બનો પ્લંબર પ્લંબિંગ એક ઉત્તમ રોજગાર

પછી ૧૯૪૭ માં દેશના ભાગલા સમયે જ્યારે કોલકાતાના મોટાભાગના પ્લંબર પાકિસ્તાન ચાલ્યા ગયા, ત્યારે કેન્દ્રપાડાના પ્લંબર માટે આ સ્થિતિ એક સુવર્ણ તક બની ગઈ

- સુનીલ શર્મા

થોડા દિવસ પહેલાં જ્યારે અમારા બાથરૂમના વોશ બેસિનમાં થોડી સમસ્યા થઈ, ત્યારે પ્લંબરને બોલાવવામાં આવ્યો. તેણે આવતાં થોડી મિનિટમાં વોશ બેસિન ઠીક કરી દીધું અને પોતાના મહેનતાણા રૂપે ૧૦૦ રૂપિયા લઈ લીધા. સામાનનો ખર્ચ અલગથી હતો.

તે પ્લંબરને જ્યારે મેં દિવસભરની કમાણી પૂછી, ત્યારે તેણે હસીને કહ્યું કે પોતે સારું એવું કમાઈ લે છે.

મૂળ ઓરિસ્સાના રહેવાસી આ પ્લંબર કૃપાસિંહે મને બીજી એક આશ્ચર્યકારક વાત જણાવી કે ઓરિસ્સાનો કેન્દ્રપાડા જિલ્લો પ્લમ્બિંગ કામનો હબ છે અને ત્યાંથી દેશના ૭૦ ટકા પ્લંબર આવે છે. એટલું જ નહીં, આ જિલ્લાના એક ગામ પટ્ટામુંડાઈમાં દર બીજા ઘરમાં એક પ્લંબર છે અને તેનું કારણ છે ગામ પટ્ટામુંડાઈમાં બનેલું ‘સ્ટેટ ઈન્સ્ટિટ્યૂટ ઓફ પ્લમ્બિંગ ટેક્નોલોજી’ છે.

કેન્દ્રપાડાનું પટ્ટામુંડાઈ, ઔલ રાજકનિકા અને રાજનગર ગામ તેમજ તેની આસપાસના કસબામાં શાનદાર ઘર બનેલા છે, જે પ્લમ્બિંગની જ ભેટ છે. આ ગામના લગભગ ૧,૦૦,૦૦૦ લોકો (આ સંખ્યા વધારે પણ હોઈ શકે છે) દેશવિદેશમાં પ્લંબર તરીકે કામ કરે છે. એક તરફ દેશના મોટાભાગના નવયુવાનો ડોક્ટર અથવા એન્જિનિયર બનવાના સપનાં જોતા હોય છે, ત્યારે આ વિસ્તારના નવયુવાનો ઉત્તમ પ્લંબર બનવાનું વિચારે છે. અહીં પ્રશ્ન થાય કે આવું કેમ છે? હકીકતમાં, અહીંના લોકોએ આ કામ વર્ષ ૧૯૩૦ થી શીખવું શરૂ કર્યું હતું. તે સમયે કોલકાતામાં બ્રિટિશ કંપનીને પ્લંબરની જરૂર હતી અને આ કામ શીખવાથી કેન્દ્રપાડાના કેટલાક છોકરાઓને ત્યાં નોકરી મળી ગઈ હતી.

પછી ૧૯૪૭ માં દેશના ભાગલા સમયે જ્યારે કોલકાતાના મોટાભાગના પ્લંબર પાકિસ્તાન ચાલ્યા ગયા, ત્યારે કેન્દ્રપાડાના પ્લંબર માટે આ સ્થિતિ એક સુવર્ણ તક બની ગઈ. ત્યાર પછી બીજા લોકો પણ મોટી સંખ્યામાં આ કામ શીખવા લાગ્યા. આજે સ્થિતિ એ છે કે એકલા પટ્ટામુંડાઈ ગામમાં ૧૪ બેંકની બ્રાન્ચ છે.