കാലത്തിൽ കൊത്തിയ പ്രതിഭ

സപ്തതി പിന്നിടുന്ന പ്രമുഖ ചലച്ചിത്ര നി രൂപകനും സംവിധായകനും നോവലിസ്റ്റു മായ വിജയകൃഷ്ണൻ എഴുത്തിന്റെ വിവിധ മേഖലകളിലായി അൻപതോളം പുസ്തകങ്ങൾ പ്രസിദ്ധീകരിച്ചിട്ടുണ്ട്.

- സജിൽ ശ്രീധർ

മലയാള ചലച്ചിത്ര നിരൂപണ ശാഖ സജീവമെങ്കിലും പൂർണ്ണമായ അർത്ഥത്തിൽ സമ്പന്നമെന്ന് പറയാനാവില്ല. കോഴിക്കോടനിലും സിനിക്കിലും തുടങ്ങിയ ചലച്ചിത്രനിരൂപണം അനേകം കൈവഴികൾ പിന്നിട്ടാണ് ഇന്ന് കാണുന്ന തലത്തിലെത്തി നിൽക്കുന്നത്. ആദ്യകാലങ്ങളിൽ കേവലം സിനിമാസ്വാദനത്തിലും ചലച്ചിത്ര പരിചയത്തിലും ഒതുങ്ങി നിന്നിരുന്നു നിരൂപണം. പുസ്തകപരിചയം പോലെ തീർത്തും ഉപരിപ്ലവസ്വഭാവം പേറുന്നവയായിരുന്നു പല രചനകളും. സിനിമ കാണുന്നവർക്ക് ഒരു മാർഗദർശി എന്നതിനപുറം വ്യാപ്തിയുള്ള ദൗത്യങ്ങളൊന്നും നിർവഹിക്കാൻ ഇത്തരം കുറിപ്പുകൾക്ക് കെൽപ്പുണ്ടായിരുന്നില്ല. ആ പതിപ്പുകളിലെ പ്രതിവാര പംക്തിക്കപ്പുറം പുസ്തകരൂപത്തിൽ സമാഹരിക്കാനോ വരും തലമുറകൾക്കായി കാത്തുവയ്ക്കാനോ പര്യാപ്തമായിരുന്നില്ല. അന്നത്തെ സിനിമാ നിരൂപണങ്ങളിൽ ഏറിയ പങ്കും. അപൂർവം ചില ഗ്രന്ഥങ്ങൾ മാത്രമാണ്  ഈ  ജനുസിൽ പുറത്തിറങ്ങിയിരുന്നത്. സിനിക്കിന്റെയും മറ്റും ചില കൃതികൾ പെട്ടെന്ന് ഓർമ്മ വരുന്നു. ഇന്ന് സി.എസ്.വെങ്കിടേശ്വരനെ പോലെ നവഭാവുകത്വം പേറുന്ന ഒന്നാം നിര നിരൂപകരാൽ സമ്പന്നമാണ് ഈ മേഖല. എന്നാൽ മലയാള ചലച്ചിത്രനിരൂപണശാഖയ്ക്ക് ഇന്ന് കാണുന്ന തലത്തിൽ ആഴവും പരപ്പും അഭിജാതമായ മുഖവും സമ്മാനിച്ചവരിൽ പ്രഥമഗണനീയൻ വിജയകൃഷ്ണനാണെന്ന് പറഞ്ഞാൽ ആർക്കും നിഷേധിക്കാൻ കഴിയുമെന്ന് തോന്നുന്നില്ല. അത്രത്തോളം നിർണ്ണായകമാണ് അദ്ദേഹത്തിന്റെ സംഭാവനകൾ.

മികച്ച ചലച്ചിത്ര ഗ്രന്ഥത്തിനുള്ള സംസ്ഥാന പുരസ്കാരവും ദേശീയ പുരസ്കാരവും നേടിയ ഒരേയൊരു നിരൂപകനും അദ്ദേഹമാണ്.