ആ ഒരുത്തി ഇതാ ഇവിടെയുണ്ട്...

“എന്റെ ജീവിതം, എന്റെ അനുഭവം ഇതൊക്കെ സിനിമയായി മാറുന്നു എന്നറിഞ്ഞപ്പോൾ ആദ്യമെനിക്ക് വിശ്വസിക്കാനേ കഴിഞ്ഞില്ല

- തയ്യാറാക്കിയത്: പ്രദീപ് ഉഷസ്സ്

കഴുത്തിൽ കിടന്ന മാല, നൊടിയിടയിൽ തട്ടിപ്പറിച്ച് ബൈക്കിൽ കുതിക്കുന്ന കള്ളനെ, നവ്യാനായർ തന്റെ ആക്ടീവയിൽ പിന്തുടരുമ്പോൾ, സുൽത്താൻ ബത്തേരിയിലെ അതുല്യ തീയേറ്ററിലെ നേർത്ത ഇരുട്ടിൽ, നിറഞ്ഞൊഴുകുന്ന കണ്ണുകൾ ആരുമറിയാതെ തുടയ്ക്കാൻ പാടുപെടുകയായിരുന്നു സൗമ്യയെന്ന ആ വീട്ടമ്മ...കാരണം, ഏവരും ആകാംക്ഷാപൂർവ്വം കണ്ടിരിക്കുന്ന ആ ദൃശ്യങ്ങൾ, സൗമ്യയുടെ ജീവിതത്തിൽ നിന്നും പറിച്ചെടുത്തവയായിരുന്നു. നവ്യാനായർ ജീവൻപകർന്ന രാധാമണിയെന്ന ആ കഥാപാത്രം ശരിക്കും സൗമ്യ തന്നെയായിരുന്നു. എസ്. സുരേഷ്ബാബുവിന്റെ തിരക്കഥയിൽ, വി.കെ.പ്രകാശ് സംവിധാനം ചെയ്ത “ഒരുത്തിയാണ് ആ സിനിമ. ഏറെക്കാലത്തിനുശേഷം നവ്യാനായർ മലയാളസിനിമയിലേക്ക് തിരിച്ചുവന്ന സിനിമ കൂടിയാണ് ഒരുത്തീ.

“ഒരുത്തിയുടെ പിറവിക്ക് വഴിയൊരുക്കിയ സൗമ്യയിപ്പോൾ വയനാട്ടിലുണ്ട്. ഭർത്താവ് കൽപ്പറ്റ നഗരസഭയിലെ ഹെൽത്ത് ഇൻസ്പെക്ടർ ഷൈജുവിനോടും, മക്കളോടും ഒപ്പം. എ.ഐ.വൈ.എഫിന്റെ വയനാട് ജില്ലാ വൈസ് പ്രസിഡന്റ് കൂടിയായ സൗമ്യ. തന്റെ ജീവിതത്തിലെ ഒരിക്കലും മറക്കാനാ വാത്ത ആ നിമിഷങ്ങൾ മഹിളാ രത്ന 'ത്തോട് പങ്കുവയ്ക്കുകയാണ്.

ആ അനുഭവങ്ങൾ സൗമ്യയുടെ തന്നെ വാക്കുകളിൽ നമുക്ക് തൊട്ടറിയാം.

കള്ളൻ പൊട്ടിച്ച മാല

"മൈനാഗപ്പള്ളിക്കടുത്ത് കുരിശിൻമൂട്ടിലെ ഒരു കടയിൽ സ്റ്റാഫായി ഞാനന്ന് ജോലി നോക്കുന്നുണ്ട്. വീട് അടുത്താണ്, പോയി വരാനുള്ള ദൂരമേയുള്ളു. അന്ന് എനിക്ക് മാർത്തോമ്മാ പള്ളിയിൽ ഒരു കല്യാണം കൂടാനുണ്ടായിരുന്നു. ഉച്ചയ്ക്ക് വീട്ടിലെത്തി ഭക്ഷണവും കഴിച്ച് മടങ്ങുമ്പോൾ, അമ്മയുടെ മാലയും എടുത്തിട്ടിരുന്നു. സാധാരണ അങ്ങനെയൊന്നും ചെയ്യാറില്ല. അന്നൊരു കല്യാണച്ചടങ്ങുണ്ടല്ലോ എന്നു കരുതി ഇട്ടുപോയതാണ്. ആ മാലതന്നെ പണയത്തിലായിരുന്നു. അടുത്തിടെയായിരുന്നു അത് തിരിച്ചെടുത്തത്. മാലയുമിട്ട് കടയിൽ ചെന്നപ്പോൾ അവിടെയുള്ളവരൊക്കെ കളിയാക്കുകയും ചെയ്തു. "മാലയുണ്ടല്ലോ, സൂക്ഷിച്ചോളണേ...' എന്ന്. ഞാനങ്ങനെ ആഭരണമൊന്നും ഇടാത്തതുകൊണ്ടാണ് അവരൊക്കെയങ്ങനെ പറഞ്ഞത്.. ആ തമാശയിൽ ഞാനും പങ്കുചേരുകയും ചെയ്തു.