മലബാറുകാരൻ സെബാസ്റ്റ്യൻ

മുൻനിര സിമന്റ് ഡീലറായ കഥ

ഏതൊരു രാജ്യത്തിന്റെയും വളർച്ച നിർമാണ മേഖലയിൽ നിന്നും തുടങ്ങുന്നു.  സമ്പത്തിന്റെയും തൊഴിലിന്റെയും വളർച്ചയുടെയും നട്ടെല്ലെന്ന് ഈ മേഖലയെ വിളിക്കാം. മഹാത്ഭുതങ്ങളായ പിരമിഡുകളിൽ നിന്നും കൊളോസിയത്തിൽ നിന്നും തുടങ്ങുന്നു നിർമാണ മേഖലയുടെ വൈഭവവും വളർച്ചയും. ബ്രിട്ടണിലെ കല്ലുപണിക്കാരനായ ജോസഫ് ആസ്പിഡിന്റെ പത്തൊൻപതാം നൂറ്റാണ്ടിൽ സിമന്റ് കണ്ടുപിടിച്ചതിൽ നിന്നും തുടങ്ങുന്നു വികസനത്തിന്റെ കുതിപ്പ്. സിമന്റ് ഇല്ലാത്ത ഒരു ലോകത്തെപ്പറ്റി ചിന്തിക്കുന്നത് പോലും അസാധ്യം. സിമന്റ് വ്യാപാരത്തിലൂടെ കെ.ജെ. ട്രേഡേഴ്സ് എന്ന തന്റെ സാമ്രാജ്യം കെട്ടിപ്പടുത്ത കെ.ജെ സെബാസ്റ്റ്യൻ എന്ന മലബാറുകാരന്റെ കഥയാണ് സംരംഭം പങ്കുവെക്കുന്നത്.

സിറ്റ്കോയിലെ ഇന്റേൺഷിപ്പ് കാലം മുതൽ തുടങ്ങുന്നു സെബാസ്റ്റ്യന്റെ സിമന്റുമായുള്ള ബന്ധം. വടക്കേ മലബാറിലെ കർഷക കുടുംബത്തിൽ ജനിച്ച് വളർത്തപ്പെട്ട കെ.ജെ. സെബാസ്റ്റ്യൻ സിറ്റ്കോയിലെ ഒരുവർഷത്തെ ഇന്റേൺഷിപ്പ് പൂർത്തിയാക്കിയതിനു ശേഷമാണ് ജോലിക്കായി തൂത്തുക്കുടി തുറമുഖത്തെത്തുന്നത്. ദിവസ വേതനത്തിലായിരുന്നു ജോലി.