‘നോ’പറഞ്ഞ് അകറ്റണം മസ്തിഷ്കാഘാതത്തെ

നിലവിൽ മസ്തിഷ് കാഘാതമെന്നത് പ്രതിരോധ്യമായ ഒരു അവസ്ഥയാണെന്ന് വിദഗ്ധ ഡോക്ടർമാർ പറയുന്നു

- ഡോ. ജോയി എം.എ സീനിയർ കൺസൾട്ടന്റ് ന്യൂറോളജിസ്റ്റ് അപ്പോളോ അലക്സ് ഹോസ്പിറ്റൽ, അങ്കമാലി.

മസ്തിഷ്കാഘാതം എന്ന് വിളിക്കപ്പെടുന്ന അഥവാ പക്ഷാഘാതം സ്ട്രോക്ക് ലോകത്തെവിടെയും മരണ കാരണങ്ങളിൽ മൂന്നാം സ്ഥാനത്താണ്. ഇതൊരു ജീവിതശൈലീ രോഗാവസ്ഥയാണ്. ഓരോ മൂന്നു സെക്കൻഡിലും ഒരാൾക്ക് വീതം സ്ട്രോക്ക് ഉണ്ടാകുന്നു എന്ന കണക്ക് ആഗോള തലത്തിലുണ്ട്. പ്രതിവർഷം 12.2 ദശലക്ഷം പേർ പുതുതായി മസ്തിഷ്കാഘാതം എന്ന ഈ രോഗാവസ്ഥയിലെത്തുന്നു. ലോകമെമ്പാടും ശരീര വൈകല്യങ്ങളുടെ ഒരു പ്രധാന കാരണവുമാണിത്.

മനുഷ്യരിലെ സ്ട്രോക്ക് ആദ്യമായി തിരിച്ചറിഞ്ഞത് 2,400 വർഷങ്ങൾക്ക് മുമ്പാണ്. അക്കാലത്ത് ലത്തീനിലും ഗ്രീക്കിലും അത് “അപ്പോപ്ലെക്സി' എന്നറിയപ്പെട്ടു. ക്രമേണ സ്ട്രോക്കിന്റെ രോഗനിർണ്ണയവും മാനേജ്മെന്റും ഗണ്യമായി വികസിച്ചു. നിലവിൽ മസ്തിഷ് കാഘാതമെന്നത് പ്രതിരോധ്യമായ ഒരു അവസ്ഥയാണെന്ന് വിദഗ്ധ ഡോക്ടർമാർ പറയുന്നു. അതേസമയം, മസ്തിഷ്കാഘാതത്തെ അതിജീവിക്കുന്നവരിൽ അത് ഉണ്ടാക്കുന്ന ശാരീരികവും മാനസികവും സാമ്പത്തികവുമായ വിഷമതകൾ വളരെ വലുതായിരിക്കും.

ഏതു പ്രായത്തിലുള്ള വ്യക്തികളെയും സ്ട്രോക്ക് ബാധിക്കാം. പക്ഷേ, യുവജനങ്ങൾക്കിടയിൽ, പ്രത്യേകിച്ച് 18-50 വയസ് പ്രായമുള്ളവരിൽ, മസ്തിഷ്കാഘാത വർദ്ധനവ് ഗണ്യമായിട്ടുണ്ട്. ഉദാസീന ജീവിതശൈലി, അനാരോഗ്യകരമായ ഭക്ഷണം, ചില മരുന്നുകൾ എന്നിവ സ്ട്രോക്ക് സാധ്യത വർദ്ധിപ്പിക്കും. കൃത്യസമയത്ത് ചികിത്സിച്ചില്ലെങ്കിൽ, മസ്തിഷ് കാഘാതം മൂലം മരണം വരെ സംഭവിക്കാമെന്ന് ചൂണ്ടിക്കാട്ടുന്നു വിദഗ്ധ ന്യൂറോളജിസ്റ്റായ ഡോ.എം. എ. ജോയ്. കറുകുറ്റി അഡ്ലക്സ് ആശുപത്രി ന്യൂറോളജി ഡിപ്പാർട്ട്മെന്റിലെ സീനിയർ കൺസൾട്ടന്റും മൂവ്മെന്റ് ഡിസെബിലിറ്റി സ്പെഷലിസ്റ്റുമായ അദ്ദേഹം "മഹിളാരത്നം' ലേഖകൻ മൈക്കിൾ വർഗ്ഗീസ് ചെങ്ങാടകരിക്ക് നൽകിയ അഭിമുഖത്തിൽ മസ്തിഷ് കാഘാതത്തെപ്പറ്റി വിശദീകരിച്ചു.