കാഴ്ചകളുടെ കലൈഡെസ്കോപ്

പച്ചവിരിപ്പിട്ട വയലേലകളെ തഴുകിയൊരു കുഞ്ഞു യാത്ര പോയാലോ.. പാലക്കാട് ജംക്ഷനിൽനിന്നു കൃത്യം 6 മണിക്കു പുറപ്പെടുന്ന പാലക്കാട്- തിരുച്ചെന്തൂർ എക്സ്പ്രസിലാണ് യാത്ര.

- റോഷ്നി

 കാഴ്ചകളുടെ കലൈഡെസ്കോപ് സമ്മാനിക്കുന്ന സുന്ദരമായ സഞ്ചാര പാത... ഓരോ തിരിവിലും മനോഹര ഫ്രെയിമുകൾ.. യാക്കര പാലത്തിനു മുകളിലൂടെയുള്ള പുലർകാല ദൃശ്യം.പെരുവമ്പത്തുമ്പോൾ ആകാശവും പച്ചവിരച്ച പാടവുമായി വൈഡ് ആംഗിൾ ലുക്ക്. അതിനടുത്താണ് "ഖസാക്കിന്റെ ഇതിഹാസ'ത്തിലെ ത്രസാക്ക്. കൊല്ലങ്കോടിന്റെ മാമല, പേരാൽ വേരുകളിൽ ഊഞ്ഞാലാടാൻ വിളിക്കുന്ന മുതലമട സ്റ്റേഷൻ, മീങ്കര ഡാമിന്റെ വിശാലമായ തടാകം.

മുല്ലപ്പൂ വാസന. തമിഴ് മണമുള്ള കംപാർട്മെന്റ്. അതിർത്തി കടക്കുന്ന ചില വണ്ടികൾക്കുമാത്രമുള്ള പ്രത്യേക ഗന്ധം. മൊട്ടയടിക്കാൻ കൊച്ചുകുട്ടികളുമായി പഴനിക്കു പോകുന്നവർ, മധുരയ്ക്കുള്ളവർ, പൊള്ളാച്ചി ചന്തയിലേക്കുള്ള കച്ചവടക്കാർ. കലപിലകൂട്ടുന്ന കുട്ടിക്കൂട്ടം. കളർഫുൾ ആയിരുന്നു വണ്ടിമുറിയുടെ അകക്കാഴ്ച കൾ.

സീറ്റ് ഉണ്ടെങ്കിലും വാതിൽപ്പടിയിൽ ചാരിനിൽക്കാനാണു മിക്കവർക്കും ഇഷ്ടമെന്നു തോന്നുന്നു. ഇടത്തേക്കു നോക്ക ണോ അതോ വലതുവശത്തു നിന്നാൽ മതിയോ എന്ന് ആശയക്കുഴപ്പം ഉണ്ടാക്കും വിധം മനോഹരമായ പ്രകൃതിദൃശ്യങ്ങളാണ് ഇരുവശത്തും.

പാലക്കാട് ജംക്ഷൻ മുതൽ പൊള്ളാച്ചി വരെ പാലക്കാട് ടൗൺ, പുതുനഗരം, കൊല്ലങ്കോട്, മുതലമട, മീനാക്ഷിപുരം, ആനമല റോഡ് എന്നീ സ്റ്റോപ്പുകളാണുള്ളത്.