പാട്ടുകുടുംബത്തിലെ അഭിനേത്രി

എല്ലാം വടക്കുംനാഥൻ അനുഗ്രഹം

- നാസർ മുഹമ്മദ്, 

സംഗീതത്തിനായി ജീവിതം സമർപ്പിച്ച അച്ഛന്റെയും ഗായികയായ   അമ്മയുടെയും ഏകമകളായാണ് ഞാൻ ജനിച്ചത്. കുട്ടിക്കാലത്ത് ഭയങ്കര പാഷനായിരുന്നു ഡാൻസിനോട്. പാട്ടുകുടുംബത്തിൽ ജനിച്ചതുകൊണ്ട് നന്നായി പാട്ടും പാടുമായിരുന്നു. പാട്ടു പാടാനെത്തിയ ഞാനങ്ങനെ അഭിനേത്രിയായി മഹേഷിന്റെ പ്രതികാരത്തിലെത്തിയപ്പോൾ ആളുകളെന്ന തിരിച്ചറിഞ്ഞു. ഇപ്പോൾ ബൊമ്മിയായി ജീവിച്ചതിന് ദേശീയ അംഗീകാരവും തേടിയെത്തി.

തൃശൂർ പാട്ടുരാലിലെ കൃഷ്ണകടാക്ഷം വീട്ടിലിരുന്ന് അപർണ്ണ ബാലമുരളി "മഹിളാരത്നത്തിനായി സംസാരിച്ചു തുടങ്ങി.

കൂട്ടുകാരുടെ അപ്പു വീട്ടുകാരുടെ ആപ്പ 

 എന്റെ പത്തുവയസ്സുവരെ ഞാൻ ദോഹയിലായിരുന്നു. അമ്മയെ അച്ഛൻ കല്യാണം കഴിച്ചതിനുശേഷമാണ് അച്ഛൻ ഖത്തറിൽ പോയത്. അവിടെ അമ്മാവന്റെ കമ്പനിയിലായിരുന്നു.

അഞ്ചാം ക്ലാസ് മുതൽ തൃശൂരിലെ ദേവമാതാ സി.എം.ഐ പബ്ലിക് സ്കൂളിലാണ് പഠിച്ചത്. അന്ന് മുതലേ  ഡാൻസിൽ ഞാൻ സജീവമായിരുന്നു. കൂടെ പാട്ടുമുണ്ട്. കലോത്സവവേദികളിൽ ഞാൻ നിറഞ്ഞുനിന്നു   മുഖത്തേയ്ക്ക് വീണ മുടിയൊതുക്കി ചിരിച്ചുകൊണ്ട്   അപർണ്ണ പറഞ്ഞു. കലോത്സവങ്ങളിലെല്ലാം എനിക്ക് പറ്റുന്ന എല്ലാ പരിപാടികളിലും പങ്കെടുത്തിരുന്നു. അങ്ങനെ വേദികളിൽ നിന്ന്  വേദികളിലൂടെയുള്ള യാത്രകളിലൂടെയായിരിക്കാം ഞാനൊരു അഭിനേത്രിയായി മാറിയത് എന്ന് തോന്നുന്നു. അല്ലാതെ അഭിനയത്തിലൊന്നും എനിക്ക് മുൻപരിചയമില്ല. ആറാം ക്ലാസിൽ പഠിക്കുമ്പോൾ അരവിന്ദൻ നെല്ലുവായി സംവിധാനം ചെയ്ത ഡോക്യുമെന്ററിയിലൂടെയാണ് അഭിനയരംഗത്ത് ഹരിശ്രീ കുറിച്ചത്.

 അമ്മയേയും അച്ഛനേയും പരിചയപ്പെടുത്താൻ മറന്നു. വക്കീലാണ് അമ്മ. പേര് ശോഭ. നല്ലൊരു ഗായികയാണ്. ഒളികണ്ണിട്ട് അമ്മയെ നോക്കി. ഒരു പാട് സ്റ്റേജുകളിൽ പാടിയിട്ടുണ്ട്. അച്ഛൻ ബാലമുരളി സംഗീതജ്ഞനാണ്. ആൽബങ്ങളും ഭക്തിഗാനങ്ങളും സ്റ്റേജ് പരി പാടികൾക്കുമാണ് അച്ഛൻ കൂടുതലും പാട്ട് കമ്പോസ് ചെയ്തിട്ടുള്ളത്. കൂട്ടത്തിൽ ചില സിനിമകൾക്കും കമ്പോസ് ചെയ്തു. നല്ലൊരു ഗായകനാണ്. ഒട്ടുമിക്ക സംഗീതോപകരണങ്ങളും വായിക്കും.