എന്നും പി.ടിയുടെ സഹയാത്രിക

വിജയസോപാനത്തിൽ നിന്ന് ഉമാതോമസ് ജീവിതം പറയുമ്പോൾ

- മൈക്കിൾ വർഗ്ഗീസ് ചെങ്ങാടക്കരി

തൃക്കാക്കരയിലെ മിന്നുന്ന വിജയത്തിന്റെ ആഹ്ലാദാരവങ്ങൾ അടങ്ങിയിരുന്നില്ല. സ്വീകരണങ്ങൾ, പൊതു യോഗങ്ങൾ, നന്ദിപ്രകടനങ്ങൾ ഉമാതോമസിനെ സംബന്ധിച്ചിടത്തോളം ഇലക്ഷൻ കഴിഞ്ഞെങ്കിലും തിരക്കിൽ തന്നെയായിരുന്നു നിയുക്ത എം.എൽ.എ. എങ്കിലും "മഹിളാരത്നത്തിനുവേണ്ടി ഒരു അഭിമുഖം ആവശ്യപ്പെട്ടപ്പോൾ നിറഞ്ഞ സന്തോഷത്തോടെ സമ്മതിച്ചു. പകൽ പലവിധ തിരക്കുകളാകും. രാത്രിയിലാണെങ്കിൽ സ്വസ്ഥമായി സംസാരിക്കാം എന്ന നിർദ്ദേശം മുമ്പോട്ടുവച്ചത് ഉമാ തോമസു തന്നെയാണ്.

തിരക്കുകളും യാത്രയുമൊക്കെ ഉമാതോമസിനു നേരത്തേതന്നെ പരിചിതമാണ്. പി.ടി. തോമസിന്റെ ഇലക്ഷൻ പ്രചരണത്തിനായി എന്നും മുൻനിരയിൽ ഉണ്ടായിരുന്നു. അതുകൊണ്ടുതന്നെ തൃക്കാക്കര മണ്ഡലവും അപരിചിതമല്ല.

പി.ടി. തോമസിന്റെ വിയോഗം ഒരു വലിയ മുറിപ്പാടായി അലട്ടുന്നുണ്ടെങ്കിലും തൃക്കാക്കരയിലെ ജനങ്ങൾ നൽകിയ സ്നേഹത്തിനു പകരം വയ്ക്കാൻ മറ്റൊന്നുമില്ലെന്ന് ഉമാ തോമസ് പറയുന്നു. പ്രത്യേകിച്ചും, വീട്ടമ്മമാരുടെ സ്നേഹവും സൗഹാർദ്ദവും. എവിടെച്ചെന്നാലും വീട്ടമ്മമാർ തന്റെയടുത്ത് ഓടിയെത്തുന്നത് ഒരിക്കലും മറക്കാനാവില്ലെന്നും അവർ പറഞ്ഞു.

കാമ്പസ് രാഷ്ട്രീയത്തിൽ തിളങ്ങിനിന്ന കാലഘട്ടത്തിനുശേഷം ഇപ്പോഴാണ് സജീവ രാഷ്ട്രീയത്തിൽ പ്രവേശിക്കുന്നത്. എറണാകുളം മഹാരാജാസ് കോളേജിൽ പഠിക്കുമ്പോൾ സജീവ കെ.എസ്.യു പ്രവർത്തകയായിരുന്നു. അന്നാണ് ആദ്യമായി പി.ടി. തോമസിനെ കാണുന്നതും പരിചയപ്പെടുന്നതും. പ്രീഡിഗ്രിക്ക് പഠിക്കുമ്പോൾ വനിതാ പ്രതിനിധിയായി മത്സരിച്ചു ജയിച്ചു. ഡിഗ്രിക്ക് പഠിക്കുമ്പോൾ കോളേജ് യൂണിയൻ ഭാരവാഹിയായി. അന്ന് പി.ടി തോമസ് കെ.എസ്.യു സംസ്ഥാന പ്രസിഡന്റാണ്. പല പ്രോഗ്രാമുകൾക്കും മഹാരാജാസ് കോളേജിൽ എത്തും. ഇരുവരുടേയും കണ്ടുമുട്ടലും പരിചയപ്പെടലുമൊക്കെ അങ്ങനെയാണുണ്ടായത്.

പി.ടി. തോമസുമായുള്ള വിവാഹത്തോടെ രാഷ്ട്രീയത്തിൽനിന്നും തീർത്തും വിട്ടുനിന്നു. എങ്കിലും അടിയുറച്ച കോൺഗ്രസുകാരി തന്നെയായിരുന്നു. ഇലക്ഷൻ പ്രവർത്തനങ്ങളിലൊക്കെ നിഴലായി പി.ടിയുടെ കൂടെ ഉണ്ടായിരുന്നുതാനും. പി.ടി ഇപ്പോൾ കൂടെയില്ലെങ്കിലും അദ്ദേഹത്തിന്റെ സത്യസന്ധമായ രാഷ്ട്രീയ പ്രവർത്തനത്തിന്റെ തുടർച്ചയാണ് താൻ നടത്തുന്നതെന്ന് ഉമ തോമസ് വ്യക്തമാക്കുന്നു. രാഷ്ട്രീയവും കുടുംബജീവിതവും ജീവിതസങ്കല്പങ്ങളും വ്യക്തമാക്കിക്കൊണ്ട് ഉമാ തോമസ് "മഹിളാരത്നം' പ്രതിനിധി മൈക്കിൾ വർഗ്ഗീസ് ചെങ്ങാടക്കരിയുമായി സംസാരിക്കുന്നു.