മതിലഴകിന് ഏഴ് വള്ളിച്ചെടികൾ

ഒരു ചെറിയ സ്ഥലം പോലും വെറുതെ കളയാൻ ഇഷ്ടപ്പെടാത്ത ചെടിപ്രേമികളേ, മതിലും പൂക്കളാൽ അലങ്കരിക്കാം

ലാൻഡ്സ്കേപ്പിന്റെ ഭാഗമാണ് മതിലും മതിലിൽ പടരുന്ന ചെടികളും. മതിലിനെത്തന്നെ പച്ചയാ ക്കുന്നത് കാണാനും അഴകാണ്. മതിലിൽ ധാരാളം വെയിൽ കിട്ടുമെങ്കിൽ പൂക്കളുണ്ടാകുന്ന ചെടികൾ തന്നെ തിരഞ്ഞെടുക്കാം. പറമ്പും വീട്ടുമുറ്റവും തമ്മിൽ വേർതിരിക്കാനുള്ള ചെറിയ മതിൽ ചെടികൾ ഉപയോഗിച്ച് തന്നെ തീർക്കാം.

മണി പ്ലാന്റ് (pothos)

ചെടി പരിചരിക്കാൻ തീരെ സമയമില്ലാത്തവർക്കുപോലും നടാവുന്ന ചെടിയാണ് മണി പ്ലാന്റ്. ഗോൾഡൻ പോത്തോസിന്റെ കമ്പുകൾ മതിലിന്റെ രണ്ട് വശത്തുനിന്നും ഓരോ അടി അകലത്തിൽ നടണം. ഇത് പിടിച്ചുകയറി മതിൽ നിറയും. കൂടുതൽ വെള്ളവും വളവും ലഭിച്ചാൽ ഇലകൾ വലുതാകും. അതിനു സാഹചര്യമൊരുക്കാതിരിക്കാൻ ഇടയ്ക്കിടെ പ്രൂൺ ചെയ്തു കൊടുക്കാം.

കാറ്റ്സ് ക്ലോ (cat's law)

മതിലുകളെ മഞ്ഞപ്പൂക്കളാൽ ആറാടിക്കുന്ന ചെടിയാണ് കാറ്റ്സ് ക്ലോ. കരിംപച്ച ഇലകൾ തിങ്ങിനിറഞ്ഞ വള്ളിച്ചെടിയാണിത്. വർഷത്തിൽ മൂന്നോ നാലോ തവണ മാത്രമേ പൂക്കൾ ഉണ്ടാവുകയുള്ളൂ. എന്നാൽ പൂക്കുമ്പോൾ ഇല മറഞ്ഞ് പൂക്കൾ മാത്രമാകും എന്നതാണ് ഈ ചെടിയുടെ ഭംഗി. പൂക്കൾ ഇല്ലാത്തപ്പോൾ പോലും ഇലകളുടെ ഭംഗിയാൽ ആകർഷകമാണ്. ട്രോപ്പിക്കൽ ശൈലിയിലുള്ള വീടുകളിലേക്ക് വളരെയധികം യോജിക്കും. ക്ലൈംബിങ് ഫിഗ് പോലെ മതിലിൽ പറ്റിപ്പിടിച്ചുവളരുകയല്ല, മറിച്ച് വള്ളികൾ മതിലിനു പുറത്തേക്ക് മറിഞ്ഞു കിടക്കുന്ന രീതിയിൽ ക്രമീകരിക്കുകയാണ് ചെയ്യുന്നത്. അതുകൊണ്ടുതന്നെ ഇടയ്ക്കിടെ ഒരേ ഉയരത്തിൽ വെട്ടി ക്രമീകരിക്കണം. ധാരാളം വെള്ളവും പ്രകാശവും വേണം ഈ ചെടികൾക്ക്. മഴയില്ലാത്തപ്പോൾ നിത്യേന നനയ്ക്കണം.