ക്ലാ...ക്ലാ...ക്ലീ... ക്ലീ...മുറ്റത്തൊരു ചിറകടി

എഴുത്തും ചിത്രങ്ങളും ജീന അനൂപ് രാഗവിസ്താരം നടത്തുന്ന ചൂളക്കാക്കയും മാവൂ വാക്കേറ്റത്തിനൊരുങ്ങുന്ന ഇരട്ടവാലനും ഇണയോടൊത്ത് ഇരതേടുന്ന ചോലക്കുടുവനും ഉൾപ്പെടെ ഒരു പാട് കിളികൾ നമ്മുടെ ചുറ്റുവട്ടത്തുണ്ട്...

- എഴുത്തും ചിത്രങ്ങളും ജീന അനൂപ്

കോടമഞ്ഞിന്റെ തണുപ്പിൽ കുറച്ചു നേരം കൂടി ചുരുണ്ടുകൂടി  കിടക്കാമെന്നോർത്തു. പക്ഷേ, പിന്നാമ്പുറത്തെ പേരയിൽ ചൂളക്കാക്കയുടെ രാഗവിസ്താരം തുടങ്ങി. ആ സ്വരമാധുരി കേട്ടാൽ പിന്നെ പുതപ്പിനുള്ളിൽ ഒതുങ്ങാൻ തോന്നില്ല. ചാടിയെഴുന്നേറ്റ് ഏകാഗ്രമായ ആ സാധകം കേട്ടുനിന്നുപോകും. ഇടുക്കിയിലെ ഞങ്ങളുടെ വീടിന് ചുറ്റും പക്ഷികളേറെ എത്താറുണ്ട്. അവയ്ക്കായി കണ്ണും ക്യാമറയും തുറന്നുവെച്ച ചില പകലുകൾ സമ്മാനിച്ച കാഴ്ചകളിലേക്ക്...

ചൂളക്കാക്കയുടെ പാട്ട്

കിളികളുടെ പാട്ടുമത്സരത്തിൽ ഒന്നാം സ്ഥാനം ചൂളക്കാക്കയ്ക്കാണ് ( Malabar whistling thrush). ഇടയ്ക്കിടെ കശുദ്ധി വരുത്തി തെറ്റിപ്പോയെന്നു തോന്നുമ്പോലെ ഓർത്തെടുത്ത് നിർത്തിയിടത്തു നിന്ന് തുടങ്ങിയും മനുഷ്യരുടെ ചൂളമടി പോലെയാണ് ഇവന്റെ കച്ചേരി. പുലരികളിലും സന്ധ്യകളിലും കച്ചേരികൾക്ക് വേണ്ടി മാത്രമാണ് മരക്കൊമ്പുകളിൽ ഇരിക്കുന്നത്. അല്ലാത്തപ്പോൾ ഏലച്ചെടികൾക്കിടയിലോ മറ്റും ചെറുജീവികളെ തിന്ന് ചാടിനടക്കും. പശ്ചിമഘട്ടത്തിൽ ഇവനില്ലാത്ത, ഇവന്റെ പ്രഭാതഭേരി ഇല്ലാത്ത കാടകം ചിന്തിക്കാൻ വയ്യ.

കാട്ടൂഞ്ഞാലിയുടെ 'ഘ്രോം ഘ്രോം' 

പാറപ്പുറത്ത് ചിരട്ടയുരയ്ക്കുമ്പോലെ ഇടവിട്ടുള്ള "ഘ്രോം  ഘ്രോം വിളികൾ കേട്ടിട്ടുണ്ടോ? ശ്രവണസുഖമില്ലെങ്കിലും കാട്ടൂഞ്ഞാലി (white bellied-treepie) ചൂളക്കാക്കയുടെ ഉണർത്തുപാട്ടിൽ കൂട്ടുചേരും. ഓലഞ്ഞാലിയുടെ (rufous treepie) അടുത്ത ബന്ധുവാണ്. വെളുത്ത നിറവും വെള്ളത്തല പാവും നീണ്ട വാലും. കരിയിലക്കിളി, ഓലഞ്ഞാലി, മരംകൊത്തി, കാട്ടൂഞ്ഞാലി എന്നിവർ സംഘമായാണ് പലപ്പോഴും സഞ്ചാരം.