என்ன காரணம்..?

25 வயதான இளைஞர் உடற்பயிற்சிக்கூடத்தில் மாரடைப்பால் மரணம், 12 வயது சிறுவன் மயங்கி விழுந்து மாரடைப்பால் மரணம், 38 வயது நபர் விமானத்திலேயே மாரடைப்பால் உயிரிழப்பு... இவையெல்லாம் கடந்த ஒரு வாரத்தில் செய்தித்தாள்களில் வந்த நிகழ்வுகள்.

- டாக்டர் சென் பாலன்

• 27 வயது இளைஞருக்கு பரோட்டா சாப்பிடும்போது மாரடைப்பு...
• 16 வயது சிறுமிக்கு குளிர் மற்றும் நொறுக்குத் தீனியால் மாரடைப்பு...
• 14 வயது சிறுமிக்கு டியோடரண்ட் அடித்தபோது மாரடைப்பு...
• 12 வயது சிறுவனுக்கு காரணமே இல்லாமல் மாரடைப்பு...

இவற்றைப் படிக்கும் அனைவருக்கும் ஒருவித பயம், பதற்றத்தை உண்டாக்கும் அளவு முக்கியமான நிகழ்வுகள்.

ஏன் இப்படி நிகழ்கிறது? பன்னிரண்டு வயதுச் சிறுவனுக்கு மாரடைப்பு வருமா? ஜிம்மில் உடற்பயிற்சி செய்து உடலைக் கட்டுக்கோப்பாக வைத்திருப்பவருக்கு ஹார்ட் அட்டாக் வருமா? இதை எப்படி முன்கூட்டி அறிவது? வராமல் தடுக்க என்ன செய்ய வேண்டும்... எனப் பல கேள்விகள். இவற்றையெல்லாம் ஒவ்வொன்றாகப் பார்ப்போம்.

முதலில் மாரடைப்பு, இதயச் செயலிழப்பு இந்த இரண்டுக்கும் உள்ள வித்தியாசங்களைப் பார்ப்போம்.

உடலில் இருக்கும் அனைத்து உறுப்புகளும் ஒழுங்காக வேலை செய்ய இரத்த ஓட்டம் அவசியம். இரத்த ஓட்டத்தின் மூலமே உறுப்புகள் தங்களுக்குத் தேவையான ஆக்ஸிஜனையும், உணவுப் பொருட்களையும் பெறுகின்றன.