ഭൂമിയിലെ ദേവലോകം

വെറുമൊരു ആരാധനാലയം മാത്രമല്ല കോട്ടയത്തെ ദേവലോകം പള്ളി. തരിസാപ്പള്ളി ശാസനം പോലെ ഇന്ത്യയിലെ ക്രൈസ്തവചരിത്രത്തിന്റെ ഭാഗമായിത്തീർന്ന പ്രധാന ഭരഖകളും ഇവിടെ സൂക്ഷിച്ചിരിക്കുന്നു

- P V SURAJ

സത്യക്രിസ്ത്യാനികളുടെ നാടായ കോട്ടയത്തെ മുട്ടമ്പലത്തിനടുത്തുള്ള കുന്നിൻമുകളിൽ വർഷങ്ങൾക്കു മുൻപ് ഒരു ബംഗ്ലാവ് ഉയർന്നു. കെട്ടിടം പണിത ആശാരി അതിന് ദേവലോകം എന്ന് പേരുവിളിച്ചു. കാലം പിന്നെയും മുന്നോട്ടു നീങ്ങി. മീനച്ചിലാറിലൂടെ ഒരുപാട് വെള്ളം ഒഴുകിപ്പോയി. 1953-ൽ ദേവലോകത്തിന്റെ മണ്ണിൽ ഒരു ചാപ്പൽ ഉയർന്നു. പോകപ്പോകെ വിശ്വാസികളു ടെ അഭയവും ആശയവുമായിത്തീർന്നു ആ പള്ളി. ദേവലോകം പള്ളി ഇന്ന് കോട്ടയത്തിന്റെ അഭിമാന മാണ്.

ഓട്ടോയിറങ്ങി വൻമരങ്ങൾ തണലിടുന്ന പാതയിലൂടെ ദേവലോകത്തേക്ക് പ്രവേശിച്ചു. വെറുമൊരു പള്ളിയല്ല ഇത്. ഇന്ത്യയിലെ ക്രൈസ്തവ ചരിത്രവുമായി ബന്ധപ്പെട്ട ചെപ്പേടുകളും ശാസനങ്ങളും തിരുശേഷിപ്പുകളും ഇവിടെ സൂക്ഷിച്ചിട്ടുണ്ട്. അല്പദൂരം മുന്നോട്ടുപോയപ്പോൾ വലതുവശത്തായി ചെറിയൊരു കെട്ടിടം കണ്ടു. ഇതാണ് പഴയ ദേവലോകം ബംഗ്ലാവ്. 1951 വരെ സഭയുടെ ആസ്ഥാനം കോട്ടയത്തെ പഴയ സെമിനാരിയായിരുന്നു. അതിനുശേഷം തിരു-കൊച്ചി ഹൈക്കോടതിയുടെ പ്രതികൂല വിധിപ്രകാരം ഓർത്തഡോക്സ്സഭയ്ക്ക് പുതിയ ആസ്ഥാനം കണ്ടെത്തേണ്ടിവന്നു. അങ്ങനെയാണ് ദേവലോകം സഭയുടെ പുണ്യഭൂമിയായി മാറിയത്. സഭാ മേലധ്യക്ഷനായിരുന്ന പരിശുദ്ധ ബസേലിയോസ് ഗീവർഗീസ് ദ്വിതീയൻ കാതോലിക്കാ ബാവയുടെ ദീർഘവീക്ഷണമായിരുന്നു ദേവലോകം എന്ന സഭാ ആസ്ഥാനം. കെ.സി. മാമ്മൻ മാപ്പിള, മാളിയേക്കൽ എം.സി. മാത്യു, ഉപ്പൂട്ടിൽ കുഞ്ഞച്ചൻ എന്നിവരുടെ നേതൃത്വത്തിലാണ് ദേവലോകം വാങ്ങുന്നതിന്റെ കാര്യങ്ങളെല്ലാം നടന്നത്. അങ്ങനെ ദേവലോകം ബംഗ്ലാവ്, ദേവലോകം അരമനയായി: പൗരസ്ത്യ കാതോലിക്കായുടെ ആസ്ഥാനമായി. ഇന്ന് ഈ കെട്ടിടത്തിൽ മാനേജരുടെ ഓഫീസും മെസ്സും പ്രവർത്തിക്കുന്നു.

കാഴ്ചകളും ചരിത്രവുമാണ് ദേവലോകത്തിലെത്തുന്ന വിശ്വാസികളെ കാത്തിരിക്കുന്നത്. ജപമാലയിലെ മുത്തുകൾപോലെ അവ പരസ്പരം കോർത്തിരിക്കുന്നു. ചരിത്രമറിയാതെ ഇവിടുത്തെ കാഴ്ചകളിലേക്ക് കടക്കാൻ കഴിയില്ല. ഇപ്പോഴത്തെ അരമന മാനേജർ ഫാദർ യാക്കോബ് തോമസ് പഴയ കഥകൾ പറഞ്ഞുതന്നു. മലങ്കര നസ്രാണികളുടെ ഉദയവും വളർച്ചയുമെല്ലാം ആ കഥകളിൽ തെളിഞ്ഞുനിന്നു.