ഒട്ടും കെയറില്ലാത്ത കസ്റ്റമർകെയർ

ഏജൻസിക്കാരൻ, കമ്പനി, കസ്റ്റമർ കെയർ, കസ്റ്റമർ കെയർ എക്സിക്യൂട്ടീവ് ആർക്കൊക്കെ എതിരെ പരാതി പറയണം, ആലോചിച്ചിട്ട് തലകറങ്ങുന്നു.

- കെ.കെ.ജയകുമാർ

രാവിലത്തെ ചായ കിട്ടിയില്ല. ഇരിപ്പു തുടങ്ങിയിട്ട് നേരം കുറെയായി. ഒരു ചായയിട്ടു കുടിക്കാം എന്നു കരുതി നേരെ അടുക്കളയിലേക്ക്. വെള്ളംവച്ച് ഗ്യാസ് കത്തിച്ചു. കത്തുന്നില്ല. നോക്കിയപ്പോൾ ഗ്യാസ് ഡിസ്കണക്റ്റഡ്. ഭാര്യ ക്രുദ്ധയായി പിറകിലുണ്ട്. ഗ്യാസ് ലീക്കാണെന്നു പറഞ്ഞിട്ട് ദിവസങ്ങളെത്രയായി. ഇനി ഇതു ശരിയാക്കിയിട്ടേ ചായയുള്ളൂ' ഭാര്യ അന്ത്യശാസനം നൽകി. ട്യൂബ് കേടാണ് എന്നുകണ്ട് ഓൺലൈനിൽ നല്ല ഐഎസ് ഐ മാർക്കുള്ള ട്യൂബ് വാങ്ങിയിട്ടിട്ട് അധികം ദിവസമായില്ല. "വീണ്ടും കേടായോ?' ഞാൻ ചോദിച്ചു.

"ഇതു ട്യൂബിന്റെ കേടല്ല. റെഗുലേറ്റർ കംപ്ലയിന്റാണ്.

ഏജൻസിയിൽ പോയി ഇതൊന്നു ശരിയാക്കൂ, എന്നായി ഭാര്യ. ഞാൻ റെഗുലേറ്ററും ട്യൂബുമായി ഗ്യാസ് ഏജൻസിയിലേക്ക്. അവർ രണ്ടും പരിശോധിച്ചിട്ട് റെഗുലേറ്ററിനല്ല, കുഴപ്പം ട്യൂബിനാണ് എന്നു പറഞ്ഞു അവരുടെ ട്യൂബ് തന്നു. 200 രൂപ. ഞാനതു കൊണ്ടുവന്നിട്ടു. രണ്ടു ദിവസം കഴിഞ്ഞു വീണ്ടും ഗ്യാസ് ലീക്ക്. വീണ്ടും ഏജൻസിയിലേക്ക്.