മദഗജരാജയുടെ വിജയഫോർമുല എന്താണ്?

മദഗജരാജയുടെ പ്രൊമോഷനുമായി ബന്ധപ്പെട്ട ഒരു ഇവന്റിൽ നടി ഖുശ്ബു കടന്നുവരുന്ന വീഡിയോ വൈറലായിരുന്നു

- അനീഷ് മോഹനചന്ദ്രൻ

ഏകദേശം ഒരു വ്യാഴവട്ടം മുമ്പ് ചെന്നൈയിൽ ഒരു സിനിമയുടെ ചിത്രീകരണം പൂർത്തിയാകുന്നു. പക്ഷേ, ചില നിയമപ്രശ്നങ്ങളിൽ കുരുങ്ങി ആ പടം പെട്ടിയിൽ തന്നെ ഒതുങ്ങുന്നു. നിരവധി ഹിറ്റ് ചിത്രങ്ങൾ ഒരുക്കിയിട്ടുള്ള സംവിധായകൻ മെല്ലെ ഔട്ട് ഡേറ്റഡ് ആകുന്നു. എന്നാൽ ആ ചിത്രത്തിലെ അഭിനേതാക്കൾ പലരും സൂപ്പർ താരങ്ങളായി വളരുന്നു. ചിലർ സിനിമാ ഇൻഡസ്ട്രിയിലെ തന്നെ ഒപ്പീനിയൻ മേക്കേഴ്സ് ആകുന്നു. അതേസമയം, ചില മുതിർന്ന താരങ്ങൾ കാലയവനികയ്ക്കുള്ളിൽ മറയുന്നു. അപ്പോഴും പ്രസ്തുത സിനിമ പെട്ടിക്കുള്ളിൽ തന്നെ.

വർഷങ്ങൾക്കിപ്പുറം തിര ഉലകത്തിൽ പല കയറ്റിറക്കങ്ങളും സംഭവിക്കുന്നു. ചിലർ വീഴുന്നു. മറ്റുചിലർ വാഴുന്നു. അന്നേരമാണ് അന്നത്തെ ആ സൂപ്പർഹിറ്റ് സംവിധായകന് മനസ്സിൽ ഒരു ആശ ഉദിക്കുന്നത്. ലാഭമായാലും നഷ്ടമായാലും വേണ്ടില്ല, അന്നത്തെ ചിത്രം ജനം കാണണം. അതൊരു വാശിയായി അദ്ദേഹത്തിന്റെ ഉള്ളിൽ കിടന്ന് തിളച്ചു മറിയുന്നു. പിന്നെല്ലാം ചടുല വേഗത്തിൽ. സ്വന്തം പോക്കറ്റിൽ നിന്നും കോടികൾ ഒഴുക്കി അദ്ദേഹം ചിത്രത്തിന്റെ റൈറ്റ്സ് സ്വന്തമാക്കുന്നു. നിയമത്തിന്റെ നൂലാമാലകളെല്ലാം അഴിച്ചെടുത്ത് പ്രസ്തുത ചിത്രം റിലീസിനായി എത്തിക്കുന്നു. അപ്രതീക്ഷിതമെന്ന് പറയട്ടെ, പൊങ്കൽ റിലീസായി എത്തിയ ചിത്രം ഇതര താരങ്ങളുടെ ചിത്രങ്ങളെയെല്ലാം മറി കടന്ന് ഒന്നാം സ്ഥാനത്തേയ്ക്ക് എത്തുന്നു. അതെ. പറഞ്ഞു വരുന്നത് പൊങ്കൽ ബ്ലോക്ക്ബസ്റ്റർ റിലീസ് മദ ഗജരാജയെക്കുറിച്ച് തന്നെയാണ്.