ஏஜென்ட் கெளசி...குட்டி வீரன்...ஜூனியர் டார்க் டெவில்...

இன்ஸ்டாகிராமில் சரசரவென ரீல்ஸ்களையும், யூடியூபில் மடமடவென வீடியோக்களையும் கடந்து செல்லும்போது கண்ணில் பட்டார்கள் இந்த ஆர்கே ஃபிளையிங் ஸ்க்வாட் கேங்.

- ஷாலினி நியூட்டன்

‘விக்ரம்’ படத்தின் சிக்னேச்சர் சண்டைக் காட்சியான ஏஜென்ட் டீனாவின் மாஸ் ஆக்‌ஷன் சண்டை, ‘வீரன்’ படத்தின் ஹிப்ஹாப் ஆதி வீரனாக மாறி எதிரிகளை சுளுக்கெடுக்கும் காட்சி, டார்க் டெவில் கேரக்டரில் வங்கியில் ஸ்டைலாக சண்டையிடும் ‘துணிவு’ படத்தின் அஜித்குமார் காட்சி... என இப்படி மிகவும் கடினமான காட்சிகளை அப்படியே தத்ரூபமாக மீண்டும் உருவாக்கி, அதனை மொபைலிலேயே வீடியோவாக பதிவேற்றுகிறார்கள் ஆர்கே ஃபிளையிங் ஸ்க்வாட் குழு.

யார் இவர்கள்... எல்லாம் அதிகபட்சம் 25 வயதைக் கூட கடந்திருக்க மாட்டார்கள் போலவே... அவ்வளவு டெக்னிக்கலான காட்சியை எப்படி வெறும் மொபைலில் இவர்களால் உருவாக்க முடிகிறது... என்னும் பல கேள்விகள் மண்டையைக் குடைய, தொடர்பு கொண்டோம்.‘‘என்னுடைய ஸ்டூடண்ட்ஸ்தான், என்னுடைய கலை வாரிசுகள்தான் இவர்கள் எல்லாம்...’’ பெருமையும், மகிழ்ச்சியுமான குரலில் பேசுகிறார் ஆர்கே ஃபிளையிங் ஸ்க்வாட் குழுவின் மாஸ்டரும், உரிமையாளர் மற்றும் நிர்வாகியுமான ரத்னகுமார்.

‘‘E.ரத்னகுமார்... இதுதான் என்னுடைய முழுப் பெயர். நான் 6ம் வகுப்பு படிச்சிருக்கேன். தூத்துக்குடி, மகாநகர்தான் சொந்த ஊர். அப்பா மெக்கானிக், அம்மா ஹவுஸ் ஒயிஃப்.
சின்ன வயதிலேயே வேலைக்குப் போகவேண்டிய சூழல். அதே நேரம்தான் இந்த தூர்தர்ஷன்ல அப்போதெல்லாம் சனிக்கிழமைகள்ல ஆங்கிலப் படங்கள் போடுவாங்க. அதிலேதான் இந்த மார்ஷியல் ஆர்ட்ஸ், கராத்தே மேலே எல்லாம் ஆர்வம் வந்தது.

இதைக் கத்துக்கறதுக்காக சுமார் 15 கிமீ பயணிச்சு போவேன். வெறும் மண்ணாக இருந்தவனை ஒரு சிலையாக உருவாக்கினது என்னுடைய கராத்தே மாஸ்டர் முருகேசன். எனக்கு உயிர் கொடுத்து ஆளாக்கி உருவாக்கினது ஜிம்னாஸ்டிக் மாஸ்டர் ஆர்.கே. ராமர் மாஸ்டர்தான்.ஆர்.கே. மாஸ்டர்தான் எனக்கு வாழ்க்கைன்னா என்னன்னு சொல்லிக் கொடுத்தவர். ஜிம்னாஸ்டிக் பயிற்சி எடுத்துக்கிட்டிருக்கும் பொழுதே ஒரு கட்டத்தில் ‘நீயே பயிற்சி எடுக்க ஆரம்பி’ என சொல்லி, என்னை மாஸ்டராக மாற்றியதும் அவர்தான்.