പാട്ടക്കരാർ വേണ്ടാ സേവനക്കരാർ മതി

കേരളത്തിൽ ഭൂമി പാട്ടത്തിനെടുത്ത് വിപുലമായി കൃഷി നടത്തുന്നവർ നേരിടുന്ന പ്രശ്നങ്ങൾ കഴിഞ്ഞ ലക്കത്തിൽ ചൂണ്ടിക്കാട്ടിയിരുന്നല്ലോ. അവയോടു കൃഷിവകുപ്പ് സ്പെഷൽ സെക്രട്ടറി എൻ. പ്രശാന്ത് പ്രതികരിക്കുന്നു

- എൻ. പ്രശാന്ത്

ഒരു ഭാഗത്ത് പുരയിടങ്ങൾ അനാഥമായി കാടു പിടിക്കുമ്പോൾ മറുഭാഗത്ത് ആധുനിക രീതിയിൽ കൃഷി ചെയ്യാൻ ആഗ്രഹിക്കുന്നവർക്ക് ഭൂമി കിട്ടാനില്ലാത്ത സ്ഥിതിയാണ് കേരളത്തിൽ. കേരളസമൂഹത്തിന്റെ മുഖമുദ്ര പരസ്പരവിശ്വാസക്കുറവാണെന്നു വിലയിരുത്തി 2018 ൽ ഒരു സ്വീഡിഷ് സർവകലാശാല പ്രസിദ്ധീകരിച്ച ഗവേഷണ റിപ്പോർട്ട് ഓർമ വരുന്നു. ഇരുകൂട്ടരും ഭൂവുടമകളും കർഷകരും - ആവശ്യക്കാരായിട്ടും പരസ്പരം വിശ്വസിച്ചു സഹകരിക്കാൻ സാധിക്കാത്ത അവസ്ഥ.

നല്ലൊരു വക്കീലിനെ ഏൽപിച്ചാൽ ആർക്കും ബുദ്ധിമുട്ടുണ്ടാവാത്തവിധം സർവീസ് ലെവൽ എഗ്രിമന്റിലൂടെ നേട്ടമുണ്ടാക്കാവുന്നതേയുള്ളൂ. പാട്ട വ്യവസ്ഥയോ ഭൂമികൈമാറ്റമോ ഇല്ലാതെതന്നെ ഇന്ത്യൻ കോൺട്രാക്ട് നിയമത്തിനു കീഴിൽ സേവന കരാർ റജിസ്റ്റർ ചെയ്യാം.

ഏതാണ്ട് 90,000 ഹെക്ടർ ഭൂമിയാണ് കേരളത്തിൽ ഉപയോഗിക്കാതെ കിടക്കുന്നത്. എഫ്പി/കൃഷിക്കൂട്ട ങ്ങൾ/കാർഷിക സംരംഭകരെക്കൊണ്ട് ഈ തരിശുഭൂമികൾ ഏറ്റെടുപ്പിച്ചു കൃഷി ചെയ്യിക്കാൻ കൃഷിവകുപ്പ് മുന്നിട്ടിറ ങ്ങിയാൽ സാധിക്കും. അതിനു മുന്നോടിയായി പാട്ടക്കരാർ പ്രകാരം വലിയ വിസ്തൃതിയിൽ വിജയകരമായി കൃഷി ചെയ്യുന്നവരുടെ ഡേറ്റാബേസ് തയാറാക്കണം. തരിശുഭൂമി യിൽ കൃഷി ചെയ്യണമെന്ന് ആഗ്രഹിക്കുന്നവരെ ഫണ്ടിങ് ഏജൻസികളുമായും നിക്ഷേപകരുമായും ബന്ധിപ്പിക്കുക വഴി അവരെ സാമ്പത്തികമായി ശക്തരാക്കാം.

പരിഹാരവഴികൾ ഇങ്ങനെ

വലിയ തോതിൽ ഭൂമി കൈവശം വയ്ക്കുന്നതിന് നിലവിൽ കേരളത്തിലെ നിയമങ്ങളും നിയന്ത്രണങ്ങളും അനുകൂലമല്ല. അതിനാൽ, ഭൂവുടമ തനിയെ വലിയ തോതിൽ കൃഷി നട ത്തുന്നതിനു പരിമിതികളുണ്ട്. ഇതിനു മൂന്നു പരിഹാര മാർഗങ്ങൾ നിർദേശിക്കട്ടെ. ഒന്ന്, പാടശേഖരങ്ങളിലേതു പോലെ ഭൂവുടമകൾ പരസ്പരം സഹകരിച്ച് കൃഷി ആസൂത്രണം ചെയ്ത് വിളവെടുക്കുന്ന രീതി. പൈനാപ്പിൾ കർഷകർ വാഴക്കുളത്ത് സഹകരിച്ച് വിളവെടുക്കുന്നതു പോലെ. എന്നാൽ പരസ്പര സഹകരണം, വിശ്വാസം, നേതൃത്വം അംഗീകരിക്കൽ എന്നിവ ആവശ്യമാണ്.