ઓસ્કર વિજેતા ‘એવરીથિંગ એવરીવેર ઓલ એટ વન્સ'

એક સંસારમાં આપણી હયાતી અને આસપાસના સંસારનું જ્ઞાન આપણા દિમાગને હદ બહારનું થકવી શકે, તો આવું સેંકડો ગણું જ્ઞાન એક માનસને કઈ હદે થકવી દેતું હશે!

- સ્પર્શ હાર્દિક

હૉલિવૂડમાં દાયકાઓથી કાર્યરત ઘણા ધરખમ સ્ટુડિયોને એકાદ દાયકાથી A24 નામક પ્રોડક્શન-ડિસ્ટ્રિબ્યુશન કંપની હંફાવી રહી છે, કેમ કે સ્ટુડિયો દ્વારા બનતી મોટા ભાગની બીબાંઢાળ ફિલ્મોથી અલગ A24 જોખમ લઈ, નવા અને ઉત્સાહી ફિલ્મ-મૅકર્સને તક આપી, એમના પર વિશ્વાસ મૂકી સિનેમાની ક્ષિતિજો વિસ્તારી રહી છે. ઑસ્કર ઍવૉર્ડનું સ્તર પણ વર્ષે-વર્ષે કથળતું જતું હોવાના આરોપો સાથે એક સમર્પિત વર્ગના સિનેરસિકો એ વાતની ઉજાણી પણ કરે છે કે, દસેક વર્ષમાં A24ની ફિલ્મો પચાસેક જેટલા ઑસ્કર નોમિનેશન મેળવી ચૂકી છે. ૨૦૧૬માં A24 પ્રોડક્શનની ‘મૂનલાઇટ’ બેસ્ટ પિક્ચર ઉપરાંત બીજા બે ઑસ્કર ઍવૉર્ડ લઈ ગઈ હતી. આ વર્ષે A24ની યશકલગીમાં ઉમેરાયેલું નવું છોગું એટલે અનોખી, મજેદાર અને છતાં ઊંડું ચિંતન કરવા પ્રેરતી ફિલ્મ ‘એવરીથિંગ એવરીવર ઑલ ઍટ વન્સ’નું બેસ્ટ પિક્ચરનો ઑસ્કર જીતવું. આ ઉપરાંત, ઑરિજનલ સ્ક્રિનપ્લૅ, ડિરેક્ટર, ઍક્ટ્રેસ, સપોર્ટિંગ ઍક્ટર-ઍક્ટ્રેસ અને એડિટિંગ, એમ સાત ઑસ્કર આ ફિલ્મે પોતાના ખાતે કર્યા છે. હૉલિવૂડના ઘણા સિનેરસિકોની પ્રિય બની ચૂકેલી A24નો ખાસ ઉલ્લેખ એટલા માટે કરવો જરૂરી કે જો એનું પીઠબળ ના હોત તો કદાચ ‘એવરીથિંગ એવરીવર ઑલ ઍટ વન્સ’ આ પ્રકારે બની શકી ના હોય કે મોડી બની હોય.

ફિલ્મની અતરંગી-૨મૂજી કથા મા-દીકરી અને એમના કુટુંબની સમસ્યા આસપાસ ફરે છે. ચાઇનીઝ-અમેરિકન એવલિન વોંગના પરિવારમાં છે, તેનો પતિ વૅમન્ડ અને યુવાન દીકરી જોય, જે કૉલેજ ડ્રૉપઆઉટ, લેસ્બિયન અને સ્વચ્છંદી પણ છે. લૉન્ડ્રિમેટ ચલાવતી એવલિન ધંધો અને પરિવાર સાચવવામાં નખાઈ ગઈ છે. એવામાં રેવન્યૂ ડિપાર્ટમેન્ટ તરફથી એમના પર તવાઈ આવતા એક અધિકારી મહિલાને મળવા જવું પડે એમ છે. અહીંથી કથા એબ્સર્ટ તરફ ગમન કરીને સાયન્સ ફિક્શન સ્વરૂપમાં ઢળવા લાગે છે.