BODY BUILDING വേണം, കഠിനാധ്വാനം

ബോഡി ബിൽഡിങ് വെറും മസിൽ പെരുപ്പിക്കുന്ന വ്യായാമമല്ല. നിരവധി തൊഴിൽ അവസരങ്ങളിലേക്ക് വഴിതുറക്കുന്ന കായികയിനമാണ്. വർഷങ്ങളുടെ കഠിനാധ്വാനം വേണ്ടിവരുന്ന പാഷൻ...

- ടി.കെ. ഷറഫുദ്ദീൻ

ബോഡി ബിൽഡിങ് ഇന്ന് കേവലം മസിൽ ഉരുട്ടി യെടുക്കുക എന്ന പാ ഷൻ മാത്രമല്ല, നിരവധി തൊഴിൽ അവസരങ്ങളിലേക്ക് വഴി തുറക്കുന്ന കായികയിനം കൂടിയാണ്.

ജിംനേഷ്യങ്ങളും ഫിറ്റ്നസ് സെന്ററുകളും സജീവമായതോടെ ഫിറ്റ്നസ് എന്നതിന്റെ ഒരു പടികൂടി കടന്ന് സിക്സ്പാക്കും ബോഡി ബിൽഡിങ്ങും സ്വപ്നം കാണുന്നവരുടെ എണ്ണവും കൂടി ബോഡി ബിൽഡിങ്ങുമായി ബന്ധപ്പെട്ട് അറിയേണ്ട കാര്യങ്ങളിതാ...

ഫിറ്റ്നസും ബോഡി ബിൽഡിങ്ങും

 ശരീരസൗന്ദര്യവും ബലവും ആരോഗ്യവും വർധിപ്പിക്കാൻ പേശികളെ പരിപോഷിപ്പിക്കുന്ന പ്രക്രിയയാണ് ബോഡി ബിൽഡിങ്. സാധാരണ ജിം വർക്കൗട്ടിൽ നിന്ന് ബോഡി ബിൽഡിങ് വ്യത്യസ്തമല്ല. ശരീരത്തിന്റെ പരിണാമപ്രവർത്തനമാണിത്. ഭാരം ഉപയോഗിച്ചുള്ള പല വ്യായാമങ്ങളും ഉൾക്കൊള്ളുന്നു. ശാരീരിക പ്രശ്നമുള്ളവർക്ക് പോലും കൃത്യമായ മാർഗത്തിൽ സമീപിച്ചാൽ ബോഡി ബിൽഡിങ് പരിശീലിക്കാം. എന്നാൽ, അസുഖ ബാധിതർ ഡോക്ടറുടെ നിർദേശങ്ങൾ അനുസരിച്ച് മാത്രമേ വർക്കൗട്ട് ചെയ്യാൻ പാടുള്ളൂ.

ഫിറ്റ്നസ് ഓരോ വ്യക്തിക്കും വ്യത്യസ്ത നിലയിലാണ്. അതിവേഗക്കാരനായ അത്ലറ്റിനും ഐ.ടി പ്രഫഷനലിനും വ്യത്യസ്ത ആക്ടിവിറ്റിയാണ് ഫിറ്റ്നസിനായി നൽകുക. ഇതനുസരിച്ച് ട്രെയിനിങ്ങും ഭക്ഷണക്രമവുമെല്ലാം വ്യത്യസ്തമായിരിക്കും. എല്ലാ ആക്ടിവിറ്റിയും എക്സസൈസ് ആവണമെന്നുമില്ല.

ശാസ്ത്രീയമായി നിർവഹിക്കപ്പെടുമ്പോൾ മാത്രമാണ് അതിന്റെ ഫലം ലഭിക്കുക. സ്കിൽഡ് ജോലിയിൽ ഏർപ്പെടുന്ന സാധാരണക്കാർ ചെയ്യുന്നത് അധ്വാനമാണ്. എന്നാൽ, ഇത് കൃത്യമായ നിർദേശത്തിന്റെ അടിസ്ഥാനത്തിലുള്ള ക്രമീകരണമല്ലാത്തതിനാൽ ഉദ്ദേശിച്ച ഫലം കിട്ടണമെന്നില്ല. ഹൃദയത്തിന്റെ കാര്യശേഷിയും ജോയിന്റുകളുടെയും മസിലുകളുടെയും കരുത്തും വർധിപ്പിക്കുന്ന വിധത്തിലുമാണ് വർക്കൗട്ട് ചെയ്യേണ്ടത്.

വെയ്റ്റ് ലിഫ്റ്റിങ് അല്ല ബോഡി ബിൽഡിങ്

ബോഡി ബിൽഡിങ് പരിശീലിക്കുന്നവരിൽ ചെറിയൊരു ശതമാനം മാത്രമാണ് മത്സരങ്ങളിൽ പങ്കെടുക്കുന്നത്. വെയ്റ്റ് ലിഫ്റ്റിങ്ങാണ് ബോഡി ബിൽഡിങ് എന്നൊരു തെറ്റായ ധാരണയുമുണ്ട്.

മത്സരാധിഷ്ഠിത ബോഡി ബിൽഡിങിൽ ബോഡി ബിൽഡർമാർ വേദിയിൽ തന്റെ ശരീര സൗന്ദര്യം പ്രകടിപ്പിക്കുന്നു. വ്യത്യസ്ത പോസുകളാണ് അതിൽ ഉൾക്കൊള്ളുക.