പോസിറ്റീവ് എനർജിയും ഇൻഡോർ പ്ലാന്റുകളും

വീടും പരിസരങ്ങളും മനോഹരമാക്കുന്നതിനും വീട്ടിലുള്ളവർക്ക് പോസിറ്റീവ് എനർജി നൽകുന്നതിനും ചെടികൾക്കുള്ള സ്ഥാനം വളരെ വലുതാണെന്ന് പഠനങ്ങൾ തെളിയിക്കുന്നു.

- നാസർ മുഹമ്മദ്

ചില ചെടികൾ വീട്ടിൽ വളർത്തിയാൽ ഐശ്വര്യവും സമാധാനവും നൽകുന്നു എന്നാണ് വിശ്വാസം. അക്കൂട്ടത്തിൽ ഇത്തിരിക്കുഞ്ഞൻ ചെടികൾക്ക് പ്രത്യേക സ്ഥാനം തന്നെയുണ്ട്. പ്രത്യേക പരിപാലനത്തോടെ, ശ്രദ്ധയോടെ വളർത്തിയെടുത്ത് വീടിനകത്ത് ഓക്സിജന്റെ അളവ് വർദ്ധിപ്പിക്കുകയും അതിലൂടെ ഉണർവേകുകയും ചെയ്യുന്നതിന് ഈ ചെടികൾക്ക് മുഖ്യസ്ഥാനമാണുള്ളത്. അങ്ങനെ ഊർജ്ജദായകമാകും വിധം അകത്തളങ്ങളെ മനോഹരമാക്കുന്ന ചെടികളെക്കുറിച്ചും ചില്ലുകുപ്പിയിൽ പരിരക്ഷിച്ച് വരുന്ന മണിപ്ലാന്റിന്റെ പല വിഭാഗങ്ങളെക്കുറിച്ചും അവയുടെ നിറവൈവിധ്യതയെക്കുറിച്ചും പുതിയ അറിവിന്റെ ലോകം തുറക്കുകയാണ് ഇവിടെ. മുറ്റത്തെച്ചെടികൾക്കപ്പുറം ഉൾമുറികളിൽ വളർത്തുന്ന ചെടികൾക്ക് എത്രമാത്രം നമ്മുടെ ഭവന ങ്ങളെ മനോഹരമാക്കാനും ആരോഗ്യ പ്രശ്നങ്ങൾക്ക് പരിഹാരം കാണാനും കഴിയുമെന്നാണ് മഹിളാരത്തോട് പട്ടാപി ഗുരുവായൂർ റോഡിലെ ഹാർവെസ്റ്റെയിലെ റിസർച്ച് ഹെഡ്ഡായ അഷിതാ ബാബു പറയുന്നത്.

പീസ് ലില്ലിയിൽ നിന്ന് തുടങ്ങാം

 വായു ശുദ്ധീകരിക്കാൻ കഴിവുള്ള സസ്യമാണ് പീസ് ലില്ലി. പേരുപോലെതന്നെ വീടിനകത്ത് സമാധാനം നിറയ്ക്കാനും പോസിറ്റീവ് എനർജി നൽകാനും ഈ ചെടിക്ക് കഴിയുമെന്ന് വിദേശികൾ വിശ്വസിക്കുന്നു. ചേമ്പിന്റെ വർഗ്ഗത്തിൽപ്പെട്ട ഈ ചെടി ഇൻഡോർ പ്ലാന്റായി വളർത്താൻ യോജിച്ചതാണ്. 

കടുംപച്ച നിറത്തിലാണ് ഇലകൾ. കിടപ്പുമുറിയുടെ ഒരു മൂലയിൽ വളർത്തിയാൽ നല്ല ഉറക്കം നൽകാനും ഈ ചെടിക്ക് കഴിയുമെന്ന് പറയുന്നു. രാത്രിയിലും ഓക്സിജൻ പുറത്തുവിടാൻ കഴിവുള്ള ചെടിയാണിത്.