെയും. ക്രിസ്റ്റിന്റെ യാത്രാനുഭവങ്ങൾ വൈൽഡ് വിസ്ഡം' എന്ന പേരിൽ പെൻഗ്വിൻ ബുക്സിലൂടെ പുറത്തിറങ്ങിയപ്പോൾ ഏറെ ശ്രദ്ധിക്കപ്പെട്ടു.

ആനയുമായുള്ള ആത്മബന്ധം

കെനിയയിലെ സാമ്പുരു ഗോത്രവർഗക്കാർ പ്രകൃതിയുമായി ആത്മബന്ധം പുലർത്തുന്നവരാണ്. കാതോർത്താൽ കാട്ടാനകളുടെ ഹൃദയത്തുടിപ്പുകൾ പോലും അവർക്ക് മനസ്സിലാകും. ഗോത്രവർഗക്കാരുടെ മനസ്സ് ആനകൾക്കും അറിയാം. കാട്ടിലൂടെ ഞങ്ങൾ നടക്കുമ്പോൾ കണ്ട കാഴ്ച അവിശ്വസനീയമായിരുന്നു. കാട്ടിൽ വിറക് ശേഖരിക്കാനായി ഗോത്ര സ്ത്രീകൾ എത്തിയിരുന്നു. അവർക്കുവേണ്ടി, ആനകൾ മരങ്ങളിലെ ഉണങ്ങിയ കൊമ്പുകൾ ഒടിച്ച് നിലത്തിട്ടിരിക്കുന്നു. അത് കെട്ടുകളാക്കി ശേഖരിച്ച് തലച്ചുമടായി നീങ്ങുന്ന ഗോത്ര സ്ത്രീകളെ കണ്ടപ്പോൾ ഞങ്ങൾ അദ്ഭുതപ്പെട്ടുപോയി.