തിരുനെല്ലി ക്ഷേത്രവിശേഷങ്ങളിലൂടെ

പതിനാറാം നൂറ്റാണ്ട് വരെ പ്രശസ്തമായ ക്ഷേത്രത്തിന് ആമലകം എന്ന പേരുമുണ്ട്. ആമലകം എന്നാൽ നെല്ലിയെന്നാണ് അർത്ഥം. നെല്ലിക്കയുടെ ഗുണവിശേഷങ്ങൾ നമുക്കറിയാമല്ലോ. ഇല്ലം വല്ലം തിരുവല്ലം ലോപിച്ച് തിരു നെല്ലി ആയതെന്നും പറയുന്നു. വിശേഷപ്പെട്ട ഇല്ലി മരത്തിലാണല്ലോ ബ്രഹ്മാവ് വിഷ്ണുവിനെ ദർശിച്ചത്. ദക്ഷിണഗയ,തെക്കൻ കാശി എന്നും ഈ ക്ഷേത്രത്തിന് മറ്റു പേരുകളും ഉണ്ട്. തിരുനെല്ലി ക്ഷേത്രം മലബാർ ദേവസ്വം ബോർഡിന്റെ കീഴിലാണ്. പിറ്റേ ദിവ സത്തേക്ക് ബലിയിടുന്നതിനുള്ള ചീട്ടും എഴുതിച്ചു. സാധാരണയായി ദേവസ്വം ബോർഡിന്റെ കീഴിലുള്ള ക്ഷേത്രത്തിലെത്തിയാൽ വേണമെങ്കിൽ ചെയ്തിട്ട് പോകൂവെന്ന ഭാവമായിരിക്കും. പക്ഷെ ഇവിടത്തെ ജീവനക്കാരെല്ലാവരും നല്ല പെരുമാറ്റമെന്ന് ഭക്തമാരൊക്കെ പറയുകയായിരുന്നു.

- ഡോ. പി. കെ. ജയകുമാരി

തിരുനെല്ലിയിലേക്കുളള യാത്രയെക്കുറിച്ചും ക്ഷേത്രത്തിന്റെ ഉല്പത്തിയേയും കാലപ്പഴക്കത്തേയും കുറിച്ചും ക്ഷേത്രത്തെക്കുറിച്ചുള്ള ഐതിഹ്യങ്ങളും മുൻ ലക്കങ്ങളിൽ പ്രതിപാദിച്ചിരുന്നല്ലോ. മുപ്പത് കരിങ്കൽ തൂണുകളാൽ താങ്ങി നിർത്തിയിരിക്കുന്ന ക്ഷേത്രം വാസ്തുവിദ്യയുടെ വിസ്മയമാണെന്നാണ് പൊതുവേയുള്ള നിഗമനം. അതൊരു അതിശയോക്തിയല്ലെന്നത് ക്ഷേത്രം സന്ദർശ്ശിക്കുന്ന ഓരോരുത്തർക്കും മനസ്സിലാകും . ക്ഷേത്രത്തിന് പുറത്ത് ചുറ്റിനുമായി നിരത്തിയിട്ടിരിക്കുന്ന കരിങ്കൽ പാളികൾ ഒന്നും ശരിയായി താഴെ ഉറപ്പിച്ചിട്ടില്ല. അവിടെ ക്ഷേത്രപുനഃരുദ്ധാരണം നടക്കുന്നതിനാൽ നിർമ്മാണത്തിനാവശ്യമായ കല്ലുകളും മറ്റും കൂട്ടിയിട്ടിട്ടുണ്ട്. അവിടവിടെയായി നിരതെറ്റി കിടക്കുന്ന വലിയ ചതുരാകൃതിയിലുള്ള പാറക്കല്ലുകളാണ്. താഴെ ഉറപ്പിക്കാത്ത കല്ലുകളിൽ പേടിച്ച് പേടിച്ച് കാലുകൾ വെച്ചിട്ടാണ് നടന്നത്. അപ്പോഴേക്കും ചെറിയ ചാറ്റൽ മഴയും തുടങ്ങിയിരുന്നു. കല്ലുകൾ നനഞ്ഞപ്പോൾ വഴുതി വീഴുമോ എന്ന ആശങ്കയോടെ ക്ഷേത്രസന്നിധിയിലേക്ക് പോയി. ക്ഷേത്രത്തിന് ചുറ്റിനുമുള്ള തൂണുകളുടെ കീഴ് ഭാഗത്തായി ചില ശില്പങ്ങളും ഉണ്ട്. മഴയും ചാഞ്ചാടുന്ന കല്ലിലൂടെയുള്ള നട പമായതിനാൽ ശില്പങ്ങൾ വേണ്ടവിധം ശ്രദ്ധിക്കാനായില്ല. ക്ഷേത്രത്തിനകത്തും ധാരാളം തൂണുകൾ ഉണ്ടായിരുന്നു.