വേനൽക്കാല ചർമ്മസംരക്ഷണം

ബാഹ്യപ്രയോഗങ്ങളിൽ ഏറ്റവും പ്രദാനം എണ്ണതേച്ചുകുളിയാണ്. അവ ശരീരത്തിന്റെ താപനില ക്രമീകരിക്കുന്നതോടൊപ്പം ചർമ്മത്തിലെ ഈർപ്പം നിലനിർത്തി വരൾച്ച ഇല്ലാതാക്കാൻ സഹായിക്കുന്നു. അതിനായി പിണ്ഡ തൈലം, ചന്ദനാദി തൈലം, നാൽപാമരാദി തൈലം മുതലായവ ഉപയോഗിക്കാം. ദിവസവും രണ്ട് തവണയെങ്കിലും തണുത്ത വെള്ളത്തിൽ കുളിക്കുക. സോപ്പിന് പകരം പയറുപൊടിയോ കടലപ്പൊടിയോ പാൽപ്പാട ചേർത്ത് ഉപയോഗിക്കാം.

- ഡോ. ഷിബില കെ

ഓരോ വർഷം കൂടുന്തോറും ചൂടുകൂടുന്നതു കാരണം വേനൽക്കാലം അസഹനീയമായിക്കൊണ്ടിരിക്കുകയാണല്ലോ. ചർമ്മസംരക്ഷണത്തിന് വളരെയേറെ പ്രാധാന്യം നൽകേണ്ടകാലം കൂടിയാണിത്. വേനൽക്കാലത്ത് ചൂടിന്റെ ആധിക്യം കൊണ്ടും, ദഹനക്കുറവ് കാരണവും ആവശ്യത്തിന് ആഹാരം കഴിക്കാത്തതു കൊണ്ടും ശരീരത്തിന്റെ രോഗപ്രതിരോധശേഷി കുറവായിരിക്കും. അതുകൊണ്ട് തന്നെ രോഗാണുക്കൾ വളരെവേഗം ശരീരത്തിൽ പ്രവേശിച്ച് ത്വക് രോഗങ്ങൾ, നേത്രരോഗങ്ങൾ, പകർച്ചവ്യാധികളായ മഞ്ഞപ്പിത്തം, ടൈഫോയ്ഡ്, ചിക്കൻപോക്സ് മുതലായ പലവിധരോഗങ്ങൾക്കും കാരണമാകുന്നു.

വേനൽക്കാലത്ത് പല ചർമ്മപ്രശ്നങ്ങളും ഗുരുതരമാകുന്നു. ഇതിന്റെ കാരണം തീഷ്ണമായ ചൂടിനാൽ ശരീരത്തിൽ നിന്നും ജലാംശം നഷ്ടപ്പെടുന്നതാണ്. അതോടപ്പംതന്നെ കാലാവസ്ഥയിലുണ്ടാകുന്ന മാറ്റങ്ങൾ, അന്തരീക്ഷമലിനീകരണം, മതിയായ ചർമ്മ സംരക്ഷണത്തിന്റെ അഭാവം, അനാരോഗ്യകരമായ ആഹാരശീലം തുടങ്ങിയവയും ചർമ്മത്തിൽ പലവിധ പ്രശ്നങ്ങൾ ഉണ്ടാക്കുന്നു.

തണുപ്പുകാലത്തെ പോലെ തന്നെ വേനൽക്കാലത്തും നേരിടുന്ന ഒരു പ്രധാന സൗന്ദര്യപ്രശ്നമാണ് ചർമ്മത്തിലെ വരൾച്ച. വർദ്ധിച്ചുവരുന്ന ചൂടിനാൽ നമ്മുടെ ശരീരത്തിലെ ജലാംശം കൂടുതലായി നഷ്ടപ്പെടുകയും അതുവഴി ചർമ്മം കൂടുതൽ വരണ്ട് ത്വക്കിന്റെ സ്വാഭാവികമായ എണ്ണമയം ഇല്ലാതാകുകയും ചെയ്യുന്നു. വേനൽക്കാലത്ത് കണ്ടു വരുന്ന മറ്റ് പ്രധാന ചർമ്മപ്രശ്നങ്ങളാണ് വെയിലേറ്റാലുണ്ടാകുന്ന കരുവാളിപ്പ് (SunTan), ചൊറിച്ചിൽ, ചൂടുകുരു, സൂര്യതാപം മുതലായവ.

വേനൽക്കാലത്ത് ചർമ്മത്തിന് ആവശ്യമായ ഈർപ്പം നിലനിർത്തി സംരക്ഷണം നൽകുന്നതിന് ശ്രദ്ധിക്കേണ്ട കാര്യങ്ങൾ എന്തൊക്കെയാണെന്ന് നോക്കാം.