കനലാഴി കടന്നൊരു വീട്ടമ്മ

അർബുദത്തെ തോൽപ്പിച്ച് പ്രസീദ ജീവിതത്തിലേക്ക്. തളർന്നു വീഴാതിരിക്കാൻ ഗാർമെന്റ്സ് യൂണിറ്റിന് തുടക്കമിട്ടു. പ്രസീദയുടെ ജീവിതം കേട്ട പ്രധാനമന്ത്രി റിപ്പബ്ലിക് ദിനത്തിൽ അതിഥിയായി ക്ഷണിച്ചു.

- das

രോഗം ക്യാൻസറാണെന്നു അറിയുന്ന നിമിഷമുണ്ട്. ഏതു മനക്കരുത്തും ചോർന്നു പോകുന്ന നിമിഷം. സാരമില്ല, ചികിത്സിച്ചു ഭേദമാക്കാമെന്ന് ഡോക്ടർ. ചിലർ പൊട്ടിക്കരയും. ചിലർ നിറമിഴികളോടെ നിശബ്ദയാകും. ആ നിമിഷത്തെ അതീജീവിച്ച ഒരു വീട്ടമ്മയുണ്ട്, കൊല്ലം സദാനന്ദപുരം സ്വദേശി പ്രസീദ. തളർന്നില്ല, പ്രസീദ. മുഖപ്രസാദത്തോടെ ജീവിതത്തെ നേരിട്ടു. അർബുദത്തെ അതിജീവിച്ചു തിരികെയെത്തി. പ്രസീദയുടെ പോരാട്ടം ഇവിടെ തീർന്നില്ല. കരുത്തോടെ മുന്നോട്ട്. സ്വന്തം ആവശ്യങ്ങൾക്കായി തയ്യൽ യൂണിറ്റ് തുടങ്ങി. അത് വികസിപ്പിച്ചു. ഇന്നു മികച്ച ബിസിനസുള്ള ഗാർമെന്റ്സ് യൂണിറ്റായി പ്രസീദയുടെ 'ശ്രീ വിനായകം ഗാർമെന്റ്സ് വളർന്നു. അർബുദത്തെ അതിജീവിച്ചു സംരംഭക ലോകം പടുത്തുയർത്തിയ വീട്ടമ്മ പ്രസീദയ്ക്കുമുണ്ട് പറഞ്ഞു തീർക്കാൻ ഏറെ വിശേഷങ്ങൾ.