പമ്പാതീരത്തെ പള്ളിമേടയിൽ

രണ്ടുനൂറ്റാണ്ടിന്റെ ചരിത്രമുറങ്ങുന്ന എടത്വാ സെൻറ് ജോർജ് ഫൊറോനാ പള്ളി മേടപ്പെരുന്നാളിന് ഒരുങ്ങിനിൽക്കുകയാണ്

- ഷിനില മാത്തോട്ടത്തിൽ

പച്ചത്തുരുത്തുകളുടെ നാടായ കുട്ടനാട്ടിൽ പമ്പയാറിന്റെ തീരത്ത് വിശുദ്ധ ഗീവർഗീസ് സഹദായുടെ നാമത്തിൽ തലയെടുപ്പോടെ നിൽക്കുന്ന ദേവാലയം, എടത്വാ പള്ളി. മുത്തുക്കുടകളാൽ അലങ്കരിച്ച വഴിയിലൂടെ രണ്ടു നൂറ്റാണ്ടിന്റെ ചരിത്രമുറങ്ങുന്ന ദേവാലയത്തിലെത്തിയപ്പോൾ നട്ടുച്ചയിലും ആൾത്തിരക്കായിരുന്നു. മുനിഞ്ഞുകത്തുന്ന മെഴുകുതിരികളുമായി പ്രാർഥനയിൽ മുഴുകിയ വിശ്വാസികളും ഒപ്പം മധ്യകാല യുറോപ്യൻ ശൈലിയിൽ പണികഴിപ്പിച്ച ചരിത്രപ്രസിദ്ധമായ ആരാധനാലയം കാണാനെത്തിയ സഞ്ചാരികളുമായി പള്ളിയങ്കണം തിരക്കുപിടിച്ചു. പള്ളിയുടെ ഓഫീസിലേക്ക് കയറുന്നതിന് വശത്തായി ക്രമീകരിച്ച മുത്തുക്കുടകൾ വിശ്വാസികൾ നേർച്ചയായി നൽകിയതാണ്. ഏപ്രിൽ അവസാനം തുടങ്ങുന്ന പള്ളിപ്പെരുന്നാളിന് ചമയങ്ങളൊരുക്കുന്നതിന്റെ തിരക്കും പള്ളിയങ്കണത്തിൽ കണ്ടു.

തടിയിൽ തീർത്ത അൾത്താര

പൂർണമായും തടിയിൽ നിർമിച്ച് കൊത്തുപണികളാൽ മനോഹരമാക്കിയ എടത്വാ പള്ളിയുടെ അൾത്താര നിറങ്ങളാൽ സമ്പന്നമാണ്. പോർച്ചുഗീസ് ശൈലിയിലാണിത് പണികഴിപ്പിച്ചിരിക്കുന്നത്. അൾത്താ പുറത്ത് വലതുഭാഗത്തും ഇടതുഭാഗത്തുമായി ഗീവർഗീസ് പുണ്യാളന്റെ തിരുരൂപവും പിയാത്തയും പൊന്നിൻ ചിറകുള്ള മാലാഖമാരുടെ അകമ്പടിയോടെ ഒരുക്കിയിരിക്കുന്നു. പള്ളിക്കുള്ളിൽ ധാരാളം ശില്പങ്ങളും പൊന്നിൻകുരിശും വെള്ളിക്കുരിശുകളുമുണ്ട്. ഇതിൽ പലതും യൂറോപ്യൻ രാജ്യങ്ങളിൽനിന്ന് കൊണ്ടുവന്നതാണ്. വിശുദ്ധ ഗീവർഗീസ് സഹദായുടെ തിരുസ്വരൂപം വിദേശത്തുനിന്ന് ഇടപ്പള്ളി പള്ളിയിലേക്ക് കൊണ്ടുവന്നതായിരുന്നു. 1810-ൽ എടത്വാപള്ളിയുടെ തുടക്കക്കാലത്ത് ഇവിടേക്കായി ഒരു രൂപം ആവശ്യമായിരുന്നപ്പോൾ ഇടപ്പള്ളി പള്ളിയിൽനിന്ന് ഇങ്ങോട്ടു കൊണ്ടുവന്നുവെന്നാണ് വിശ്വാസം.