നല്ല കഥാപാത്രം കിട്ടിയാൽ തിരിച്ചുവരും

നല്ല കഥാപാത്രങ്ങളെ കാത്തിരിക്കുന്നു മലയാളിമനസ്സിലെ കുറുമ്പുകാരിയായ നായിക ദിവ്യ ഉണ്ണി

- അക്ഷര അർജുൻ

സിനിമ വിട്ടിട്ട് വർഷങ്ങളെറേക്കഴിഞ്ഞിട്ടും ദിവ്യ ഉണ്ണിയെ മലയാളിക്ക് മനസ്സിൽ നിന്ന് ഇറക്കിവിടാനാവുന്നില്ല. ഉസ്താദിന്റെ അനിയത്തി പപ്പി, ആകാശഗംഗയിലെ യക്ഷി... ഇന്നും മലയാളി മനസ്സിൽ നിറം മങ്ങാത്ത ഓർമകളും കഥാപാത്രങ്ങളുമേറെ. മടങ്ങിവരവ് ഒരു ഓർമപ്പെടുത്താലാവണം എന്ന ചിന്തയുമായി നല്ല കഥാപാത്രങ്ങൾക്കായുള്ള കാത്തിരിപ്പിലാണ് താരം.

കൊച്ചി ടു അമേരിക്ക...ദിവ്യ വല്ലാതെ മാറിയോ

ഒരുപാട് മാറാൻ എന്നെ ഞാൻ അനുവദിച്ചിട്ടില്ല എന്നതാണ് സത്യം. ഡ്രസ്സിങ്ങ് സ്റ്റൈലിൽ പോലും ഞാൻ മാറ്റം വരുത്താൻ ആഗ്രഹിച്ചിരുന്നില്ല. ഇന്ത്യൻ വസ്ത്രങ്ങളാണ് കൂടുതലും ധരിക്കാറ്. സാരിയോ ചുരിദാറോ ആയിരിക്കും വേഷം. അമ്മയുടെ ഭക്ഷണവും വിനായക പാലടയുമെല്ലാം മിസ്സ് ചെയ്യാറുണ്ട്. ഡാൻസുമായി ബന്ധപ്പെട്ടു നിൽക്കുന്നതു കൊണ്ടു തന്നെ എപ്പോഴും നാടുമായി ഒരു കണക്ഷൻ ഉണ്ടാകും. ഡാൻസ് സ്കൂളിൽ ചുരിദാറേ പാടുള്ളൂ എന്ന നിയമം ഞാനായിട്ട് കൊണ്ടുവന്നതാണ്. അപ്പോൾ ഞാൻ തന്നെ നിയമം തെറ്റിച്ചാലോ... അവിടെ അമ്പലങ്ങളുണ്ട്. ഞാൻ മിക്കപ്പോഴും അമ്പല പരിസരങ്ങളിലെവിടെയെങ്കിലും ഉണ്ടാകും..

നൃത്തവിദ്യാലയം എങ്ങനെ പോകുന്നു...

2003 ജനുവരിയിലാണ് അമേരിക്കയിലെ ഹൂസ്റ്റണിൽ "ശ്രീപാദം നൃത്തവിദ്യാലയം തുടങ്ങുന്നത്. പുതു വർഷത്തിൽ 20 വർഷം പൂർത്തിയായി. നമ്മുടെ നാടിന്റെ സംസ്കാരവുമായി അടുത്തു നിൽക്കുന്നതാണ് നൃത്തകലകൾ. അതുകൊണ്ടുതന്നെ സ്വന്തം നാട്ടിൽ ജീവിക്കുന്ന പോലൊരു പ്രതീതിയാണ് "ശ്രീപാദം' എനിക്ക് തരുന്നത്. ഇരുപതാം വാർഷികാഘോഷം ഗംഭീരമാക്കണമെന്ന് വിചാരിക്കുന്നു.

അഭിനേത്രി/നർത്തകി എങ്ങനെ അറിയപ്പെടാനാണ് ഇഷ്ടം?