ஜேசுதாஸின் குருவிடம்தான் மிஷ்கின் இசையை கற்றுக்கொண்டார்!

தமிழ் சினிமாவின் தவிர்க்க முடியாத இயக்குநர்களில் ஒருவர் மிஷ்கின். இயக்குநர், நடிகர் என பல தளங்களில் இயங்கிவரும் அவர் ‘டெவில்’ படத்தின் மூலம் இசையமைப்பாளராக களமிறங்கியுள்ளார்.

- எஸ்.ராஜா

இதன் இயக்குநர் ஆதித்யா. ‘சவரக்கத்தி’ இயக்கியவர். இவர் மிஷ்கின் தம்பி என்பது கூடுதல் தகவல். இறுதிக் கட்ட வேலைகளில் பிஸியாக இருந்த ஆதித்யாவிடம் பேசினோம்.

‘சவரக்கத்தி’க்குப் பிறகு படம் செய்வதற்கு இவ்வளவு காலதாமதம் ஏன்?

‘சவரக்கத்தி’ வெளியான பிறகு பிரபல சேனலுக்கு ‘கண்ணாமூச்சி’ என்ற வெப் சீரிஸ் பண்ணிக்கொடுத்தேன். அந்த சீரிஸுக்கு நான் ரைட்டர் மட்டுமே. அப்போது ‘துப்பறிவாளன் 2’, ‘பிசாசு - 2’ என அண்ணனுடைய படங்களிலும் ஒர்க் பண்ணிட்டிருந்ததால அடுத்த படத்தை உடனே ப்ளான் பண்ண முடியவில்லை.

என்னுடைய நீண்ட நாள் நண்பர் சேகர். அவர் அண்ணனிடம் ‘அஞ்சாதே’ காலக்கட்டத்தில் மானேஜராக வேலை பார்த்தவர். சினிமாவைத்தாண்டி எங்களிடையே நட்பு உண்டு. அப்போது உதவி இயக்குநராக அவரிடம் என்னுடைய கதைகளைச் சொல்வது வழக்கம்.

ஒரு நாள் சேகர் போன் பண்ணி அவசரமாக புறப்பட்டு பாம்குரோவ் ஹோட்டலுக்கு வரச் சொன்னார். அங்கு தயாரிப்பாளர் சங்க துணைத் தலைவரான ராதாகிருஷ்ணன் சாரை அறிமுகம் செய்து வைத்து ‘டெவில்’ கதையைச் சொல்லச் சொன்னார். சாருக்கு கதை பிடித்துப்போகவே அந்த இடத்திலேயே தயாரிக்க முடிவு செய்து அட்வான்ஸ் கொடுத்தார்.

அண்ணன் தம்பி இருவருக்கும் பேய்க் கதையை விட்டால் வேற கதை பண்ணத்தெரியாதா?

‘சவரக்கத்தி’ ப்ளாக் ஹியூமர் படம். அந்தக் கதையில் சிகை அலங்காரம் செய்யக்கூடிய ஒருவரின் இயல்பு வாழ்க்கையையும், பரோலில் வெளிவந்த  மங்களா என்பவனின் உக்கிர கோபத்தையும்  யதார்த்தமாக பதிவு செய்திருப்பேன்.

கத்தி என்பது புத்தியை தீட்டணுமே தவிர, அடுத்தவரின் உயிரை எடுக்கும் ஆயுதமல்ல என்பதை சொன்னேன். காந்தி, நெல்சன் மண்டேலா போன்ற மேதைகள் பிறக்கும்போது தொப்புள் கொடியை அறுக்க உதவும் உன்னதமான ஆயுதமாகவும் கத்தி பயன்படும் என்பதையும் சொல்லியிருப்பேன்.

இந்தப் படத்துக்கு ஏன் ‘டெவில்’னு தலைப்புனு கேட்கலாம். நம்ம வீட்ல அம்மா, மனைவி, அக்கா, தங்கச்சி என பல பெண்கள் இருப்பார்கள். வாழ்க்கை எப்போதும் சந்தோஷமாகவே இருப்பதில்லை.