സ്ത്രീകളിലെ തലവേദന

തലവേദന വളരെ സാധാരണയായി കാണുന്ന ഒരു പ്രശ്നമാണ്. ജീവിതകാലത്ത് ഒരു പ്രാവശ്യമെങ്കിലും തലവേദന അനുഭവിക്കാത്തവരായി ആരും ഉണ്ടാകില്ല. കുഴപ്പമില്ലാത്ത ചെറിയ തലവേദന തൊട്ട് വളരെ ഗൗരവമേറിയ അസുഖത്തിന്റെ ലക്ഷണമായും തലവേദന വരാം. ഇതിൽ പലതരം തലവേദനകളും സ്ത്രീകളിൽ കൂടുതലായി കണ്ടുവരുന്നു. അത് എന്തുകൊണ്ടാണെന്ന് ഒന്ന് അറിയാൻ ശ്രമിക്കാം.

- ഡോ. വിദ്യ എച്ച്. വി

ഹോർമോണുകളുടെ വ്യതിയാനം പല ശാരീരികപ്രശ്നങ്ങൾക്കും കാരണമാകാറുണ്ട്. അതിൽ ഒരു പ്രധാനപ്പെട്ട പ്രശ്നമാണ് തലവേദന. സ്ത്രീകളിലാണ് ഹോർമോണുകളുടെ ഈ ഏറ്റക്കുറച്ചിൽ വളരെ കൂടുതലുള്ളത്. അതും ജീവിതത്തിന്റെ പല പല ഘട്ടങ്ങളിൽ. ആർത്തവാരംഭത്തോടെ ചാക്രികമായി ഈ ഹോർമോൺ വ്യതിയാനം തുടങ്ങുന്നു. അതുപോലെ ഗർഭസമയത്തും പ്രസവശേഷവും ആർത്തവ വിരാമസമയത്തും ഈ വ്യതിയാനം കൂടുതലാണ്.

ഈ ഹോർമോൺ വ്യതിയാനം പ്രത്യേകിച്ച് ഈസ്ട്രജൻ പെട്ടെന്നു കുറയുന്ന അവസ്ഥ മൈഗ്രേൻ തലവേദനയ്ക്ക് കാരണമാകുന്നു. വളരെ സാധാരണയായി കാണുന്ന ഒരുതരം തലവേദനയാണ് മൈഗ്രേൻ. യാത്ര ചെയ്താലും വെയിലു കൊണ്ടാലും വിശന്നിരുന്നാലും ചില പ്രത്യേക ഭക്ഷണപദാർത്ഥങ്ങൾ കഴിച്ചാലും എല്ലാം ഈ തലവേദന വരാം. നെറ്റിയുടെ വശത്ത് പെട്ടെന്ന് ചിമ്മൽപോലെ തുടങ്ങി കൂടിക്കൂടി വരികയും ശബ്ദം, തെളിച്ചം കാണുമ്പോൾ ബുദ്ധിമുട്ട് അനുഭവപ്പെടുകയും ചെയ്യും. ചിലർ ഇതിന്റെ മൂർദ്ധന്യാവസ്ഥയിൽ ഛർദ്ദിക്കാറുമുണ്ട്. ചിലർക്ക് തലവേദന വരുത്തുന്നതിന് മുൻപ് കാഴ്ച മങ്ങലോ ഒരുതരം തരിപ്പോ ഉണ്ടാകാറുണ്ട്. ഇതിന് മൈഗ്രേൻ വിത്ത് ഔറ (migrane with aura) എന്നു പറയും. 

മൈഗ്രേൻ തലവേദന കൂടുതലായി കാണുന്നത് സ്ത്രീകളിലാണ്. പുരുഷന്മാരിലേക്കാൾ 2-3 മടങ്ങ് കൂടുതൽ.

ഇതിനുകാരണം മുൻപ് പറഞ്ഞപോലെ ഈസ്ട്രജൻ എന്ന ഹോർമോണിന്റെ വ്യതിയാനമാണ്. ആർത്തവ സമയത്തും ഗർഭസമയത്തും ആർത്തവ വിരാമസമയത്തും ഈസ്ട്രജനിൽ ഏറ്റക്കുറച്ചിൽ വരുന്നു. ഗർഭനിരോധന ഗുളികകൾ കഴിക്കുമ്പോഴും വന്ധ്യതാ ചികിത്സയുടെ ഭാഗമായുള്ള മരുന്നുകൾ കഴിക്കുമ്പോഴും ഇത് സംഭവിക്കാം. ഈസ്ട്രജന്റെ അളവ് കുറയുന്നതു മൂലമുള്ള മൈഗ്രേൻ രണ്ടുതരമായി തിരിക്കാം. മെൻസ്ട്രുവൽ മൈഗ്രേൻ (menstrual migraine)എന്നും മെൻസ്ട്രുവൽ റിലേറ്റഡ് മൈഗ്രേൻ (menstrual related migrain)എന്നും. ആദ്യത്തെ വിഭാഗത്തിൽ ആർത്തവസമയത്ത് മാത്രമേ മൈഗ്രേൻ വരികയുള്ളൂ. എന്നാൽ രണ്ടാമത്തെ വിഭാഗത്തിൽ ആർത്തവ സമയത്തും അല്ലാത്ത സമയത്തും തലവേദന വരാം.

ഗർഭാവസ്ഥയിലുളള മൈഗ്രേൻ തലവേദന

മൈഗ്രേൻ തലവേദനയുള്ള ഒരാൾക്ക് ഗർഭകാലത്ത് ആദ്യത്തെ മൂന്ന് മാസങ്ങളിൽ കുറച്ചു കൂടുതലായി അനുഭവപ്പെടാം. എന്നാൽ അതിനുശേഷം തലവേദനയ്ക്ക് കുറവുവരുന്നു.

പ്രസവശേഷം ഈസ്ട്രജന്റെ അളവ് കുറയുന്നതിനാൽ തലവേദന കൂടുതലായി ഉണ്ടാകാം.