റോഡ് അപകടങ്ങൾ ഒഴിവാക്കാം

ഒരു നല്ല പൗരൻ അല്ലെങ്കിൽ വ്യക്തി എന്ന നിലയിൽ ഇത്തരം കാര്യങ്ങളൊക്കെ ശ്രദ്ധിച്ച് റോഡ് സുരക്ഷാനിയമങ്ങൾ കൃത്യമായി പാലിച്ചാൽ റോഡ് അപകടങ്ങൾ ഒരു പരിധിവരെ ഒഴിവാക്കാൻ സാധിക്കും.

- ഡോ. മുഹമ്മദ് ഹനീഫ്. എം HOD, അത്യാഹിത വിഭാഗം, എസ്.യു.ടി,പട്ടം

രാവിലെ പത്രം വായിക്കുവാൻ എടുത്തപ്പോൾ തന്നെ തിരുവനന്തപുരം നഗരത്തിൽ സംഭവിച്ച അതിദാരുണമായ ഒരു വാഹനാപകടത്തെക്കുറിച്ച് വായിക്കാനിടയായി. അമിതവേഗത്തിൽ യുവാക്കൾ യാത്ര ചെയ്തിരുന്ന ഇരുചക്രവാഹനം ഒരു കാറിനെ മറികടക്കുന്നതിനിടെ കാർ വെട്ടിത്തിരിക്കുകയും നിയന്ത്രണം വിട്ട കാർ ഡിവൈഡറിലേക്ക് ഇടിച്ചുകയറുകയും കാറിലുണ്ടായിരുന്ന അമ്മയും അച്ഛനും കൈക്കുഞ്ഞും മുത്തശ്ശിയും അടങ്ങുന്ന കുടുംബം അപകടത്തിൽപ്പെടുകയുമുണ്ടായി. പിന്നീട് കൈക്കുഞ്ഞ് മരണപ്പെടുകയും ചെയ്തു.

സമൂഹമാധ്യമങ്ങളിലൂടെ ഞാൻ അപകടത്തിന്റെ ദൃശ്യങ്ങൾ കാണുവാനിടയായി. അപകടത്തെ തുടർന്ന് ആ കുടുംബത്തെ ആശുപത്രിയിൽ പ്രവേശിപ്പിച്ചപ്പോൾ എമർജൻസി വിഭാഗത്തിൽ അവരെ ചികിത്സിച്ച ഡോക്ടർ എന്ന നിലയ്ക്ക് ഞാൻ ആഗ്രഹിച്ചു പോയി, ആ യുവാക്കൾ ഇത്തരത്തിലുള്ള സാഹസികയാത്ര ഒഴിവാക്കിയിരുന്നെങ്കിലോ കാറിലെ യാത്രക്കാർ സീറ്റ് ബെൽറ്റ് ഉപയോഗിച്ചിരുന്നെങ്കിലോ ഇത്തരത്തിലുള്ള ഒരു വലിയ അപകടം ഒഴിവാക്കാമായിരുന്നു.

എമർജൻസി വിഭാഗത്തിൽ പലപ്പോഴും നമ്മൾ ഇത്തരത്തിൽ ഗുരുതര പരിക്കുകളോടെ രോഗികൾ വരുമ്പോൾ ആഗ്രഹിച്ചു പോയിട്ടുണ്ട്. ശരിയായ ട്രാഫിക് നിയമങ്ങൾ പാലിച്ചിരുന്നെങ്കിൽ അതായത് ഹെൽമറ്റ് ധരിച്ചിരുന്നുവെങ്കിൽ, സീറ്റ് ബെൽറ്റ് ഉപയോഗിച്ചിരുന്നെങ്കിൽ ഒരു അത്യാഹിതം ഒഴിവാക്കാമായിരുന്നു എന്നുള്ളത്. മിക്കവാറും ചെറുപ്പക്കാരാണ് വാഹനാപകടങ്ങളിൽ ഗുരുതര പരിക്കുകളോടെ എത്തുന്നത്.

ഈ നിയമം നല്ല മാറ്റത്തിലേക്ക് വഴിയൊരുക്കും എന്നതിൽ യാതൊരു സംശയവുമില്ല. ഒരു അപകടം നടന്നാൽ അപകടത്തിൽപ്പെട്ട ആളുകളെ കൃത്യസമയത്ത് ആശുപത്രിയിൽ എത്തിക്കുന്നതിലൂടെ അവരുടെ ജീവൻ രക്ഷിക്കാൻ സാധിക്കുന്നു. അല്ലാത്തപക്ഷം പല സങ്കീർണ്ണതകളിലേക്ക് നയിക്കും.