ഓർമകൾ ചേർത്തുവെച്ചൊരു വീട്

ദേശാന്തരങ്ങളിലെ പഴമയുടെ പ്രൗഢി നിറച്ച ഒരു വീട്...

- ഷിനില മാത്തോട്ടത്തിൽ

മൂന്നരപ്പതിറ്റാണ്ടിനിടെ താണ്ടിയ ദേശങ്ങളിൽനിന്ന് മനസ്സിൽ പതിഞ്ഞ ഓർമകൾ ചേർത്തു വെച്ച് ഒരുക്കിയ വീട്. ഓരോ കോണിലും ഒതുക്കിവെച്ച് കുഞ്ഞുശില്പങ്ങൾപോലും ഓരോ അനുഭവങ്ങളുടെ ശകലങ്ങളാണ്. ഓർമകളുടെ മാധുര്യം നുണഞ്ഞ് മലാപ്പറമ്പ് റോയൽ മൾബറി ഫ്ളാറ്റിൽ സ്വന്തമായി രൂപകല്പന ചെയ്ത സ്വപ്നവീട്ടിലാണ് സുരേഷ് മേനോൻ എന്ന മുൻ മാധ്യമപ്രവർത്തകന്റെ പാർപ്പ്. ആന്റിക്കുകളും പെയിന്റിങ്ങുകളും പല രാജ്യങ്ങളുടെയും സംസ്കാരങ്ങളുടെയും പ്രതിനിധികളാണിവിടെ. അലങ്കാരപ്പണികളുള്ള തടികൊണ്ടു തീർത്ത മച്ചും രാജസ്ഥാനി സോഫയും പഴയകാല ഇറ്റാലിയൻ ചെസ് ബോർഡും ടെലിവിഷനോട് ചേർത്ത് പ്രത്യേക സ്ഥാനം കൊടുത്ത് നിരത്തിയ ആന്റിക് ശില്പങ്ങളുമൊക്കെയായി സിറ്റിങ് റൂം സമ്പന്നമാണ്. സിങ്കപ്പൂരിൽനിന്ന് വാങ്ങിയ ചെസ്സ് ബോർഡ് ചൂണ്ടിക്കാട്ടി സുരേഷ്മേനോൻ പറഞ്ഞു, “പാശ്ചാത്യസഞ്ചാരികൾ ധാരാളമെത്തുന്ന സിങ്കപ്പൂർ യൂറോപ്യൻ ആന്റിക്കുകൾ വാങ്ങാൻ ഏറ്റവും പറ്റിയ ഇടമാണ്.

തറയിൽ സ്പാനിഷ് ടെറാകോട്ട

സ്പെയിനിൽനിന്ന് ഇംപോർട്ട് ചെയ്ത ടെറാകോട്ട ടൈലുകളാണ് തറയിൽ. നാടൻ ടെറാകോട്ട ടൈൽ പോലെ വെള്ളം കുടിക്കില്ലെന്നതാണ് സ്പാനിഷ് ടൈലുകളുടെ പ്രത്യേകത. ഫുൾ കോട്ടിങ് ആയിട്ടാണ് വരുന്നത്. കേരളത്തിൽ ഇത് വാങ്ങാൻ കിട്ടും. ചുമരുകൾ മിനുസപ്പെടുത്തിയിട്ടില്ല. ഫ്രഞ്ച് ചർച്ചുകളും ബ്രിട്ടിഷ് പബ്ബുക ളും സന്ദർശിച്ചപ്പോൾ മനസ്സിൽ കയറി പറ്റിയ ഡിസൈനാണിതെന്ന് അദ്ദേഹം വിശദീകരിച്ചു. അടുക്കളയിലെ ചുമരിന് ബ്രിക്സ് നൽകിയിരിക്കുന്നു.

പെയിന്റിങ്ങുകൾ

കോഴിക്കോട്ടെ പ്രാദേശിക ചിത്രകാരന്റെ തൊട്ട് കലയുടെ നഗരിയായ പാരീസിൽ നിന്നുവരെ ശേഖരിച്ച പെയിന്റിങ്ങുകൾ... “ഓരോ രാജ്യത്തു പോകുമ്പോഴും ഓരോ പെയിന്റിങ് വാങ്ങണമെന്ന് എനിക്ക് നിർബന്ധമുണ്ടായിരുന്നു. പ്രത്യേകിച്ചും നഗ്നത പ്രകടിപ്പിക്കുന്ന ചിത്രങ്ങൾ. ആംസ്റ്റർഡാമിൽ നിന്നു വാങ്ങിയ ബാലെ പരിശീലനം കഴിഞ്ഞ് തളർന്നിരിക്കുന്ന പെൺകുട്ടികളുടെ ചിത്രമാണ് ബെഡ് റൂമുകളിലൊന്നിൽ വെച്ചത്. പാരീസി ന്റെ നോത്രദാം ചർച്ചിന്റെ മുന്നിൽ നിന്ന് വാങ്ങിയ പെയിന്റിങ്ങും ഇവിടെയുണ്ട്. ഓരോന്നും മനസ്സിന് സംതൃപ്തി തരുന്ന അനുഭവങ്ങളാണ്. '-സുരേഷ് പറഞ്ഞു.

മേശയാക്കിയ രാജസ്ഥാനി വാതിൽ