ഭാര്യയുടെ വാക്ക് വഴിത്തിരിവായി

വഴിത്തിരിവ് - പാഷാണം ഷാജി

- ഉമ ആനന്ദ്

പത്ത് മക്കളിൽ ഏഴാമനായി ജനനം. കൂട്ടിന് സഹോദരങ്ങൾക്കൊപ്പം കൊടിയ ദാരിദ്ര്യം മാത്രം. എങ്കിലും കലാഭിരുചി കൈമോശം വന്നില്ല. പഠനത്തിൽ പരാജയപ്പെട്ടെങ്കിലും പ്രണയത്തിൽ വിജയിച്ചു. ഒഒളിച്ചോട്ടം വഴി വിവാഹം. കുടുംബം പോറ്റാൻ പെയിന്റ് പണി ചെയ്യുമ്പോഴാണ് അവസരം തേടിവന്നത്. അത് തട്ടിക്കളഞ്ഞാൽ ആത്മഹത്യ ചെയ്യുമെന്ന് ഭാര്യ പറഞ്ഞത് ഒരു കലാകാരനും കിട്ടാത്ത അംഗീകാരമാണ്. തുടർ പ്രമുഖ ചാനലിൽ നിന്നും ക്ഷണം. അതോടെ നാടറിയുന്ന വട്ടപ്പേരും കിട്ടി. പാഷാണം ഷാജി. പിന്നിട്ട വഴികളും വഴിത്തിരിവുകളും സാജു എന്ന ഷാജി ഓർത്തെടുക്കുന്നു.

“കുഞ്ഞുനാൾ മുതലേ കലാരംഗത്തുള്ളവരെ കണ്ടാണ് ഞാൻ വളർന്നത്. അച്ഛൻ തങ്കപ്പനും അമ്മ മങ്കക്കും ഞങ്ങൾ പത്തുമക്കൾ. അതിൽ ഏഴാമനായിരുന്നു ഞാൻ. ജനിച്ചതും വളർന്നതും ഉദയം പേരൂരിൽ. പഠനം വീടിന് എതിരെയുള്ള എസ്.എൻ.ഡി.പി. സ്കൂളിലും. സ്കൂളിൽ പോകാനും പഠിക്കാനും ഞാൻ മഹാ മടിയനായിരുന്നു.

വർഷത്തിലൊരിക്കൽ സ്കൂളിൽ നടക്കുന്ന യൂത്ത് ഫെസ്റ്റിവൽ സമയത്തു മാത്രമാണ് ഒരുമാസം മുടങ്ങാതെ പോയിരുന്നത്. ചേട്ടനെ കണ്ട് പഠിച്ചു അഞ്ചാം ക്ലാസു മുതൽ എല്ലാ പരിപാടികൾക്കും പങ്കെടുത്തു തുടങ്ങി. മിമിക്രിയും മോണോ ആക്ട്മെല്ലാം എന്റെ ചേട്ടൻ സുരേഷ് ചെയ്യുന്നത് കണ്ടാണ് പഠിക്കുന്നത്. ചേട്ടൻ ഇക്കൊല്ലം അവതരിപ്പിച്ചാൽ ഞാനത് അടുത്തകൊല്ലം അവതരിപ്പിച്ചിരിക്കും. ചേട്ടൻ എല്ലാവർഷവും കലാപ്രതിഭയായിരുന്നു. യൂത്ത് ഫെസ്റ്റിവൽ സമയത്ത് ഞങ്ങളുടെ വീട്ടിലാണ് പരിപാടികളുടെ പരിശീലനം നടക്കുക. ഡാൻസും പാട്ടും നാടകവുമെല്ലാം വീട്ടിൽ അരങ്ങേറും. നാരങ്ങാവെള്ളം വാങ്ങിച്ചുകൊടുത്ത് പ്രോത്സാഹിപ്പിക്കാൻ അച്ഛനും കൂട്ടുകാർക്കൊപ്പമുണ്ടാകും. ഞാൻ പഠിപ്പിൽ ഉഴപ്പനായിരുന്നെങ്കിലും ടീച്ചർമാർക്ക് എന്നെ ഇഷ്ടമായിരുന്നു.