സഫലം ഈ ജീവിതം / സൗമ്യതയുടെ ആഘോഷം സപ്തതിയുടെ നിറവിൽ കെ. ജയകുമാർ

പാദമുദ്ര

- സജിൽ ശ്രീധർ

ഒക്ടോബർ 6- ന് 70 വയസ് പൂർത്തിയാക്കുകയാണ് മലയാളത്തിന്റെ അഭിമാനമായ കെ. ജയകുമാർ ഐ.എ.എസ്.

ചന്ദനലേപ സുഗന്ധം പൂശിയതാരോ  ... കാറ്റോ കാമിനിയോ'' ഒരു വടക്കൻ വീരഗാഥ എന്ന സിനിമയിലെ ഈ ഒറ്റ ഗാനം മതി കെ. ജയകുമാർ എന്ന ബഹുമുഖ പ്രതിഭയെ അടയാളപ്പെടുത്താൻ.

അധ്യാപകൻ, കവി, ഗാനരചയിതാവ്, ഐ.എ.എസ്. ഉദ്യോഗസ്ഥൻ, വിദ്യാഭ്യാസ വിചക്ഷണൻ, ചിത്രകാരൻ, വിവർത്തകൻ, തിരക്കഥാകൃത്ത്, ചലച്ചിത്ര സംവിധായകൻ. അദ്ദേഹത്തിന്റെ കർമ്മകാണ്ഡം അനന്തമായി നീളുന്നു.

ഏതൊരു വ്യക്തിയെയും നാം തിരിച്ചറിയുന്നത് അവരുടേത് മാത്രമെന്ന് പറയാവുന്ന ചില സവിശേഷതകളുടെ പേരിലാണ്. കെ. ജയകുമാറിനും അത്തരം നിരവധി പ്രത്യേകതകളുണ്ട്. ബഹുമുഖമായ കഴിവുകൾ മാത്രമല്ല ഇവിടെ വിവക്ഷ. അതിനുമപ്പുറം അദ്ദേഹത്തെ കൂടുതൽ സമാദരണീയനാക്കുന്നത്  ഏത് മേഖലയിൽ പ്രവർത്തിക്കുമ്പോഴും അദ്ദേഹം സ്വീകരിച്ച മൂല്യാധിഷ്ഠിത സമീപനങ്ങളാണ്.

കലക്ടർ പദവി മുതൽ ചീഫ് സെക്രട്ടറി സ്ഥാനം വരെ അലങ്കരിച്ച ഒരു ഉദ്യോഗസ്ഥൻ. പല സ്വഭാവമുളള സർക്കാരുകൾ മാറി മാറി ഭരിച്ച കാലഘട്ടങ്ങളിലൊക്കെ അദ്ദേഹം സർവീസിലുണ്ടായിരുന്നു. എന്നാൽ ഒരിക്കൽ പോലും ഏതെങ്കിലും തരത്തിലുളള ആരോപണങ്ങളുടെയോ, ആക്ഷേപങ്ങളുടെയോ ഭാഗമായി അദ്ദേഹത്തിന്റെ പേര് ഉയർന്നു വന്നില്ല. അതിനൊക്കെയപ്പുറം അദ്ദേഹം കൈക്കൊണ്ട് ആദർശാത്മകമായ സമീപനങ്ങൾ എക്കാലവും വിളളൽ വീഴാതെ ആ പ്രതിച്ഛായ നില നിർത്താൻ സഹായകമായി. തുഞ്ചത്തൻ സർവകലാശാലയുടെ പ്രഥല വൈസ് ചാൻസലർ പദവി വഹിച്ചിരുന്ന സന്ദർഭത്തിലും സമാനമായിരുന്നു സ്ഥിതി.

ഒരു നടപടികളിലും പ്രവർത്തനങ്ങളിലും വെളളം ചേർക്കാതെ സംശുദ്ധത എന്ന പദത്തിന് അർത്ഥവും ആഴവും നൽകിക്കൊണ്ട് അദ്ദേഹം സ്വന്തം കർമ്മപഥം ശ്രേഷ്ഠമാക്കി.

കേരളത്തിൽ ടൂറിസം വകുപ്പ് കൂടുതൽ ചലനാത്മകവും സജീവവുമായത് അദ്ദേ ഹം ഡയറക്ടറായിരുന്ന കാലത്താണ് എന്നത് ഒരു ചരിത്ര യാഥാർത്ഥ്യമാണ്. ഇന്ന് ഏറെ പ്രശസ്തമായ ദൈവത്തിന്റെ സ്വന്തം നാട് എന്ന കാപ്ഷന്റെ ഉപജ്ഞാതാവും വാസ്തവത്തിൽ കെ. ജയകുമാറായിരുന്നു എന്നത് അധികമാർക്കും അറിയാത്ത സത്യം.