കുടുംബസദസ്സിലെ ‘ശ്രീലക്ഷ്മി

നിഷ്കളങ്കമായി പുഞ്ചിരിച്ചുകൊണ്ട് കുടുംബസദസ്സുകളി ലേക്ക് കയറി വന്ന ശ്രീലക്ഷ്മിയെ നമുക്ക് മറക്കാതിരിക്കാം.

- നാസർ മുഹമ്മദ്

ഒരു കളങ്കവുമറിയാത്ത ഒരു പാവം നാട്ടിൻ പുറത്തുകാരിയാണ് ശ്രീലക്ഷ്മി. അച്ഛനേയും അമ്മയേയും സ്നേഹിച്ച്, അവർ പറയുന്നത് അനുസരിച്ച് ജീവിക്കുന്ന ഒരു സാധുവായ പെൺകുട്ടി. ഒരിക്കൽ അവളുടെ മനസ്സിൽ അവൾ അറിയാതെ പ്രണയമാണോ എന്നറിയില്ല, ഇഷ്ടമാണ് അവൾക്ക് അവളുടെ ബോസിനെ. അവിടെ പ്രായത്തിന് അവൾ ഒരു വിലയും കൽപ്പിച്ചില്ല. മിനിസ്ക്രീൻ പ്രേക്ഷകരുടെ ഇടയിൽ ഏറെ ശ്രദ്ധ നേടിയ "നീയും ഞാനും' എന്ന പരമ്പരയിലെ ശ്രീലക്ഷ്മി എന്ന കഥാപാത്രത്തിന് ജീവൻ നൽകിയ സുസ്മിത തന്റെ വിശേഷങ്ങൾ "മഹിളാരത്നം' വായനക്കാരുമായി പങ്കുവയ്ക്കുകയാണ്.

കണ്ണന്റെ നാട്ടുകാരി

ഗുരുവായൂരാണ് സ്വദേശം. വടക്കേപുരയ്ക്കൽ പ്രഭാകരന്റേയും സുജാതയുടേയും രണ്ട് മക്കളിൽ ഇളയവൾ. ചേട്ടൻ സൂരജ് ബംഗളുരുവിൽ ജോലി ചെയ്യുന്നു. പാവറട്ടിയിലും തൊഴിയൂരുമായിരുന്നു സ്കൂൾ പഠനം. ഗുരുവായൂർ ആര്യഭട്ട കോളേജിൽ നിന്ന് ബിരുദവും സ്വന്തമാക്കി എം.ബി.എയ്ക്ക് ശേഷമാണ് എന്റെ വഴി അഭിനയമാണെന്ന് തിരിച്ചറിയുന്നത്. ഒരുപാട് കഷ്ടപ്പെട്ടിട്ടാണ് എന്റെ അച്ഛൻ എന്നെ പഠിപ്പിച്ചത്. കണ്ണന്റെ നാട്ടിൽ ജനിച്ചുവളർന്നത് ഒരു ഭാഗ്യമായി കരുതുന്നു. വീട്ടിൽ നിന്ന് പോയാൽ എനിക്ക് ഗുരുവായൂരപ്പനെ കാണാം. അതുകൊണ്ട് തന്നെ എന്റെ എല്ലാ സങ്കടങ്ങളും സന്തോഷങ്ങളും ഞാൻ കുഞ്ഞുന്നാളിലേ കണ്ണനോട് പങ്കുവച്ച് തുടങ്ങി. അച്ഛൻ സംസ്കൃത കോളേജിൽ കുറച്ചുനാൾ ജോലി ചെയ്തു. അതിനുശേഷം വിദേശത്തേയ്ക്ക് പോയി. അച്ഛൻ ഇപ്പോൾ നാട്ടിൽ തന്നെയാണ്. വീട്ടിലെ കാര്യങ്ങളും ഞങ്ങളുടെ കുടുംബക്ഷേത്രത്തിലെ കാര്യങ്ങളും നോക്കി നടത്തുന്നു. വീടിനടുത്തു തന്നെയാണ് കുടുംബങ്ങളെല്ലാം. അതുകൊണ്ട് കൂട്ടുകാരെന്ന് പറയാൻ എനിക്ക് കസിൻസേയുള്ള കൂടുതലും. അതിൽ വിദ്യാർത്ഥികളായ അശ്വതിയും അഭിഷേകുമാണ്. എനിക്കായി സോഷ്യൽമീഡിയയിൽ സജീവമാകുന്നത്. ഇവരാണ് എന്റെ ഇപ്പോഴത്തെ ഗുരുക്കന്മാർ. ചിരി ച്ചുകൊണ്ട് സുസ്മിത പറഞ്ഞു.

മനസ്സിൽ ഉദിച്ച മോഹം