സംഗീതം തന്നെ ജീവിതം

മൂന്ന് പതിറ്റാണ്ടുകളായി സംഗീത വിദ്യാലയം നടത്തുന്ന അസാധരണ പ്രതിഭയായ മാതംഗി സത്യ മൂർത്തി തന്റെ സംഗീത ജീവിതത്തിലെ നാൾവഴികൾ ഓർത്തെടുക്കുന്നു.

- ഉമ ആനന്ദ്

സംഗീതം ജൻമസിദ്ധമായ ഒരു വരദാനമാണ്. അത് ലഭിച്ചവരുടെ ജീവിതം സംഗീതത്തിന് വേണ്ടി മാത്രമായിരിക്കും.

ആദരവോ, അംഗീകാരമോ ഒന്നും അവരെ പ്രലോഭിപ്പിക്കാറില്ല. സംഗീതത്തെ പ്രാണവായു പോലെ അവർ കൊണ്ടു നടക്കും. സംഗീതവും ഈശ്വരനും രണ്ടല്ല ഒന്നാണന്ന ബോദ്ധ്യമാണ് അവരുടെ ദർശനം.

മേൽപ്പറഞ്ഞ ഗണത്തിൽ നിസ്സംശയം ഉൾപ്പെടുത്താവുന്ന സംഗീതജ്ഞയാണ് മാതംഗി സത്യമൂർത്തി.

നാലാം ക്ളാസ് മുതൽ സംഗീതം അഭ്യസിച്ചു തുടങ്ങി ബി.എ. ക്ക് പഠിക്കുമ്പോൾ അരങ്ങേറ്റം നടത്തിയ ആദ്യമായി കിട്ടിയ പ്രതിഫലം ഗുരുവിന് ദക്ഷിണയായി നൽകിയ കേരളത്തിലങ്ങോളമിങ്ങോളം കച്ചേരി നടത്തിയ മൂന്ന് പതിറ്റാണ്ടുകളായി സംഗീത വിദ്യാലയം നടത്തുന്ന അസാധരണ പ്രതിഭയായ മാതംഗി സത്യ മൂർത്തി തന്റെ സംഗീത ജീവിതത്തിലെ നാൾവഴികൾ ഓർത്തെടുക്കുന്നു.

“ഞാൻ ജനിച്ചു വളർന്നത് ട്രിച്ചി ജില്ലയിലെ തൊറയൂർ ഗ്രാമത്തിൽ. അച്ഛൻ സുബ്രഹ്മണ്യം അമ്മ ശാന്ത. ഒൻപതു മക്കളിൽ അഞ്ചാമത്തെ കുട്ടിയായിരുന്നു ഞാൻ. എനിക്ക് പലപ്പോഴും ഞാൻ സംഗീത ലോകത്തേക്ക് കടന്ന വഴികളോർത്ത് അത്ഭുതം തോന്നിയിട്ടുണ്ട്. അച്ഛന്റെ ജോലി സംബന്ധമായി അച്ഛനും അമ്മയും മധുരയിലേക്ക് പോയപ്പോൾ ഞാൻ മുത്തശ്ശന്റെയും മുത്തശ്ശിയുടെയും കൂടെ തിരുവാണിക്കോവിലിലെ അയ്യൻ തെരുവിലെ വീട്ടിലാണ് വളർന്നത്. ഭക്തിയും ആചാരങ്ങളും ജീവിതത്തിൽ പകർത്തുന്നവരായിരുന്നു മുത്തശ്ശനും മുത്തശ്ശിയും. നാലാം ക്ലാസിൽ പഠിക്കുമ്പോഴാണ് ആദ്യമായി സംഗീതം പഠിക്കാൻ പോയത്. ഗുരുവിന്റെ പേര് മധുരം. അപ്പോഴേക്കും അച്ഛനും അമ്മയുമെല്ലാം ട്രിച്ചിയിലേക്ക് എത്തിയിരുന്നു. പാട്ട് പഠിക്കാൻ അനുജത്തി മധുമതിയും ഒപ്പമുണ്ട്. പക്ഷേ, അന്ന് ഒരിക്കലും സംഗീതത്തെ ഗൗരവമായി കണ്ടിരുന്നില്ല.