അയൽനാട്ടിൽ ആനുകൂല്യങ്ങളേറെ

തമിഴ്നാട്ടിലെ തെങ്കാശിയിൽ മലയാളികളുടെ പാട്ടക്കഷി

- ജോബി ജോസഫ് തോട്ടുങ്കൽ

സംസ്ഥാനത്തോടു ചേർന്നു കിടക്കുന്ന കർണാടക, തമിഴ്നാട് ഗ്രാമങ്ങളിൽ സ്ഥലം പാട്ടത്തിനെടുത്ത് വൻ തോതിൽ ഇഞ്ചിയും വാഴയും പച്ചക്കറികളും സൂര്യകാന്തിയുമെല്ലാം കൃഷി ചെയ്യുന്ന ഒട്ടേറെ മലയാളികളുണ്ട്. അവരെ അങ്ങോട്ടാകർഷിക്കുന്ന ഘടകങ്ങളെന്തൊക്കെയാണ്? സ്ഥലലഭ്യത, കുറഞ്ഞ പാട്ടത്തുക, കുറഞ്ഞ കൂലിനിരക്ക്, യോജിച്ച കാലാവസ്ഥ, സൗജന്യ വൈദ്യുതി എന്നിങ്ങനെ അനുകൂല ഘടകങ്ങൾ പലതുണ്ടെന്നു തെങ്കാശിയിലെ മലയാളിക്കർഷകൻ ബിന്ദുലാൽ. ഗൾഫ് ജോലി ഉപേക്ഷിച്ചെത്തിയ തിരുവനന്തപുരം സ്വദേശികളായ ബിന്ദുലാലും അനിലും, വിദേശത്തു തന്നെ തുടരുന്ന സഞ്ജു, സജീവ്, രാജേഷ് എന്നിവരും ചേർന്ന് കഴിഞ്ഞ വർഷമാണ് തെങ്കാശിക്കടുത്തു കടയം തെക്ക് മടത്തൂരിൽ കൃഷി തുടങ്ങിയത്. 80 ഏക്കർ സ്ഥലമാണ് ഇവിടെ പാട്ടത്തിനെടുത്തിരിക്കുന്നത്. അതിൽ 40 ഏക്കറോളം സ്ഥലത്ത് നിലവിൽ കൃഷിയിറക്കിക്കഴിഞ്ഞു. ബാക്കി സ്ഥലത്ത് പോത്ത് ഉൾപ്പെടെ മൃഗ പക്ഷി പരിപാലനമാണ് ലക്ഷ്യം. പരീക്ഷണമെന്ന നിലയിൽ പോത്തുവളർത്തൽ തുടങ്ങി.

വിശാലമായ സ്ഥലലഭ്യത

ഹെക്ടർ കണക്കിനു സ്ഥലം ഒരുമിച്ചു ലഭിക്കുമെന്നതാണ്അ യൽനാട്ടിലെ ഏറ്റവും വലിയ ഗുണം. കേരളത്തിൽ കൃഷിയിടങ്ങൾ തുണ്ടുഭൂമികളായതിനാൽ അതിന് അവസരമില്ല. സംസ്ഥാനത്തു നടപ്പാക്കിയ ഭൂപരിഷ്കരണ നിയമം സാമൂഹികനീതി ഉറപ്പാക്കിയെങ്കിലും കൃഷിക്കു ദോഷമായെന്നു ബിന്ദുലാൽ. എങ്കിലും നമ്മുടെ നാട്ടിൽ ഒട്ടേറെ സ്ഥലങ്ങൾ തരിശുകിടക്കുന്നുണ്ട്. പരിപാലനമില്ലാതെ ഉൽപാദനക്ഷമത ഇടിഞ്ഞുപോയ കൃഷിയിടങ്ങളുമുണ്ട്. കൃഷി ചെയ്യാൻ താൽപര്യപ്പെടുന്നവർക്ക് ഇവ പാട്ടത്തിനു നൽകിയാൽ നമുക്കും വാണിജ്യോൽപാദനം സാധ്യമാകുമെന്നു ബിന്ദു ലാൽ.