പ്രായമായവരുടെ വീട്

ഒരിക്കൽ പ്രായമാകും, അല്ലെങ്കിൽ പ്രായമുള്ളവർ വിട്ടിലുണ്ടാകും... ഇത് ആലോചിച്ചു വേണം വീട് നിർമിക്കാൻ

- ശ്രീദേവി

വീട് വയ്ക്കുമ്പോൾ ചെറുപ്പമായിരിക്കും. പ്രായമുള്ളവർക്ക് ആവശ്യം വരുന്ന ചില കാര്യങ്ങളെക്കുറിച്ച് ആരും ചിന്തിക്കില്ല. എന്നാൽ മാതാപിതാക്കൾ പ്രായമാകുമ്പോഴും അസുഖബാധിതരാകുമ്പോഴുമൊക്കെയാകും വീട്ടിൽ ചില സൗകര്യങ്ങൾ ഇല്ല എന്ന കാര്യം ശ്രദ്ധയിൽപ്പെടുക. വീട് വയ്ക്കുമ്പോൾത്തന്നെ ചില കാര്യങ്ങൾ മുൻകൂ ട്ടിക്കണ്ട് പ്രവർത്തിച്ചാൽ ഭാവിയിലെ കുത്തിപ്പൊളിക്കലുകൾ ഇല്ലാതാക്കാം; അതിലേറെ അനാവശ്യ ടെൻഷൻ ഒഴിവാക്കാം.

കൈപ്പിടികൾ ഒഴിവാക്കരുത്

സിറ്റ്ഔട്ടിലെ പടികളോടു ചേർന്നു പിടിച്ചു കയറാൻ ഹാൻഡ്റെയിൽ കൊടുക്കണം. റെയിലിങ് ഇല്ലാത്ത ഡിസൈനുകൾ ഗോവണിയിൽ ഇപ്പോൾ വ്യാപകമാണെങ്കിലും അത് പ്രായമായവരെയും ആരോഗ്യപ്രശ്നങ്ങൾ ഉള്ളവരെയും പ്രയാസപ്പെടുത്താൻ സാധ്യതയുണ്ട്. ടോയ്ലറ്റിൽ നിന്നും ബാത് സ്റ്റൂളിൽ നിന്നും എഴുന്നേൽക്കാൻ സഹായിക്കുന്ന വിധത്തിൽ റെയിലിങ്ങുകൾ സ്ഥാപിക്കുന്നതും നല്ലതാണ്.

കട്ടിലിൽത്തന്നെ സ്ഥാപിക്കാവുന്ന ബെഡ് റെയിലിങ്ങുകളും വിപണിയിലുണ്ട്. പിടിച്ച് എഴുന്നേൽക്കാൻ മാത്രമല്ല, എഴുന്നേൽക്കാനുള്ള ശ്രമത്തിനിടെ കട്ടിലിൽ നിന്ന് വീഴാതിരിക്കാനും ഇത് സഹായിക്കും. നീളവും ഉയരവും അഡ്ജസ്റ്റ് ചെയ്യാൻ കഴിയുന്ന ബെഡ് റെയിലിങ്ങുകൾ വിപണിയിൽ ലഭിക്കും.

നല്ല പ്രകാശം

ചലനമുണ്ടാകുമ്പോൾ താനേ തെളിയുന്ന, മൂവ്മെന്റ് സെൻസറിങ് ലൈറ്റുകൾ മുറിയിലും ബാത്റൂമിലേക്ക് പോകുന്ന വഴിയിലും സ്ഥാപിക്കുന്നത് നന്നായിരിക്കും. കട്ടിലിൽ ഇരുന്ന് പ്രവർത്തിപ്പിക്കാവുന്ന വിധത്തിൽ ലൈറ്റ് സ്വിച്ച് മാത്രമല്ല, കോളിങ് ബെല്ലും സ്ഥാപിക്കണം.

വായുസഞ്ചാരവും സൂര്യപ്രകാശവും ഏതുപ്രായത്തിലുള്ളവരുടെ മുറിയിലും ആവശ്യമാണ്. പ്രായമായവരുടെ കാര്യത്തിൽ ഇത് പ്രത്യേകം ശ്രദ്ധിക്കണം. പകൽ ജനലുകൾ തുറന്നിടുക, മുറിയിൽ വായുസഞ്ചാരം ഉറപ്പാക്കുക. മഞ്ഞും മഴയും കിളികളും മരങ്ങളുമൊക്കെ കാണാവുന്ന വിധത്തിൽ വേണം പുറത്തിറങ്ങാൻ പറ്റാത്തവരുടെ മുറി ക്രമീകരിക്കാൻ മുറിയിൽ ഫിഷ് ടാങ്കോ ചെടികളോ ഒക്കെ വയ്ക്കുന്നത് ചിലർ ആസ്വദിക്കും. കൂടുതൽ നേരം ഇരിക്കേണ്ടി വന്നാൽ അതിന് സൗകര്യമൊരുക്കണം. ചാരുകസേരയോ കാൽ ഉയർത്തിവയ്ക്കാവുന്ന റിക്ലൈനറോ മുറിയിൽ ഇടാം. പ്രായമായവരുടെ മുറിയിൽ ടിവി ഉണ്ടാകുന്നത് വിരസതയകറ്റാൻ നല്ലതാണ്. മക്കളും പേരക്കുട്ടികളുമൊക്കെ വിദേശത്തുള്ളവർക്ക് വീഡിയോ കോൾ ടിവിയിലേക്ക് കണക്ട് ചെയ്ത് സംസാരിക്കാനുള്ള സൗകര്യവും ഒരുക്കാം.