ചർമത്തിനേകാം സൂപ്പർ ക്ലീൻ ലുക്

വൈറ്റ് ഹെഡ്സും ബ്ലാക് ഹെഡ്സും അകറ്റി ചർമത്തിന് ക്ലീൻ ലുക് നൽകാൻ സൂപ്പർ ടിപ്സ് ഇതാ

- അമ്മു ജൊവാസ്

എല്ലാവരെയും ഒരിക്കലെങ്കിലും അലട്ടിയിട്ടുള്ള ചർമ പ്രശ്നമാകും ബ്ലാക് ഹെഡ്സ്. മൂക്കിൻ തുമ്പത്ത് കറുത്ത കുത്തുകളായും നെറ്റിയിൽ കറുപ്പു നിറഞ്ഞ ചെറിയ തടിപ്പായുമൊക്കെ ഇവ മിക്കവർക്കും വന്നുപോയിട്ടുണ്ടാകും. എണ്ണമയമുള്ള ചർമക്കാരെ വിട്ടുപിരിയാത്ത പ്രശ്നമായും മുഖത്ത് ഈ "കറുത്ത തലകൾ ഉണ്ടാകും.

കറുത്ത തലകൾ മാത്രമല്ല വെളുത്ത തലകളും (വൈറ്റ് ഹെഡ്സ്) പ്രശ്നക്കാരാണ്. ചർമത്തിനു ക്ലീൻ ലഭിക്കാൻ വൈറ്റ് ഹെഡ്സും ബ്ലാക് ഹെഡ്സും അകറ്റിനിർത്തുക തന്നെ വേണം.

വൈറ്റ് ഹെഡ്സും ബ്ലാക് ഹെഡ്സും പ്രത്യക്ഷപ്പെടാനുള്ള കാരണങ്ങളും അവ നീക്കാനുള്ള വഴികളും അറിയാം.

മുഖക്കുരു എന്ന ബ്ലാക് ഹെഡ്സ്

ചർമത്തിനു സ്വാഭാവികമായ എണ്ണമയം നൽകുന്ന സെബം എന്ന സ്രവം ഉൽപാദിപ്പിക്കുന്ന ഗ്രന്ഥികളാണു സെബേഷ്യസ് ഗ്രന്ഥികൾ. ഈ സ്രവം, രോമകൂപത്തോടു ചേർന്നുള്ള സുഷിരങ്ങൾ വഴി ചർമത്തിലെത്തുന്നു. ഈ സുഷിരങ്ങൾ അടയുമ്പോൾ സെബം പുറത്തെത്താകാനാകാതെ ഉള്ളിൽ തങ്ങും. ഇതു പതിയെ വീർത്തു ചെറിയ കുരുക്കളാകും.

ഗ്രേഡ് വൺ മുഖക്കുരു ആണു കൊമഡോൺസ് (comedones). ഇതു രണ്ടു തരമുണ്ട്, ബ്ലാക്ക് ഹെഡ്സും (Black heads) രണ്ടാമത്തേത് വൈറ്റ് ഹെഡ്സും (white heads). അടഞ്ഞിരിക്കുന്ന ചെറിയ കുരുക്കൾ വൈറ്റ് ഹെഡ്സ് ആണ്. കുരുക്കൾ തുറന്നു വായുവുമായി സമ്പർക്കത്തിലാകുമ്പോൾ ഓക്സിഡൈസ്ഡ് ആകുകയും കറക്കുകയും ചെയ്യും. ഇതാണു ബ്ലാക് ഹെഡ്സ്.

മുഖത്ത് എണ്ണമയം അധികമായുള്ള നെറ്റി, കവിൾ, മൂക്കിന്റെ വശങ്ങൾ, താടി എന്നീ ഭാഗങ്ങളിലാണ് മുഖക്കുരു കൂടുതലായുണ്ടാകുന്നത്. മുഖക്കുരുകൾ ഗ്രേഡ് വണ്ണിൽ എത്തുമ്പോൾ തന്നെ അതായത് കൊമഡോൺസ് ആയിരിക്കുമ്പോൾ തന്നെ ചികിത്സിച്ചാൽ അവ കൂടിയ ഗ്രേഡുകളിലേക്കു മാറാതിരിക്കും.