રાજકાજ

મેક્રોનની મુલાકાત અને ભારત-ફ્રાન્સ વચ્ચેના સંબંધો

ભારતીય ગણતંત્રની પરેડમાં ફ્રાન્સના રાષ્ટ્રપતિ ઇમેન્યુઅલ મેક્રોન અતિથિ તરીકે આવ્યા હતા. પ્રજાસત્તાક દિનની પૂર્વ સંધ્યાએ રાજસ્થાન ના જયપુરમાં વડાપ્રધાન નરેન્દ્ર મોદી તેમની સાથે રોડ શૉ યોજીને અનોખું સ્વાગત કર્યું હતું. ફ્રાન્સની ગણતરી ભારતના કેટલાક સારા મિત્રોમાં થાય છે. ફ્રાન્સ સાથેના ભારતના સંબંધોનો ઇતિહાસ એવો રહ્યો છે કે તેમાં ક્યારેય વિક્ષેપ પડ્યો નથી. સંકટના સમયે પણ ફ્રાન્સ ભારત સાથે રહ્યું છે. અટલ બિહારી બાજપેયી જ્યારે વડાપ્રધાન હતા ત્યારે ભારતે કરેલા અણુવિસ્ફોટને પગલે અમેરિકા અને યુરોપના દેશોએ ભારત પર નિયંત્રણો લાદ્યા હતા એ વખતે પણ ફ્રાન્સ આ નિયંત્રણોથી અલિપ્ત રહ્યું હતું અને ભારતની સાથે રહ્યું હતું. બંને દેશોના મજબૂત દ્વિપક્ષીય સંબંધોનો આ સંકેત છે. મેક્રોનની આ વખતની ભારતની મુલાકાત વખતે પણ બંને દેશો વચ્ચે અનેક ક્ષેત્રે સહયોગના કરારો થયા છે. ભારતમાં અત્યારે ફ્રાન્સની એક હજારથી વધુ કંપનીઓ કામ કરી રહી છે. આ બધી કંપનીઓનું સંયુક્ત ટર્ન ઓવર ત્રીસ અબજ ડૉલરથી વધુ થવા જાય છે. એ જ રીતે ફ્રાન્સમાં પણ ભારતની લગભગ એકસો ત્રીસ કંપનીઓ કામ કરે છે.