ആഹ്ലാദപൂത്തിരിയുടെ മധുരസ്മരണയിൽ ദീപാവലി

നന്മയുടെ പ്രകാശം ചൊരിയുന്ന ചിരാതുകളുടെ ആഘോഷമായ ദീപാവലിയെ വരവേൽക്കാൻ നാടും നഗരവും ഒരുങ്ങിക്കഴിഞ്ഞു.

- നാസർ മുഹമ്മദ്

ഹൃദയങ്ങളിലെ തമസ്സിനെ നീക്കി ആത്മ ജ്യോതിസ്സിനായി ഓരോ ചൈതന്യത്തിന്റെ ഹൃദയങ്ങളും തയ്യാറെടുക്കുമ്പോൾ "മഹിളാരത്നവും ദീപങ്ങളുടെയും മധുരത്തിന്റെയും ആഘോഷമായ ദീപാവലിയിൽ വായനക്കാരോടൊപ്പം പങ്കുചേരുകയാണ്.

കുടുംബവിളക്ക്, ഗീതാഗോവിന്ദം, മുറ്റത്തെ മുല്ല, കാതോട് കാതോരം, ഭാവന, അനിയത്തിപ്രാവ് തുടങ്ങിയ ജനകീയ പരമ്പരകളിലെ കഥാപാത്രങ്ങൾക്ക് ശബ്ദം നൽകിക്കൊണ്ടിരിക്കുന്ന തിരുവനന്തപുരത്തെ ശ്രദ്ധേയയായ ഡബ്ബിംഗ് ആർട്ടിസ്റ്റ് വന്ദന വിശ്വം, നീയും ഞാനും, ഗൗരീശങ്കരം തുടങ്ങിയ പരമ്പരകളിലൂടെ ശ്രദ്ധേയമായ താരം ആതിര പ്രവീൺ, ഈ വർഷത്തെ മിസ്സിസ് കേരള റണ്ണറപ്പും മോഡലും നർത്തകിയും ആയുർവേദ ഡോക്ടറുമായ കാസർഗോഡ് സ്വദേശി ജൻ ചന്ദ്രൻ, അഞ്ചു വയസ്സുകാരി ശ്രീനന്ദ എന്നിവരാണ് ദീപാവലി ഷൂട്ടിനായി കോവളം സമുദ്ര ബീച്ചിനടുത്തുളള മോളീസിൽ എത്തിയത്. ഇവർ കണ്ടും കേട്ടും അറിഞ്ഞ ദീപാവലി ആഘോഷങ്ങളുടെ മധുര സ്മരണയിലൂടെ നമുക്ക് സഞ്ചരിക്കാം.

പൊട്ടാതെ പോയ പടക്കം

കസിൻസും സുഹൃത്തുക്കളും എല്ലാം ചേർന്ന് ദീപാവലി ഞങ്ങൾ ശരിക്കും ആഘോഷിക്കും. ഒത്തിരി കസിൻസ് ഉളളതുകൊണ്ട് ദീപാവലിക്ക് തന്നെ എല്ലാവരും വീട്ടിൽ എത്തും. നീയും ഞാനും എന്ന പരമ്പരയിലെ കൃഷ്ണയായും ഗൗരീശങ്കരത്തിലെ ഗൗരിയുടെ കൂട്ടുകാരി ദീപയായി എത്തിയ ആതിര പറഞ്ഞു തുടങ്ങി.

ദീപാവലിക്ക് മുമ്പ് തന്നെ അച്ഛൻ ജോലിക്കാരെ വച്ച് വീടും പരിസരവും വൃത്തിയാക്കും. വീടെല്ലാം പെയിന്റടിച്ച് പുത്തനാക്കും. അങ്ങനെ ദീപാവലിയെ വരവേൽക്കാൻ ഞങ്ങളും ഒരുങ്ങും. കസിൻസെല്ലാം വരുമ്പോൾ സ്വീറ്റ്സും കമ്പിത്തിരിയും പടക്കങ്ങളുമെല്ലാം കൊണ്ടുവരും.