സമവായത്തിന്റെയും നയചതുരതയുടെയും രാജശിൽപ്പി

രാഷ്ട്രീയത്തിൽ പൂർവമാതൃകകളില്ലാത്ത സവിശേഷ വ്യക്തിത്വത്തി ന് ഉടയായിരുന്നു അന്തരിച്ച സി.പി.എം. നേതാവ് കോടിയേരി ബാലകൃഷ്ണൻ

- സജിൽ ശ്രീധർ 

വ്യക്തിത്വപരമായ സവിശേഷതകളിലൂടെയാണ് നാം ഓരോരുത്തരെയും വിലയിരുത്തുന്നത്. അങ്ങനെ നോക്കിയാൽ പൊതുസമാനതകൾ ഏറെയുള്ള ആൾക്കൂട്ട രാഷ്ട്രീയത്തിൽ നിന്ന് തീർത്തും വേറിട്ട് നിൽക്കുന്ന നേതാവായിരുന്നു കൊടിയേരി.

ഒരു പൊതുപ്രവർത്തകൻ പാലിക്കേണ്ട സാമാന്യവും അടിസ്ഥാനപരവുമായ പെരുമാറ്റ രീതികളെ സംബന്ധിച്ചും നിലപാടുകളെ സംബന്ധിച്ചുമുള്ള പാഠ പുസ്തകം.

ആരെയും പിണക്കാതെ എല്ലാ വിഭാഗത്തെയും യോജിപ്പിച്ച് നിർത്തി പാർട്ടിയുടെ അടിത്തറ വിപുലീകരിക്കുക എന്നതായിരുന്നു അദ്ദേഹത്തിന്റെ രീതി.

പാർട്ടിയിൽ കടുത്ത വിഭാഗീയതയും ആഭ്യന്തര പ്രശ്നങ്ങളും കൊടികുത്തി വാഴുന്ന കാലത്തും അതെല്ലാം രമ്യമായി പരിഹരിക്കാനുളള ചുമതല എന്നും കൊടിയേരിക്കായിരുന്നു. മറ്റുള്ളവർ എത്ര തന്നെ പ്രകോപനപരമായ സാഹചര്യം സൃഷ്ടിച്ചാലും അവരെക്കുറിച്ച് കടുത്ത പദപ്രയോഗങ്ങൾ ഒഴിവാക്കാൻ അദ്ദേഹം ശ്രദ്ധിച്ചിരുന്നു. ആരെയും വ്യക്തിപരമായി ആക്രമിക്കാനോ, വേദനിപ്പിക്കാനോ അദ്ദേഹം തയ്യാറായില്ല. അതേ സമയം പാർട്ടി നിലപാടുകളും വ്യക്തിപരമായ അഭിപ്രായങ്ങളും വളരെ ശക്തവും ദൃഢവുമായി പ്രകടിപ്പിക്കാനും കൊടിയേരി മറന്നില്ല.

വിശാലമായ കാഴ്ചപ്പാട്

പൊതു സമൂഹത്തെക്കുറിച്ചുളള അദ്ദേഹത്തിന്റെ സങ്കൽപ്പം വളരെ വിശാലമായിരുന്നു. നമുക്കറിയാം വലിയ ജനകീയതയും വിശാലവീക്ഷണവും അവകാശപ്പെടുന്ന പല നേതാക്കളും അതീവരഹസ്യമായിട്ടെങ്കിലും ഏതെങ്കിലും ഒരു സമുദായത്തിന്റെയോ, മതത്തിന്റെയോ, വിഭാഗത്തിന്റെയോ ഒക്കെ താത്പര്യങ്ങൾ സംരക്ഷിക്കുന്നവരാവും. ഇത്തരം നിക്ഷിപ്തതാത്പര്യങ്ങൾ എക്കാലവും രാഷ്ട്രീയക്കാരുടെ സമീപനത്തിന്റെ ഭാഗമാണ്. ഇവിടയും കൊടിയേരി ഏറെ വ്യത്യസ്തനാണ്. അദ്ദേഹം ആരുടെയും സ്വന്തമായിരുന്നില്ല. അതേസമയം എല്ലാവരുടേതുമായിരുന്നു. എൻ.എസ്.എസ്. അടകമുളള സംഘടകളുടെ ആവശ്യങ്ങൾക്കും ആവലാതികൾക്കും കാതോർക്കുന്ന കൊടിയേരി എസ്.എൻ.ഡി.പി. യോഗത്തോടും വളരെ സൗഹൃദപൂർണ്ണമായ സമീപനമാണ് സ്വീകരിച്ചിട്ടുള ളത്.

ക്രൈസ്തവസഭകളുടെ യും മുസ്ലീം സംഘടനകളുടെയും പ്രശ്നങ്ങൾ വരുമ്പോൾ അതെല്ലാം ക്ഷമാപൂർവം കേൾക്കാനും ന്യായമായ ആവശ്യങ്ങൾ നടത്തികൊടുക്കാനും എന്നും അദ്ദേഹം ശുഷ്കാന്തി കാണിച്ചു. എല്ലാ അർത്ഥത്തിലും സമഭാവന പുലർത്തിയ സോഷ്യലിസ്റ്റായിരുന്നു അദ്ദേഹം. സമവായത്തിന്റെയും നയതന്തതയുടെയും കാര്യത്തിൽ കൊടിയേരിയെ വെല്ലാൻ കേരള രാഷ്ട്രീയത്തിൽ മറ്റൊരു നേതാവില്ല.