പ്രകൃതിക്കൃഷിക്ക് പിന്നിലെ ശാസ്ത്രം

ആന്ധ്രപ്രദേശിലെ പ്രകൃതിക്ക്യഷി മുന്നേറ്റത്തിനു ചുക്കാൻ പിടിച്ച ടി. വിജയകുമാർ ഐഎഎസ് തന്റെ തന്ത്രങ്ങളും സമീപനങ്ങളും വിശദീകരിക്കുന്നു

രാസവളമോ കീടനാശിനിയോ ഇല്ലാതെ നല്ല വിളവ് നേടുന്നുണ്ടെങ്കിൽ അതിനു പിന്നിൽ ഒരു ശാസ്ത്രമുണ്ട്. അല്ലാത്തപക്ഷം ആ വിള നന്നായി വളരില്ലായിരുന്നു. ശരിയല്ലേ? ഓരോ വർഷം പിന്നിടുമ്പോഴും കൃഷിക്കാർ പ്രകൃതികൃഷിയിൽ ഉറച്ചു നിൽക്കുന്നെങ്കിൽ പിന്നെ ആരുടെ സാധൂകരണമാണ് ഇനി വേണ്ടത് ! ശാസ്ത്രീയമെന്നു വിളിക്കപ്പെടുന്ന കൃഷിരീതികളാണ് ഇനിയും അംഗീകാരം നേടേണ്ടത്.'' പ്രകൃതികൃഷി ശാസ്ത്രീയമായി തെളിയിക്കപ്പെട്ടതല്ലെന്ന ആരോപണത്തോട് പ്രതികരിക്കുകയായിരുന്നു ആന്ധ്രയിലെ പ്രകൃതികൃഷിവിപ്ലവത്തിന്റെ നായകനും പദ്ധതി നടത്തിപ്പിനു ചുമതലപ്പെട്ട ആർവൈഎസ്എസ് കമ്പനിയുടെ എക്സിക്യൂട്ടീവ് വൈസ് ചെയർമാനുമായ ടി. വിജയകുമാർ ഐഎഎസ്.

? മറ്റു പല ബദൽ കൃഷിരീതികളു ണ്ടായിട്ടും സീറോ ബജറ്റ് പ്രകൃതി കൃഷി തിരഞ്ഞെടുക്കാൻ കാരണം

രണ്ടു ദശകം നീണ്ട യാത്രയിലൂടെയാണ് ഞങ്ങൾ പ്രകൃതികൃഷിയിലേക്ക് എത്തിയത്. 2004 ൽ രാസകീടനാശിനികൾ ഒഴിവാക്കിയായിരുന്നു തുടക്കം. എൻപിഎം പ്രോഗ്രാം എന്നറിയപ്പെട്ട ആ പദ്ധതിയുടെ ലക്ഷ്യം പക്ഷേ, കൃഷിച്ചെലവ് കുറയ്ക്കാൻ കർഷകരെ സഹായിക്കുക മാത്രമായിരുന്നു 3 -4 വർഷത്തോളം ഈ രീതിയിൽ വിഷരഹിതകൃഷി തുടർന്നു. അക്കാലത്ത് ഒരുവിധം എല്ലാ ബദൽ കൃഷിരീതികളും പഠന വിധേയമാക്കി. 2007 ൽ സുഭാഷ് പലേക്കറെ കാണാനിടയായി. രാസകീടനാശിനി മാത്രമല്ല, രാസവളങ്ങളും ഒഴിവാക്കാമെന്ന് അദ്ദേഹമാണ് എന്നോടു പറഞ്ഞത്. മഹാരാഷ്ട്രയിലും കർണാടകയിലുമൊക്കെ സുഭാഷ് പലേക്കറെ പിന്തുടരുന്നവരുടെ അനുഭവങ്ങൾ അറിയാൻ ഞാൻ ഒരു പ്രതിനിധി സംഘത്തെ അയച്ചു. ആ കർഷകരെല്ലാം നല്ല രീതിയിൽ ജീവിക്കുന്നുണ്ടെന്നായിരുന്നു അവരുടെ റിപ്പോർട്ട്. വൈകാതെതന്നെ സീറോ ബജറ്റ് കൃഷിയിൽ പരിശീലനം നൽകാൻ ഞങ്ങൾ പാലേക്കറെ ഇവിടെ കൊണ്ടുവന്നു.