ગર્ભ ધારણ એ પણ 30ની ઉમર પછી! ફાયદા અને નુકસાન શું તમને ખબર છે.

આજના યુગમાં છોકરાથી પણ વધુ છોકરીઓ પોતાની કારકિર્દી માટે સજાગ જોવા મળે છે. આમ, થોડા સમયથી છોકરીઓમાં મોટી ઉંમરે લગ્ન કરવાનું ચલણ વધવા માંડયું છે. તેમાં પણ 30 વર્ષ બાદ માતૃત્વ ધારણ કરવું એ કોઇ નવી વાત નથી. 30 વર્ષની ઊંમર પછી માતા બનવાનો નિર્ણય લેવા પાછળ ઘણા કારણો હોય શકે છે. પરંતુ જો તમે મોટી ઉંમરે બેબી પ્લાન કરવા માંગતા હોવ તો તેના કાયદા અને નુકસાન વિષે માહિતી હોવી જોઈએ.

આ માટે પહેલો પ્રશ્ન એ થાય કે પ્રેગનેન્સી માટેની શ્રેષ્ઠ ઉંમર કઈ? વૈજ્ઞાનિક દૃષ્ટિએ વીસ વર્ષે સ્ત્રીઓનું શરીર સૌથી વધારે ફળદ્રુપ હોય છે. આ સમયે તેમના શરીરમાં સારી ગુણવત્તાના બીજ બનતા હોય છે. 25 વર્ષની ઉંમરે 80 ટકા કિસ્સામાં બાળક માટે કપલ ટ્રાય કરે તો તેના ત્રણ મહિનામાં સ્ત્રીને ગર્ભ રહી શકે છે. આમ, 25 થી 29 વર્ષની ઉંમરે સ્ત્રીઓ માટે ગર્ભ ધારણ કરવા માટેનો સમય શ્રેષ્ઠ માની શકાય.

ત્યારબાદ સ્ત્રી 30 થી વધુ વર્ષની થાય ત્યારબાદ તેની ફર્ટિલિટી ધીરે ધીરે ઘટતી જાય છે. 35 વર્ષ પછી ફર્ટિલિટી વધુ ઝડપથી ઘટવા માંડે છે. વૈજ્ઞાનિકોના મતે સ્ત્રી જન્મે ત્યારે તેના શરીરમાં 10 લાખ એગ્સ હોય છે. સમય વીતતા આ એગ્સની સંખ્યા ઘટવા માંડે છે. 37 વર્ષની વય બાદ ફક્ત 25,000 જેટલા જ એગ્સ બચે છે. આથી 25 વર્ષે ત્રણ મહિનામાં ગર્ભ ધારણ કરવાનો ચાન્સ જે 80 ટકા હતો તે 37 વર્ષે ઘટીને 12 ટકા જેટલો થઈ જાય છે. તો 40 વર્ષ બાદ આ ચાન્સ ઘટીને 7 ટકા જેટલો થઈ જાય છે.

આમ, જે કપલને બાળક જોઈતું જ હોય તેમણે 30ની ઉંમર સુધીમાં ફટાફટ નિર્ણય કરી લેવો જોઈએ. 30થી 34 વર્ષ સુધી ગર્ભવતી થવુ સહેલુ છે પણ 35 વર્ષ પછી મુશ્કેલી વધતી જાય છે. આમ, જો બે બાળકો ઈચ્છતા હોવ તો જરાપણ મોડુ ન કરો. સંશોધન મુજબ 35 વર્ષની ઉંમરે 20 ટકા મહિલાઓને નિયમિત સંભોગ બાદ પણ એક વર્ષ સુધી ગર્ભ રહેતો નથી.

ફાયદાઓ

30 વર્ષ પછી માતા બનવાના અનેક ફાયદા પણ સામે આવ્યા છે. આ સમય દરમ્યાન તમે કારકિર્દી અને જીવનસાથીને લઈને ઘણા નિશ્ચિંત થઈ ગયા હોવ છો. આમ, ફેમિલી માટે મજબૂત આધાર સેટ થઈ ગયો હોય છે. જો તમે બાળકના જન્મ બાદ ફરીથી જોબ શરુ કરશો તો પણ પહેલા જેટલું જ કમાઈ શકશો. નાની વયે માતા બનનારી છોકરીઓની આવક પર તેની લાંબાગાળાની અસર પડે છે.