એનાલિસિસ

સમાજકારણ અને રાજકારણનું દ્વંદ્વયુદ્ધ રૂપાલા સામે શા માટે?

- સુધીર એસ. રાવલ

નામ પરશોત્તમ ખોડાભાઈ રૂપાલા, ઉંમર૬૯ વર્ષ, ગામ-ઈશ્વરિયા, જિલ્લો-અમરેલી. ભણતર-બીએસસી, બીએડ, વ્યવસાયે ખેડૂત, સ્વભાવે શિક્ષક, સ્પષ્ટ વક્તા, નિર્ભીક અને વિચારશીલ વ્યક્તિત્વ, કર્મઠ અને સમર્થ નેતૃત્વ, વહીવટી કુનેહપરિણામલક્ષી, વાણીનો પ્રભાવ અસાધારણ, કારકિર્દીસમાજસેવાથી દેશસેવા, રાજનીતિક વિચારસરણી-સાંસ્કૃતિક રાષ્ટ્રવાદ, સતત ૩૫ વર્ષની પરિણામલક્ષી રાજકીય કારકિર્દી દરમિયાન ત્રણ વાર ધારાસભ્ય, ગુજરાતમાં ત્રણવાર મંત્રી, સરકારી નિગમ અને વૈધાનિક સમિતિમાં ચૅરમેન, સંસદમાં ત્રણ વાર રાજ્યસભાના સાંસદ, પાંચ-પાંચ મહત્ત્વની સંસદીય સમિતિમાં સભ્ય, બે વાર ભારત સરકારમાં રાજ્ય મંત્રી, એકવાર કેન્દ્રીય કેબિનેટ મંત્રી, છેલ્લે રાજકોટ લોકસભાની બેઠક પર બેઠકના સંસદીય ઇતિહાસમાં સૌથી વધારે એવી ૪,૮૪,૨૬૦ મતોની લીડથી જીતીને હવે લોકસભાના સાંસદ. પણ હા, નવા કેન્દ્રીય મંત્રીમંડળમાં સ્થાન નહિ..! દેખીતું કારણ? ઇતિહાસની પૃષ્ઠભૂમિ પર ક્ષત્રિય સમાજ અંગેની એક ટિપ્પણી.. સાચું કારણ? અકળ અને અજાણ્યું!

વર્ષ-૨૦૦૨માં નરેન્દ્ર મોદીએ રાજ્યના મુખ્યમંત્રી તરીકે શપથ લીધા ત્યારે પણ અને ત્યારથી આજ સુધી જ્યારે જ્યારે રાજ્યના સક્ષમ હોય તેવા ભાવિપ્રસ્તાવિત મુખ્યમંત્રીઓમાં જે-જે નામોની રાજકીય વર્તુળોમાં ચર્ચા થાય, ત્યારે તે યાદીમાં પણ જેમનું નામ અચૂક ચર્ચાયું છે, તેવા કાબેલ રાજનેતા અને રાષ્ટ્રીય સ્તરે ગુજરાતનું બળૂકું પ્રતિનિધિત્વ એવા પરશોત્તમ રૂપાલાને જે રીતે એનડીએની નવી સરકારમાં મંત્રીપદ મળ્યું નથી, તેમાં સપાટી પર ભલે સ્થાનિક સ્તરે ખેલાયેલા સમાજકારણ અને રાજકારણના દ્વંદ્વયુદ્ધની ચર્ચા હોય, પરંતુ અસલી કારણ રૂપાલાના તેજતર્રાર વ્યક્તિત્વના ઓજસને ખતમ કરવાની અનાયાસે મળી ગયેલી તકને નહિ ગુમાવવાની તેજોદ્વેષની કૂટનીતિ ભાસે છે. આ વિષય હવે જ્યારે રાષ્ટ્રીય કક્ષાએ પણ રાજકીય વિશ્લેષકો માટે મહત્ત્વનો સંશોધનનો વિષય બની ચૂક્યો છે, ત્યારે ગુજરાતકારણના આ વિશિષ્ટ અધ્યાયની આંટીઘૂંટી સમજવી અત્યંત જરૂરી છે.

કેટલાંક સત્યો અને તથ્યોઃ