സിതാരയുടെ ചിരികുടുംബം

മികച്ച ഗായികയ്ക്കുള്ള സംസ്ഥാന പുരസ്കാരം മൂന്നാംവട്ടവും സിതാരയ്ക്ക് സ്വന്തം. പാടിയ പാട്ടുകളോളം ഇമ്പം നിറഞ്ഞ ജീവിതത്തെപ്പറ്റി സൊറപറഞ്ഞ് സിതാരയ്ക്കൊപ്പം ഇത്തിരി നേരം...

- ഷിനില മാത്തോട്ടത്തിൽ

നിറഞ്ഞുചിരിച്ചും തമാശ പറഞ്ഞും കുടുകുടെ ചിരിപ്പിക്കുന്ന തമാശക്കാരിയാണ് കൂട്ടുകാർക്കും വീട്ടുകാർക്കും സിതാരയെന്ന സിത്തുമണി. “പുറത്തുനിന്ന് നോക്കുമ്പോൾ വളരെ അബ്നോർമൽ ആയിട്ടുള്ള ഒരു കുടുംബമാണ് ഞങ്ങളുടേത്. എപ്പോഴും ബഹളമായിരിക്കും. പുറത്തുള്ളതിനേക്കാൾ കുറച്ചുകൂടി അലമ്പാ ഞാൻ വീട്ടിൽ. പലരും വിചാരിക്കും ഞാൻ ഗൗരവക്കാരിയാണെന്ന്. പക്ഷേ നേരെ തിരിച്ചാ. വീട്ടിൽ എല്ലാവരും ഇങ്ങനെയാ. അമ്മയും അച്ഛനും കുട്ടികളും തമ്മിൽ സാധാരണഗതിയിൽ ഉണ്ടാകാനിടയുള്ള ബന്ധവും സംഭാഷണവുമൊന്നുമല്ല ഞങ്ങൾക്കിടയിൽ. എല്ലാം തുറന്നുപറയും. കൊച്ചുകുട്ടി മുതൽ മുത്തശ്ശി വരെയുള്ളവർ തമാശ പറഞ്ഞും കളിയാക്കിയും രസിച്ചു ജീവിക്കുന്നവരാണ്. എല്ലാവരോടും സൗഹൃദമുണ്ടാക്കുന്നതാണ് എനിക്കിഷ്ടം.''ചിരിക്കുടുംബത്തെക്കുറിച്ച് സിതാര പറഞ്ഞു തുടങ്ങി. കണ്ണിൽ കുസൃതിയൊളിപ്പിച്ച് ഇടയ്ക്ക് കുറിക്കുകൊള്ളുന്ന തഗ് ഡയലോഗുകൾ പറഞ്ഞ് ആശ്ചര്യച്ചിരിയുമായി മകൾ സായു (സാവൻ ഋതു) വും ഒപ്പം കൂടി. ഫോട്ടോഷൂട്ടിനായി ഒരുങ്ങി വന്ന സിതാരയെ നോക്കി അമ്മ സുന്ദരിയായിട്ടുണ്ടെന്ന് സായുവിന്റെ കമന്റ്. അവസരത്തിനൊത്തുള്ള സായുവിന്റെ പ്രോത്സാഹനം രസിക്കാറുണ്ടെന്ന് സിതാരയും.

സിതാരയിലെ കലാകാരിയെ ഉണർത്തി പറക്കാൻ വിട്ട കുടുംബത്തിന്റെ സംഗീതപാരമ്പര്യത്തെക്കുറിച്ച്...

സംഗീതത്തെ പ്രണയിക്കുന്ന കുടുംബമാണെന്റേത്. രണ്ടുതലമുറകൾ മുമ്പേ തുടങ്ങിയ പാട്ടുസ്നേഹം. മുത്തശ്ശന്റെ അച്ഛനും മുത്തശ്ശനുമൊക്കെ ഉപയോഗിച്ചിരുന്ന ഗ്രാമഫോണും ഹാർമോണിയവും ഇപ്പോഴും വീട്ടിലുണ്ട്. അച്ഛനും അച്ഛന്റെ സഹോദരിയും പാടും. പക്ഷേ, പ്രൊഫഷണൽ പാട്ടുകാർ ആരുമില്ല. കുട്ടിക്കാലം മുതലേ ഞാൻ നർത്തകിയും പാട്ടുകാരിയുമൊക്കെയാവണമെന്ന് അമ്മയ്ക്ക് വലിയ താത്പര്യമായിരുന്നു. നാലുവയസ്സിൽ കർണാടിക് മ്യൂസിക്കും ഭരതനാട്യവുമൊക്കെ പഠിപ്പിക്കാൻ ചേർത്തു. അതിലൊക്കെ താത്പര്യം കാണിച്ചതു കൊണ്ട് അമ്മയും അച്ഛനും എനിക്ക് നല്ല അധ്യാപകരെ കണ്ടെത്തിത്തന്നു. അതായിരുന്നു എന്റെ അടിത്തറയും ഭാഗ്യവും. കുഞ്ഞിലേ ഉറങ്ങും മുമ്പേ കട്ടിലിൽ ചാരിയിരുന്ന് ഓരോ ദിവസവും പഠിച്ച പാട്ടും അഭിനയവുമൊക്കെ അച്ഛനും അമ്മയും എന്നെക്കൊണ്ട് ചെയ്യിപ്പിക്കും. ഞാൻ സ്റ്റേജിലെന്ന പോലെ അവതരിപ്പിക്കും.