ഇന്ത്യയുടെ മകനും ബ്രിട്ടന്റെ മനസും...

ഇന്ത്യൻ വംശജനായ ഋഷി സുനക്ക് ബ്രിട്ടന്റെ പരമോന്നത അധികാരപീഠത്തിൽ അവരോധിതനാകുമ്പോൾ ചരിത്രം കൗതുകത്തോടെ മന്ദസ്മിതം തൂവുകയാണ്.

- സജിൽ ശ്രീധർ

ഋഷി സുനക്ക് ബ്രിട്ടന്റെ അധികാരസോപാനത്തിൽ എത്തുന്ന ഏറ്റവും പ്രായം കുറഞ്ഞ ആളാണ്. കൃത്യമായി പറഞ്ഞാൽ യുവത്വത്തിന്റെ പ്രസരിപ്പ് ഇനിയും വിട്ടുമാറാത്ത ഒരു 42 കാരൻ. ആ മുഖത്തും ശരീരഭാഷയിലും അസാധാരണമായ ഊർജ്ജത്തിന്റെയും കർമ്മോത്സുകതയുടെയും തിളക്കമുണ്ട്. അതുകൊണ്ട് തന്നെയാവാം ബ്രിട്ടൻ വംശജരായ നിരവധി പേരുണ്ടായിട്ടും ഇരുനൂറോളം എം.പി.മാരുടെ പിൻതുണയും പാർട്ടിയുടെ ഏകകണ്ഠമായ തീരുമാനവും ഋഷി സുനക്ക് എന്ന ഏകപേരിൽ എത്തിച്ചേർന്നത്.

ഇന്ത്യയ്ക്ക് എല്ലാ അർത്ഥത്തിലും അഭിമാനിക്കാം.

കാരണം മനോജ് നൈറ്റ് ശ്യാമളൻ അടക്കം നാം അറിയുന്ന ഇന്ത്യൻ വംശജരായ വിശ്വപൗരന്മാരുടെയൊക്കെ പൂർവീകർ ഇന്ത്യക്കാരായിരുന്നു എന്നതിനപ്പുറം അവരൊക്കെ ജനിച്ച തും വളർന്നതും വിദേശത്താണ്. അവർ പിൻതുടരുന്ന ജീവിതശൈലിയും ദർശനങ്ങളും പോലും പാശ്ചാത്യമാണ്. അവർ ജീവിതപങ്കാളിളെ കണ്ടെത്തിയത് പോലും യൂറോപ്പിൽ നിന്നാണ്. എന്നാൽ സുനക്കിന്റെ സ്ഥിതി അതല്ല. അദ്ദേഹം ഇംഗ്ലണ്ടിലെ സൗത്ത് ആംപ്റ്റണിൽ ജനിച്ച് പഠിച്ചതും വളർന്നതുമെല്ലാം വിദേശത്താണെങ്കിലും ഇന്ത്യൻ മൂല്യങ്ങളിൽ മുറുകെ പിടിച്ച് ജീവിക്കുന്ന വ്യക്തിയാണ്. പഞ്ചാബ് സ്വദേശിയാണെങ്കിലും ഹിന്ദുമതവിശ്വാസിയായ സുനക്ക് ബ്രിട്ടീഷ് പാർലമെന്റ് അംഗമായി സത്യപ്രതിജ്ഞ ചെയ്തത് ഭഗവത് ഗീതയിൽ തൊട്ടാണ്. അദ്ദേഹം വിവാഹം കഴിച്ചിരിക്കുന്നത്. ഇൻഫോസിസ് സ്ഥാപകൻ നാരായണമൂർത്തിയുടെ മകൾ അക്ഷിതയെ ആണ്.

ബ്രിസ്റ്റോൾ നോർത്ത് മേയറായിരുന്ന ടോം ആദിത്യ അടക്കമുളള പ്രവാസി ഇന്ത്യാക്കാർ അദ്ദേഹത്തിന്റെ അടുത്ത സുഹൃത്തുക്കളാണ്. ഇടയ്ക്കൊക്കെ ഇന്ത്യ സന്ദർശിക്കാനും ഇവിടെ വന്ന് താമസിക്കാനും ഇത്രയും തിരക്കേറിയ ജീവിതത്തിനിടയിൽ അദ്ദേഹം സമയം കണ്ടെത്താറുണ്ട്.