காதலை தீராக் காதல் என்றும் சொல்லலாம்!

‘அதே கண்கள்’, ‘பெட்ரோமாக்ஸ்’ படங்களுக்குப் பிறகு மூன்றாவது படமான ‘தீராக் காதல்’ இயக்கி முடித்துள்ளார் ரோகின் வெங்கடேசன்.‘‘

- எஸ்.ராஜா

சினிமாதான் என்னுடைய ஆல்டைம் ஃபேவரைட்டா இருந்துச்சு. சினி ஃபீல்டுல நுழையணும் என்பதற்காகவே விஸ்காம் படிச்சேன். அதுமட்டும் போதாதுன்னு போஸ்ட் கிராஜுவேஷனிலும் ஃபிலிம் டைரக்‌ஷனுக்கு படிச்சேன். இயக்குநர் விஷ்ணுவர்த்தன் சாரிடம் ‘சர்வம்’ டைம்ல ஜாயின் பண்ணினேன். தெலுங்கில் பவன் கல்யாண் நடிச்ச ‘பாஞ்சா’வுல ஃபுல் படம் ஒர்க் பண்ணினேன். பிறகு, தனியா படம் பண்ணலாம்னு டிரை பண்ணினேன்.

மூணு, நாலு வருஷத்துக்குப் பிறகு என்னுடைய முதல் படமான ‘அதே கண்கள’ வாய்ப்பு கிடைச்சது. அடுத்து தமன்னா நடிச்ச ‘பெட்ரோமாக்ஸ்’ பண்ணினேன். ‘தீராக் காதல்’ என்னுடைய மூன்றாவது படம்...’’ ஜென்டிலாக பேச ஆரம்பித்தார் ரோகின் வெங்கடேசன்.

தலைப்பு கவித்துவமா, காதல் கனி ரசம் வழியுதே?

எழுத்தாளர் ஜி.ஆர்.சுரேந்திரநாத்தும் நானும் சேர்ந்து ஒரு ஷார்ட் ஃபிலிம் பண்ணினோம். அதுல ஒரு இன்ட்ரஸ்ட்டிங்கான காட்சி வரும். அந்தக் காட்சியிலிருந்துதான் இந்தக் கதையை நாங்க எழுத ஆரம்பிச்சோம். கதை எழுதி முடிச்சதும் ‘தீராக் காதல்’ தலைப்பு பொருத்தமா இருந்துச்சு. செகண்ட் ஆப்ஷனா சில தலைப்புகளைத் தேடினோம். அங்கே சுத்தி, இங்கே சுத்தி மறுபடியும் ஆரம்பிச்ச இடத்துக்கே வந்தோம். அந்த விதத்துல தலைப்பு கதையோடு நூறு சதவீதம் பொருத்தமா இருக்கும். இந்த தலைப்புதான் எங்க டீமோட விருப்பமாகவும் இருந்துச்சு.

காதல் கதையில் புதுசா என்ன சொல்லப்போறீங்க?

காதல் படத்துல புதுசா என்ன சொல்லப் போகிறோம் என்பதைவிட எப்படி சொல்லப் போகிறோம் என்பது முக்கியம். நாம எல்லோரும் ரிலேட் பண்ணிக்கிற எமோஷன் காதல். ஏனெனில், காதல் இல்லாத மனிதர்களே கிடையாது. காதலில் எவ்வளவு சந்தோஷம் இருக்கிறதோ அதே அளவுக்கு சவாலும் இருக்கு. அந்த சவால்களைத் தாண்டி எப்படி ஜெயிக்கிறார்கள் அல்லது எப்படி தோற்றுப்போகிறார்கள் என்பதுதான் எல்லாருடைய காதல் அனுபவமா இருக்கும்.

அந்தவிதத்துல, அனைவரும் மிக எளிதா ரிலேட் பண்ணிக்கிற மாதிரியான கதையா இருக்கணும் என்பதை மனசுல வெச்சு உருவான கதை இது.

இரண்டு அழகான பெண்களுக்கு நடுவே ஒரு இளைஞன். ஜெய், ஐஸ்வர்யா ராஜேஷ், ஷிவதானு மூணு பேருமே ஒரு நல்ல படம் பண்ணுவதற்கு உதவியா இருந்தாங்க.