പുള്ളിനത്തിന്റെ സ്വകാര്യനിമിഷങ്ങൾ

രൂപഭംഗികൊണ്ടും ചലനംകൊണ്ടും ഓമൽ കൗതുകമാണ് പുള്ളിനത്തുകൾ. കീടങ്ങളെ ഭക്ഷിച്ച് പ്രകൃതി പരിപാലനം സാധ്യമാക്കുന്ന പുള്ളിനത്തുകളെത്തേടിയാണ് ഇക്കുറി യാത്ര...

- കാടിന്റെ നിറങ്ങൾ Text & Photos: AZEEZ MAHE

കവ്വായി കായലിന്റെ കൈവഴിയായ കുണിയൻപുഴ ഉയിരേകുന്ന കരിവെള്ളൂരിലെ കുണിയൻ തണ്ണീർത്തടം. അവി ടെ വർഷംതോറും 230-ലേറെ ഗണത്തിൽപ്പെട്ട ദേശാടനക്കിളികൾ വിരുന്നെത്താറുണ്ട്. കവ്വായി കായലിലേക്ക് ഒഴുകിയെത്തുന്ന തേജസ്വിനി, ഒളവര എന്നീ നദികളെ കൂട്ടിയിണക്കുന്ന ജലസ്രോതസ്സാണ് കുണിയൻപുഴ, കുണിയനിൽ എത്തുമ്പോൾത്തന്നെ തൊടിയിലും പാടവരമ്പിലുമെല്ലാം നിന്ന് കിളികൾ  സ്വാഗതമോതുന്നത് കേൾക്കാം.

"കുണിയനിലെ ബാൽപാണ്ടി' എന്ന് വിളിപ്പേരുള്ള പക്ഷി നിരീക്ഷകനും ഫോട്ടോഗ്രാഫറുമായ അഭിലാഷ് പത്മനാഭനും അധ്യാപകനായ സജീവ് മാഷുമൊത്തായിരുന്നു ഇത്തവണത്തെ യാത്ര. ചിറകഴകാൽ കൊതിപ്പിച്ചും അന്തരീക്ഷം രാഗലോലമാക്കിയും കിളിക്കൂട്ടങ്ങൾ ഒരുപാട് തുടിച്ചു പറന്നു. ഓലത്തുമ്പിൽ ഊഞ്ഞാലാടിയും ഞാവൽമരത്തിൽ നിന്ന് മധുരം നുണഞ്ഞും തത്തിപ്പറക്കുന്ന മഞ്ഞക്കിളിയാണ് ആദ്യം കണ്ണിൽപ്പെട്ടത്. "ദേവലോകത്തെ തച്ചന്മാർ' എന്ന് വിളിപ്പേരുള്ള നാട്ടുമരംകൊത്തിയും ചിത്രാംഗദൻ മരംകൊത്തിയും വൃക്ഷങ്ങളുടെ പോടുകളിൽ പുഴുക്കളെ തിരയുന്നതും ചിന്നക്കുട്ടുറുവൻ തലനീട്ടുന്നതുമെല്ലാം കാണാമായിരുന്നു. ഈ കാഴ്ചകളെല്ലാം മനോഹരമായിരുന്നെങ്കിലും മനസ്സിൽ ചേക്കേറിയ ഒരു കുഞ്ഞു പക്ഷിയുടെ ജീവസ്സുറ്റ ഓർമകളുടെ ചിത്രസാക്ഷ്യമാണ് ഈ കുറിപ്പ്.

മനംകവരുന്ന മൂങ്ങകളുടെ കുടുംബത്തിലെ കുഞ്ഞൻ പറവയായ പുള്ളി നത്താണ് (Spotted Owlet) നമ്മുടെ അതിഥി. മങ്ങിയ തവിട്ടുനിറമുള്ള ശരീരം നിറയെ ചെറുതും വലുതുമായ വെള്ളപ്പൊട്ടുകൾ. തൂവെള്ളയായ മുഖകവചത്തിൽ കണ്ണിന് മുകളിലായി പുരികസമാനമായ കട്ടികൂടിയ ചെറുതൂവലുകൾ. മഞ്ഞനിറത്തിൽ തീക്ഷ്ണമായി ജ്വലിക്കുന്ന ഗോളാകൃതിയിലുള്ള നേത്രങ്ങൾ. ചെവി പുറത്ത് കാണാനാവാത്തവിധം തൂവൽകൊണ്ട് പൊതിഞ്ഞ സൂക്ഷ്മ ശബ്ദം പോലും പിടിച്ചെടുക്കാൻ സഹായിക്കുന്ന ക്രമീകരണം. പരുന്തിന്റേതിന് സമാനമായ ബലിഷ്ഠമായ കുറിയ കാലുകൾ. ആകെക്കൂടി ഒരു ഓമൽ കൗതുകം!