കാണാവുന്ന പാടുന്നത് ഒരു ചെറിയ ആശങ്കയല്ല

കഴുത്തിന്റെ ഭംഗി പോകുമെന്ന ആശങ്ക ഇനി വേണ്ട

-  ഡോ. സന്ദീപ് സുരേഷ്

തൈറോയ്ഡ് ഗ്രന്ഥി തകരാറിലാകുന്നതു മൂലമുള്ള ആരോഗ്യ പ്രശ്നങ്ങൾ കേരളത്തിൽ അതിവേഗമാണ് കൂടി വരുന്നതെന്ന് ഡോക്ടർമാർ പറയുന്നു. ആഗോളതലത്തിൽ തന്നെ തൈറോയ്ഡ് കാൻസർ രോഗികളുടെ എണ്ണം ക്രമാതീതമായി വർദ്ധിച്ചതായും കണക്കുണ്ട്. ഇന്ത്യയിലാകട്ടെ ഈ അർബുദം ഏറ്റവും കൂടുതലായി കണ്ടുവരുന്ന സംസ്ഥാനങ്ങളിലൊന്നാണ് കേരളം; തെക്കൻ ജില്ലകളിൽ പ്രത്യേകിച്ചും.

നാൽപ്പതിനും അമ്പതിനും ഇടയിലുള്ള സ്ത്രീകളിലാണ് കൂടുതലായും ഈ രോഗം കണ്ടുവരുന്നത്. എന്നിരുന്നാലും പ്രായ, ലിംഗ ഭേദമെന്യേ ഈ രോഗമെത്താം. ശസ്ത്രകിയ ആണ് തൈറോയ്ഡ് കാൻസർ ചികിത്സയിൽ ഏറ്റവും ഫലപ്രദവും കൃത്യവുമായ ചികിത്സാരീതി. മുറിപ്പാട് ഉണങ്ങിയ ശേഷവും അഭംഗി സൃഷ്ടിച്ചുകൊണ്ട് കഴുത്തിൽ ചെറുതല്ലാത്ത വടു നിലനിൽക്കുമെന്നതിനാൽ സ്ത്രീകളുടെ പേടിസ്വപ്നമാണീ ശസ്ത്രക്രിയ. രോഗകാഠിന്യം അനുസരിച്ച് തൈറോയ്ഡ് ഗ്രന്ഥി മുഴുവനായോ അല്ലാതെയോ നീക്കം ചെയ്യേണ്ടി വന്നേക്കാം. ശസ്ത്രക്രിയക്കുശേഷമുള്ള പാത്തോളജി റിപ്പോർട്ടനുസരിച്ച് തുടർചികിത്സയും ആവശ്യമാകാം.

തൈറോയ്ഡ് ഗ്രന്ഥിയെ ബാധിക്കുന്ന മറ്റൊരു തൈറോയ്ഡ് നോഡ്യൂൾസ് രോഗാവസ്ഥയാണ് അഥവാ തൈറോയ്ഡിലെ മുഴകൾ, തൈറോയ്ഡിലെ മുഴകളിൽ ഒരു ശതമാനത്തോളം മാത്രമേ കാൻസർ ആകാറുള്ളൂ. എങ്കിലും ലക്ഷണങ്ങൾ വിലയിരുത്തിയ ശേഷം ഈ മുഴകളോ ചിലപ്പോൾ തൈറോയ്ഡ് ഗ്രന്ഥി മുഴുവനായോ ശസ്ത്രക്രിയയിലൂടെ നീക്കം ചെയ്യേണ്ടിവരാം.

കഴുത്തിൽ മുറിവുകളില്ലാതെ തൈറോയ്ഡ് ഗ്രന്ഥിയിലെ മുഴ എറണാകുളം ലിസി ആശുപത്രിയിൽ വിജയകരമായി നീക്കം ചെയ്തവിവരം വിപുല ശ്രദ്ധ പിടിച്ചുപറ്റിയത് ഈ ശസ്ത്രക്രിയയുടെ സൗന്ദര്യ സംരക്ഷണ ധർമ്മം കൊണ്ടാണ്. നോർത്ത് പറവൂർ സ്വദേശിയായ ഇരുപത്തിയഞ്ചുകാരനിലായിരുന്നു അതിനൂതന ശൈലിയിലുള്ള സങ്കീർണ്ണ ശസ്ത്രക്രിയ. ഇന്ത്യയിൽ തന്നെ അപൂർവ്വം ആശുപത്രികളിലേ തൈറോയ്ഡെക്ടമി എന്നു പേരുള്ള സർജറി മുറിപ്പാടുണ്ടാക്കാതെ വിജയകരമായി നടന്നിട്ടുള്ളൂ.