മൂല്യാധിഷ്ഠിത നിലപാടുകളുടെ തോഴൻ

പാദമുദ്ര

- സജിൽ ശ്രീധർ

ഇടതുപക്ഷ രാഷ്ട്രീയം സൈദ്ധാന്തികമായ അടിത്തറയിൽ നിലകൊളളുന്ന ഒന്നാണ്. പ്രായോഗിക രാഷ്ട്രീയ സാധ്യതകൾ ഉൾക്കൊള്ളുമ്പോഴും പ്രത്യയശാസ്ത്രപരമായ അടിസ്ഥാന ഘടകങ്ങളെ നിരാകരിക്കാൻ അതിന് സാധ്യമല്ല. കാരണം അടിസ്ഥാനവർഗത്തിന്റെ ഉന്നതി ലക്ഷ്യമാക്കി മാർക്സും ഏംഗൽസും അടക്കമുളള താത്ത്വികാചാര്യൻമാർ വിഭാവനം ചെയ്ത പ്രസ്ഥാനമാണത്. അതുകൊണ്ട് തന്നെ കാലാകാലങ്ങളിൽ അത് സ്വീകരിക്കുന്ന നിലപാടുകളെ സൈദ്ധാന്തികമായി വ്യാഖ്യാനിക്കാനും വിശദീകരിക്കാനും ജനസമക്ഷം ബോധ്യപ്പെടുത്താനുമുള്ള ബാധ്യത അതിന്റെ അധിനായകന്മാർക്കുണ്ട്. ഒരു കാലത്ത് ഇ.എം.എസും പിന്നീട് പി.ഗോവിന്ദപ്പിള്ളയും അടക്കമുളള മാർക്സിസ്റ്റ് താത്ത്വികാചാര്യൻമാർ നിർ വഹിച്ചു പോന്ന ഈ ദൗത്യം പിന്നീട് നിർവഹിക്കാൻ പാകത്തിലുളള ആളുകളുടെ അഭാവം ഇന്നും നികത്താനാവാത്ത വിടവാണ്.

എന്നാൽ പ്രായോഗിക രാഷ്ട്രീയത്തിന്റെ വക്താക്കളായ നേതാക്കൾക്ക് പോലും പാർട്ടി നിലപാടുകളെ സിദ്ധാതപരമായ അടിത്തറയിൽ നിന്ന് വിശദീകരിക്കേണ്ടതായി വരും. ഇതിന് അവരെ പ്രാപ്തരാക്കാൻ സുശിക്ഷിതമായ മാർഗനിർദേശങ്ങൾ അനിവാര്യമാണ്.

പാർട്ടി ക്ലാസുകൾ എന്ന് വിവക്ഷിക്കപ്പെടുന്ന സാധാരണ പഠനശിബിരങ്ങൾക്കപ്പുറത്ത് പലപടികൾ കടന്ന് ഉയർന്നു നിൽക്കുന്ന ഇത്തരം ബോധവത്കരണവും മാർഗനിർദേശങ്ങളും നൽകാൻ പരിണിതപ്രജ്ഞർക്ക് മാത്രമേ കഴിയൂ. ആ തലത്തിൽ ഇന്ന് ഇടതു പക്ഷ രാഷ്ട്രീയത്തിന്റെ അണിയറയിൽ സ്തുത്യർഹമായ സേവനം അനുഷ്ഠിക്കുന്ന മഹത് വ്യക്തിത്വങ്ങളിലൊരാളാണ് അദ്ധ്യാപകനും വിദ്യാഭ്യാസവിചക്ഷണനും ഗ്രന്ഥകാരനുമെല്ലാമായ പ്രൊഫ. വി. കാർത്തികേയൻ നായർ.