ઇન્ટેલિજન્ટ આર્ટ વિરુદ્ધ ઇમોશનલ આર્ટકલા નામે સંવેદના, કૃત્રિમ દિમાગ સામે જંગ

આર્ટિફિશિયલ ઇન્ટેલિજન્સ ટેક્નોલોજીની મદદથી યુઝર્સનું કામ સરળ બન્યું છે, ઝડપી બન્યું છે અને વધારે ચોક્કસ બન્યું છે. વળી, તેમાં કળા વિશેની કોઈ ખાસ આવડત હોવી પણ જરૂરી નથી આજે ઘણા કલાકારો પોતાના હિત માટે લડી રહ્યા છે. કોઈ નવી ટેક્નોલોજીનો વિરોધ નથી, પરંતુ લાખો કલાકારોની કૃતિને ડેટા માત્ર બનાવી દેવા પર નિયમન ને નિયંત્રણ લાગુ કરવાની જરૂર છે

- પ્રિયંકા જોષી

જેસન એલને આર્ટિફિશિયલ ઇન્ટેલિજન્સના એક ઓનલાઇન પ્રોગ્રામ દ્વારા બનાવેલ આ ચિત્ર ડિજિટલ આર્ટ કેટેગરીમાં વિજેતા બન્યું અને પછી જે સત્ય સામે આવ્યું તેનાથી ઉગ્ર વિવાદ સર્જાયો

‘Artis human thing.’ - કળા માનવીય સંવેદનોની નાજુક અભિવ્યક્તિ છે. પોતાના દરેક સર્જન સાથે કલાકાર કોઈ વિચાર કે લાગણીને દર્શાવતો હોય છે. રંગના દરેક લસરકામાં કોઈ કલ્પના વસેલી હોય છે. પૃથ્વી પર કળાના આવિષ્કારની ઘટના માનવના અસ્તિત્વ જેટલી જ પ્રાચીન છે. માનવીની હયાતી સાથે જ કળાના શ્વાસ જોડાયેલા છે. અભિવ્યક્તિનું સૌંદર્યમય સ્વરૂપ એટલે કળા. વિચારો અને લાગણીનું ચેતન જ્યારે નિર્જીવ વસ્તુઓ પણ રેડાય ત્યારે તે સજીવ થઈ ઊઠે છે. કળાએ પથ્થરની ગુફામાં ચિત્રો દોરીને જે-તે સમયનું દસ્તાવેજીકરણ કર્યું છે, તો લાગણીમાં ઝબોળાઈને ભીંતને શોભાવતી વહાલભરી ઓકળીઓ કાઢી છે. પરાપૂર્વથી ચાલી આવતી આ પ્રણાલી માનવ ઉત્ક્રાંતિ સાથે વિકાસ પામતી રહી છે, પેઢી દર પેઢી ચાલતી આવી છે. પથ્થરો પર, દીવાલો પર, ધાતુપત્રો પર, ભોજપત્ર પર માનવે પોતાની કળા અને કલ્પનાને અંકિત કરી છે. કાળક્રમે લોકકળા અને એ પછી શિષ્ટ કળાનો ઉદય થયો, તેમાં નિત્ય નવીન પદ્ધતિઓ અને અનેક પ્રકારનાં સંસાધનો ઉમેરાતાં રહ્યાં. સંવર્ધનના દરેક પડાવ પર દરેક કલાકાર પોતાની આગવી સૂઝ અને આવડત પ્રમાણે પોતાનું પ્રદાન નિશ્ચિત કરે છે. આધુનિકતાના પગલે ટૅક્નોલૉજીનો વિકાસ થતાં, કળાના નવતર સ્વરૂપ તરીકે ફોટોગ્રાફી આવી. પ્રતિભામૂલક આ સઘળી કળાની પરસ્પરની ગરિમા જળવાય છે. તેમની વચ્ચે ક્ષુલ્લક પ્રતિસ્પર્ધાનો ભાવ હોતો નથી. સમય સાથે આ સિલસિલો રંગ, પીંછી, તક્ષિણી અને તુલિકાને વટાવીને ફોટોગ્રાફી અને ડિજિટલ આર્ટ વર્કથી આગળ હવે આર્ટિફિશિયલ ઇન્ટેલિજન્સ (AI) generation સુધી આવી પહોંચ્યો છે.

ટાઇપ કરો કે - Walking through the Van Gogh's starry night. કે પછી, Angelina Jolie as Monalisa. સેકન્ડ્સમાં તમારી સામે અનેક વિકલ્પો હાજર થઈ જશે. તરતાં પંખી કે ઊડતાં હાથી, હજુ દશ્યની કલ્પના કરતાં હશો એટલામાં તો સ્ક્રીન પર હાજર હશે. આજે આ બધું શક્ય છે. ટૅક્નોલૉજી ક્ષેત્રે આવેલી ક્રાંતિ આર્ટિફિશિયલ ઇન્ટેલિજન્સના કારણે, આજે ઘણું - જે પહેલાં અશક્ય લાગતું હતું - તે શક્ય બન્યું છે.

મોનાલિસા - ઓરિજિનલ