ജലജയുടെ സഞ്ചാരങ്ങൾ

ചരക്കുലോറിയോടിച്ച് പെരുമ്പാവൂരിൽ നിന്ന് കാശ്മീരിലേക്കൊരു പോക്ക്. മലമേടുകളും ഹെയർപിൻ വളവുകളും താണ്ടി 23 ദിവസം നീണ്ട ആ യാത്രയിൽ കോട്ടയം സ്വദേശി ജലജ കണ്ട കാഴ്ചകൾ...

- വി രാമകൃഷ്ണൻ

എറണാകുളത്തു നിന്ന് മലപ്പുറത്തേക്ക് 12,000 ലിറ്റർ ഇന്ധനം നിറച്ച ടാങ്കർ ലോറിയോടിച്ച് വാർത്തകളിൽ തിളങ്ങിയ ഡെലീഷ്യ ഡേവിസിനെ ആരും മറക്കാനിടയില്ല. ടാങ്കർ ലോറി ഡ്രൈവറായ അച്ഛനൊപ്പം കുട്ടിക്കാലത്ത് നടത്തിയ യാത്രകളാണ് ലോറി ഡ്രൈവറാകണമെന്ന ആഗ്രഹം ആ മിടുക്കിയിൽ വളർത്തിയത്. ഒരിക്കലും നിറവേറ്റാനാകാത്ത ആഗ്രഹങ്ങളാണ് തന്റേതെന്ന് സ്വയം വിധിയെഴുതി, റിസ്കെടുക്കാൻ മടി കാണിക്കുന്നവർക്ക് മുന്നിൽ പ്രചോദനമാകുകയായിരുന്നു ആ ഇരുപത്തിമൂന്നുകാരി. ഡെലീഷ്യയിൽനിന്ന് നാൽപതുകാരിയയായ ജലജയിലേക്കെത്തുമ്പോഴും സാഹസികതയ്ക്ക് ഒട്ടും കുറവ് വന്നിട്ടില്ലെന്ന് മനസ്സിലാകും. കോട്ടയം ഏറ്റുമാനൂർ സ്വദേശിനിയായ ജലജ പെരുമ്പാവൂരിൽനിന്ന് ചരക്കുലോറിയോടിച്ച് കാശ്മീർ വരെ പോയി മടങ്ങി വന്നതേയുള്ളൂ. പെണ്ണ് ലോറിയോടിക്കുകയോ?' എന്ന് അത്ഭുതത്തോടെ ചോദിക്കുകയും വിദേശരാജ്യത്തെ ഒരു സ്ത്രീ ഇതേകാര്യം ചെയ്താൽ കൈയടിക്കുകയും ചെയ്യുന്നവരുള്ള നാടല്ലേ നമ്മുടേത്? അതുകൊണ്ട് മറ്റുള്ളവരെന്ത് വിചാരിക്കുമെന്ന് തലപുകയ്ക്കുന്ന സ്ത്രീകളുടെ കൂട്ടത്തിൽ കൂടാൻ ഞാനില്ലേയെന്ന് പറഞ്ഞ് ഗിയറൊന്നു മാറ്റി ജലജ.

ഒത്തിരി യാദൃശ്ചികതൾ നിറഞ്ഞതായിരുന്നു ജലജയുടെ ഇതുവരെയുള്ള ജീവിതം. മുന്നിലേക്കെത്തിയ ആഗ്രഹങ്ങളെ കണ്ണും പൂട്ടി സഫലീകരിച്ചാണ് അവർ ജീവിതത്തിന് അർഥമുണ്ടാക്കുന്നത്.

സഫലമായ സ്വപ്നയാത്ര